மதுராந்தகம், தாராபுரம் சட்டப்பேரவைத் தொகுதிகளுக்கான இடைத்தேர்தல் பணிகள் தீவிரமடைந்துள்ள நிலையில், திமுக தலைவர் மு.க.ஸ்டாலின் சென்னை அண்ணா அறிவாலயத்தில் கட்சி நிர்வாகிகளுடன் ஆலோசனை நடத்தியுள்ளார். தேர்தல் பணிகள், தொகுதி வாரியான களப்பணிகள் மற்றும் நிர்வாகிகளின் பொறுப்புகள் குறித்து இந்த ஆலோசனையில் விவாதிக்கப்பட்டதாக தகவல்கள் வெளியாகியுள்ளன.
இந்த ஆலோசனையில் திமுக பொதுச்செயலாளர் துரைமுருகன், பொருளாளர் டி.ஆர்.பாலு உள்ளிட்ட மூத்த நிர்வாகிகள் பங்கேற்றதாக கூறப்படுகிறது. மதுராந்தகம் மற்றும் தாராபுரம் தொகுதிகளில் மேற்கொள்ள வேண்டிய தேர்தல் பணிகள் குறித்தும், கட்சி நிர்வாகிகள் மேற்கொள்ள வேண்டிய நடவடிக்கைகள் குறித்தும் ஆலோசனை நடைபெற்றதாக தகவல்கள் தெரிவிக்கின்றன.
இரு தொகுதிகளிலும் திமுக சார்பில் ஏற்கனவே வேட்பாளர்கள் அறிவிக்கப்பட்டுள்ளனர். மதுராந்தகம் தொகுதியில் இ.பரந்தாமனும், தாராபுரம் தொகுதியில் எஸ்.சுகன்யாவும் திமுக வேட்பாளர்களாக களமிறங்கியுள்ளனர்.
இதையும் படிங்க: மதுராந்தகம் நோக்கி புறப்பட்டார் முதல்வர் விஜய்! 3 மணிக்கு விஜய் பிரசாரம்! இடைத்தேர்தல் களம் சூடுபிடிப்பு!
இந்நிலையில், திமுக வேட்பாளர்களை ஆதரித்து மு.க.ஸ்டாலின் நேரடியாக தேர்தல் பிரசாரத்தில் ஈடுபட உள்ளதாக கட்சி சார்பில் தகவல் வெளியாகியுள்ளது. அதன்படி, தாராபுரத்தில் அக்டோபர் 2-ம் தேதியும், மதுராந்தகத்தில் அக்டோபர் 3-ம் தேதியும் அவர் பிரசாரம் செய்ய திட்டமிட்டுள்ளதாக தெரிவிக்கப்பட்டுள்ளது.
தமிழகத்தில் காலியாக உள்ள 7 சட்டப்பேரவைத் தொகுதிகளில் மதுராந்தகம் மற்றும் தாராபுரம் ஆகிய இரண்டு தொகுதிகளுக்கு மட்டும் தற்போது இடைத்தேர்தல் அறிவிக்கப்பட்டுள்ளது. இரு தொகுதிகளிலும் அக்டோபர் 6-ம் தேதி வாக்குப்பதிவு நடைபெறுகிறது. அக்டோபர் 9-ம் தேதி வாக்கு எண்ணிக்கை நடைபெற உள்ளது.
இரு தொகுதிகளிலும் இறுதி வேட்பாளர் பட்டியல் வெளியிடப்பட்டுள்ள நிலையில், பல்வேறு அரசியல் கட்சிகள் மற்றும் சுயேச்சை வேட்பாளர்கள் களத்தில் உள்ளனர். மதுராந்தகத்தில் 27 பேரும், தாராபுரத்தில் 22 பேரும் இறுதியாக போட்டியிடுகின்றனர்.
இடைத்தேர்தலை முன்னிட்டு முக்கிய அரசியல் கட்சிகளின் தலைவர்கள் மற்றும் நிர்வாகிகள் தொகுதிகளில் முகாமிட்டு பிரசாரத்தில் ஈடுபட்டு வருகின்றனர். இதனால் தேர்தல் களம் நாளுக்கு நாள் பரபரப்பாகி வருகிறது.
இதையும் படிங்க: மதுராந்தகம் இடைத்தேர்தல் பிரசாரத்தில் பள்ளி மாணவர்கள்?! தவெகவுக்கு எதிராக நயினார் நாகேந்திரன் பரபரப்பு குற்றச்சாட்டு!