கோபி நயினார் இயக்கத்தில் ஆன்ட்ரியா ஜெர்மியா முன்னணி கதாபாத்திரத்தில் நடித்திருக்கும் ‘மனுசி’ திரைப்படம், தமிழ் சினிமாவில் மற்றொரு சமூக நீதி கதையாக உருவாகியுள்ளது. இயக்குநர் வெற்றிமாறனின் க்ராஸ் ரூட் நிறுவனம் தயாரித்த இப்படம், இளையராஜாவின் இசையமைப்பில் உருவாகியுள்ளது. நாசர், தமிழ், ஹக்கிம் ஷா உள்ளிட்ட பலர் முக்கிய வேடங்களில் நடித்துள்ளனர்.
படத்தின் முதல் தோற்றமும், ட்ரெய்லரும் இணையத்தில் வெளியாகி ரசிகர்களிடையே பெரும் வரவேற்பைப் பெற்றன. ட்ரெய்லர் வெளிப்படுத்தும் கதைக்களம், ஆண்ட்ரியாவின் கதாபாத்திரம் காவல் துறையால் கைது செய்யப்பட்டு விசாரணைக்கு உட்படுத்தப்படுவதை மையப்படுத்துகிறது. படத்தில் பெரியார் புகைப்படம், ராமசாமி என்ற பெயர் போன்ற குறியீடுகள் இடம்பெற்று, சமூக நீதி மற்றும் சாதி ஒடுக்குமுறை குறித்து விவாதிக்கும் திரைப்படமாக இருக்கலாம் என எதிர்பார்க்கப்படுகிறது.
இதையும் படிங்க: 'மனுஷி' பட முக்கிய காட்சியை டெலிட் செய்ய சொன்ன சென்சார் போர்ட்..! ஐகோர்ட் நீதிபதி எடுத்த அதிரடி முடிவு..!
2017-ல் நயன்தாரா நடிப்பில் வெளியான ‘அறம்’ படத்தின் மூலம் கவனம் பெற்ற கோபி நயினார், இப்படத்திலும் தனது தனித்துவமான கதை சொல்லல் பாணியை வெளிப்படுத்தியுள்ளார். ஆனால், ‘மனுசி’ தணிக்கை சர்ச்சையில் சிக்கியுள்ளது. தணிக்கைக் குழுவின் சில கேள்விகளால் படத்தின் வெளியீட்டில் தாமதம் ஏற்பட்டுள்ளதாக தகவல்கள் தெரிவிக்கின்றன. இதனால், படத்தின் வெளியீட்டு தேதி இன்னும் உறுதியாக அறிவிக்கப்படவில்லை.
இப்படம், மாநில அரசை மோசமாக சித்தரிப்பதாகவும், கம்யூனிச கொள்கைகளை குழப்பும் வகையில் காட்சிகள் அமைந்துள்ளதாகவும் கூறி, 37 ஆட்சேபகரமான காட்சிகள் மற்றும் வசனங்களை நீக்க சென்சார் குழு உத்தரவிட்டிருந்தது. இதனை எதிர்த்து வெற்றிமாறன் சென்னை உயர் நீதிமன்றத்தில் மனு தாக்கல் செய்தார்.
வழக்கை விசாரித்த நீதிபதி ஆனந்த் வெங்கடேஷ், ஆட்சேபகரமான காட்சிகளை ஆய்வு செய்ய படத்தை பார்வையிட வேண்டும் என தீர்ப்பளித்தார். இதன்படி, கடந்த 24ம் தேதி அன்று சென்னை இசைக் கல்லூரியில் உள்ள திரையரங்கில் ‘மனுசி’ படம் திரையிடப்பட்டு, நீதிபதி பார்வையிட்டார். இந்த திரையிடலில் சென்சார் குழு உறுப்பினர்களும், வெற்றிமாறன் தரப்பினரும் உடனிருந்தனர். பேச்சு சுதந்திரத்திற்கு உட்பட்டு படத்தின் காட்சிகளை மறு ஆய்வு செய்ய நிபுணர் குழு அமைக்க வேண்டும் என வெற்றிமாறன் தரப்பு வாதிட்டது.
இந்நிலையில் இயக்குனர் வெற்றிமாறன் தயாரித்துள்ள ''மனுஷி'' படத்தில் சில காட்சிகளை நீக்குமாறு படக்குழுவுக்கு சென்னை உயர்நீதிமன்ற நீதிபதி ஆனந்த் வெங்கடேஷ் உத்தரவிட்டுள்ளார். ஆண்ட்ரியா நடிப்பில் உருவான 'மனுஷி' படத்தில் இடம்பெற்ற சில காட்சிகளை நீக்கவும், மாற்றி அமைக்கவும், வசனங்களை நீக்கி 2 வாரத்தில் தணிக்கை குழுவுக்கு அனுப்புமாறும் அந்த உத்தரவில் தெரிவிக்கப்பட்டுள்ளது.
ட்ரெய்லரின் தாக்கமும், படத்தின் கருப்பொருளும் ரசிகர்களிடையே ஆர்வத்தை தூண்டியுள்ளன. சமூகத்தில் பேசப்பட வேண்டிய விஷயங்களை தைரியமாக எடுத்துரைக்கும் இப்படம், ஆண்ட்ரியாவின் நடிப்பில் மற்றொரு மைல்கல்லாக அமையும் என எதிர்பார்க்கப்படுகிறது. இளையராஜாவின் இசை, படத்தின் உணர்வு தருணங்களை மேலும் உயர்த்தும் என்பது ரசிகர்களின் நம்பிக்கை. ‘மனுசி’ திரைப்படம், தமிழ் சினிமாவில் மற்றொரு சிந்தனையைத் தூண்டும் படைப்பாக விளங்கும் என்பது உறுதி.
இதையும் படிங்க: ரூட் க்ளியர்.. பிளான் பண்ணபடி நாளை தெறிக்கவிடப்போகும் அனிருத்தின் 'ஹுக்கும்'..!!