காவிரி நதிநீர் பங்கீடு விவகாரம் மீண்டும் உச்ச நீதிமன்றத்தின் கவனத்திற்கு வந்துள்ளது. இந்த ஆண்டு தென்மேற்கு பருவமழை குறைவாகப் பெய்ததால் காவிரி படுகையில் நீர் பற்றாக்குறை ஏற்பட்டுள்ள நிலையில், தமிழகத்திற்கு உரிய நீரை வழங்காதது குறித்து கர்நாடக அரசு மீது கடுமையான கேள்விகளை உச்ச நீதிமன்றம் எழுப்பியுள்ளது. தமிழக அரசு தாக்கல் செய்த மனுவில், காவிரி நீர் மேலாண்மை ஆணையம் மற்றும் நீர் முறைப்படுத்தும் குழுவின் உத்தரவுகளை கர்நாடகா பின்பற்றவில்லை என்றும், இதனால் டெல்டா பகுதியில் விவசாயம் பாதிக்கப்பட்டுள்ளது என்றும் குறிப்பிடப்பட்டிருந்தது.

விசாரணையின் போது நீதிபதிகள், கர்நாடக அணைகளில் நீர் இருப்பு 76 சதவீதமாக இருந்தபோதிலும், தமிழகத்திற்கு போதுமான நீர் வரவில்லை என்பதை சுட்டிக்காட்டினர். ஆணையம் வினாடிக்கு 12,000 கன அடி நீரை தினசரி திறக்க உத்தரவிட்டிருந்த நிலையில், ஆரம்ப நாட்களில் குறைவாகவே நீர் திறக்கப்பட்டதாக தமிழக தரப்பு தெரிவித்தது. இதற்கு கர்நாடக தரப்பு, இந்த ஆண்டு மழைப்பொழிவு குறைவாக இருப்பதால் நீர்வளம் பாதிக்கப்பட்டுள்ளதாகவும், ஏற்கனவே அதிக அளவில் நீர் வெளியேற்றப்பட்டுள்ளதாகவும் வாதிட்டது.

ஆனால் நீதிபதிகள், ஆணையத்தின் உத்தரவை கடைபிடிக்க வேண்டும் என்றும், தண்ணீர் வழங்குவதில் தாமதம் ஏன் ஏற்பட்டது என்றும் கேள்வி எழுப்பினர்.காவிரி நதிநீர் பங்கீடு நீண்டகால பிரச்சினையாக இருந்து வருகிறது. உச்ச நீதிமன்றத்தின் முந்தைய தீர்ப்பின்படி ஆண்டுக்கு குறிப்பிட்ட அளவு நீர் தமிழகத்திற்கு வழங்கப்பட வேண்டும். மாதவாரியாக நிர்ணயிக்கப்பட்ட அளவுகளிலும் குறைபாடு ஏற்பட்டுள்ளதாக தமிழகம் சுட்டிக்காட்டியது. டெல்டா மாவட்டங்களில் லட்சக்கணக்கான ஏக்கர் விவசாய நிலங்கள் மேட்டூர் அணையைச் சார்ந்துள்ளன. நீர் வரத்து குறைந்தால் சம்பா பயிர் பாதிக்கப்பட்டு, விவசாயிகள் மற்றும் விவசாயத் தொழிலாளர்கள் வாழ்வாதாரம் ஆபத்தில் சிக்குகிறது. இதனால்தான் உரிய நேரத்தில் நீர் கிடைப்பது மிக முக்கியம் என தமிழக அரசு வலியுறுத்தியது.கர்நாடக தரப்பு தங்கள் மாநில விவசாயிகளின் தேவையையும் பாதுகாக்க வேண்டிய கட்டாயம் உள்ளதாகக் கூறியது.

இதையும் படிங்க: தமிழ்நாட்டிற்கு தண்ணீர் திறக்க உத்தரவு..! கர்நாடகாவுக்கு செக்... மேலாண்மை ஆணையம் அதிரடி..!!

மழை குறைவாக இருப்பதால் அணைகளில் நீர் சேமிப்பைப் பராமரிக்க வேண்டிய அவசியம் இருப்பதாகவும், அதிகப்படியான வெளியேற்றம் சிக்கலை உருவாக்கும் என்றும் விளக்கியது. இருப்பினும் நீதிபதிகள், ஆணையத்தின் உத்தரவுகளை மதித்து செயல்பட வேண்டும் என உத்தரவிட்டனர். மேலும் நீர் வெளியேற்றத்தின் தற்போதைய நிலையை அறிக்கையாக சமர்ப்பிக்கவும், அடுத்த விசாரணையில் முன்னேற்றத்தை ஆய்வு செய்யவும் கூறினர்.இந்த விவகாரம் இரு மாநிலங்களுக்கும் இடையேயான நம்பிக்கையைப் பாதிக்கும் விதமாக அமைந்துள்ளது. மழைப்பொழிவு குறைவான ஆண்டுகளில் பங்கீட்டை எப்படி நியாயமாகச் செய்வது என்பது தொடர்ந்து விவாதத்திற்குரியதாக இருக்கிறது. உச்ச நீதிமன்றம் தலையிட்டு ஆணையத்தின் உத்தரவுகளை அமல்படுத்த வலியுறுத்தியது. தண்ணீர் கொடுப்பதில் கர்நாடகாவுக்கு என்ன பிரச்சனை என்று உச்ச நீதிமன்றம் கேள்வி எழுப்பியிருக்கிறது. இரு மாநிலங்களும் பரஸ்பர முடிவுக்கு வந்தால் மட்டுமே தண்ணீர் பிரச்சனைக்கு தீர்வு கிடைக்கும் என்றும் விவசாயிகளின் வாழ்வாதாரம் மேம்படும் எனவும் தொடர்ந்து வலியுறுத்தப்பட்டு வருகிறது. 

இதையும் படிங்க: வெடிக்கும் மேகமலை விவகாரம்... சலுகை காட்ட கூடாது..! சுப்ரீம் கோர்ட் திட்டவட்டம்..!!