மலேசியாவின் தலைநகரான கோலாலம்பூரில் உள்ள புகிட் ஜாலில் தேசிய ஸ்டேடியத்தில் டிசம்பர் 27 அன்று நடைபெறவிருக்கும் தளபதி திருவிழா எனும் மாபெரும் இசை நிகழ்ச்சியும், ஜன நாயகன் திரைப்படத்தின் இசை வெளியீட்டு விழாவும் தளபதி விஜய் ரசிகர்களுக்கு ஒரு வரலாற்று முக்கியத்துவம் வாய்ந்த நிகழ்வாக அமையவிருக்கிறது. இது விஜயின் நடிப்பில் கடைசியாக வெளியாகும் திரைப்படமான ஜனநாயகனின் ப்ரொமோஷனுக்காக ஏற்பாடு செய்யப்பட்டுள்ள அதே வேளையில், அவரது மூன்று தசாப்த கால சினிமா பயணத்திற்கு ரசிகர்கள் அளிக்கும் மரியாதை கச்சேரியாகவும் வடிவமைக்கப்பட்டுள்ளது.மலேசியாவில் இந்தியாவுக்கு அடுத்தபடியாக விஜய்க்கு அதிக ரசிகர் பட்டாளம் இருப்பதால், இந்நிகழ்வு அந்நாட்டிலேயே தேர்வு செய்யப்பட்டது.

மலிக் ஸ்ட்ரீம்ஸ் கார்ப்பரேஷன் நிறுவனம் இதை ஏற்பாடு செய்துள்ளது. ஏறத்தாழ 85,000 முதல் 90,000 வரையிலான ரசிகர்கள் கலந்துகொள்ளும் என எதிர்பார்க்கப்படும் இந்நிகழ்வு, இந்தியாவுக்கு வெளியே விஜய் ரசிகர்களின் மிகப்பெரிய கூட்டமைப்பாக பதிவாகும் என்று கூறப்படுகிறது. நிகழ்ச்சி மதியம் 3.30 மணிக்கு தொடங்கி ஏறத்தாழ 10 மணி நேரம் நீடிக்கும் என தெரிவிக்கப்பட்டுள்ளது. தளபதி திருவிழா எனும் இசை நிகழ்ச்சியில், விஜயின் திரைப்படங்களில் இடம்பெற்ற 40க்கும் மேற்பட்ட சூப்பர் ஹிட் பாடல்கள் பாடப்படவுள்ளன. இதில் ஜன நாயகன் படத்தின் பாடல்களும் அடங்கும்.

இசையமைப்பாளர் அனிருத் ரவிச்சந்தர் தலைமையில் நடைபெறும் இக்கச்சேரியில், எஸ்.பி. சரண், விஜய் யேசுதாஸ், டிப்பு, ஹரிசரண், ஹரிஷ் ராகவேந்திரா, கிரிஷ், ஆண்ட்ரியா ஜெரமையா, ஷ்வேதா மோகன், சைந்தவி, அனுராதா ஸ்ரீராம் உள்ளிட்ட 30க்கும் மேற்பட்ட பிரபல பாடகர்கள் கலந்துகொண்டு பாடவுள்ளனர். 

இதையும் படிங்க: ஜனநாயகன் டீமுக்கு பறந்த கண்டிஷன்..! லைட்டா மீறினாலும் 'Audio Launch' கட்.. மலேசியா போலீஸ் அதிரடி..!

மலேசியாவில் நடைபெறும் தளபதி கச்சேரி விழாவுக்கு கடும் கட்டுப்பாடுகள் விதிக்கப்பட்டுள்ளன. 5 வயதுக்கு குறைவான குழந்தைகளுக்கு அனுமதி கிடையாது என்றும் ஒருமுறை மைதானத்திலிருந்து வெளியில் சென்றுவிட்டால் மீண்டும் உள்ளே செல்ல அனுமதி கிடையாது என்றும் தெரிவிக்கப்பட்டுள்ளது. உணவுப்பொருட்கள், ஆல்கஹால், கேமரா, டிரோன் கேமரா உள்ளிட்ட பொருட்களுக்கு அனுமதி கிடையாது என்றும் அரசியல் தொடர்புடைய எந்த பொருளுக்கும் மைதானத்தின் உள்ளே அனுமதி கிடையாது எனவும் விஜயின் தவெக கட்சி தொடர்புடைய டி ஷர்ட், கொடி, பேட்ஜ், போஸ்டர், குடை உள்ளிட்ட எந்த பொருளையும் கொண்டுசெல்ல அனுமதியில்லை என்றும் கூறப்பட்டுள்ளது. மேலும், தவெக கட்சி கொடி நிறங்களான சிவப்பு மற்றும் மஞ்சளை வெளிப்படையாக பிரதிபலிக்கும் எந்த பொருளுக்கும் அனுமதியில்லை என்று கூறப்பட்டுள்ளது.

இதையும் படிங்க: ஒரே மேடையில் விஜய் மற்றும் தனுஷ்..! 'ஜனநாயகன்' Audio Launch-ல காத்தருக்கும் சர்ப்ரைஸ்..!