செவிலியர்களின் நியாயமான போராட்டத்தை அடக்கும் தமிழ்நாடு அரசின் நடவடிக்கை என்று கூறி அம்மா மக்கள் முன்னேற்றக் கழக பொதுச்செயலாளர் டிடிவி தினகரன் கடுமையாகக் கண்டித்துள்ளார்.சென்னை எழும்பூர் ராஜரத்தினம் மைதானம் அருகே பணிப் பாதுகாப்பு, பணி நிரந்தரம், சம வேலைக்குச் சம ஊதியம் உள்ளிட்ட நியாயமான அடிப்படைக் கோரிக்கைகளை வலியுறுத்தி உண்ணாவிரதப் போராட்டத்தில் ஈடுபட்டிருந்த செவிலியர்கள் நேற்று இரவோடு இரவாக காவல்துறையினரால் வலுக்கட்டாயமாகக் கைது செய்யப்பட்டதாக அவர் குறிப்பிட்டார்.

பேச்சுவார்த்தை என்ற பெயரில் அவர்களின் பிரதிநிதிகளை அழைத்துச் சென்று கைது செய்து மண்டபத்தில் அடைத்திருப்பது அப்பட்டமான அதிகாரத் துஷ்பிரயோகம் என்று தினகரன் கூறினார்.தங்களின் உரிமைகளுக்காக அமைதியான முறையில் போராடி வரும் செவிலியர்களின் கோரிக்கைகளை நிறைவேற்ற வேண்டிய தமிழ்நாடு அரசு, காவல்துறையை ஏவல்துறையாக மாற்றியிருப்பதாக அவர் குற்றம்சாட்டினார்.

போராட்டக் களத்தில் மின்சாரத்தைத் துண்டித்தும், பந்தல்களை அகற்றியும், செவிலியர்களுக்குக் காயம் ஏற்படும் அளவிற்கு அவர்களை வலுக்கட்டாயமாக இழுத்துச் சென்றும் அராஜகப் போக்கில் ஈடுபட்டிருப்பது கடும் கண்டனத்திற்குரியது என்று அவர் தெரிவித்தார்.முறையான முன் அனுமதி பெற்று அமைதியாகப் போராடிக் கொண்டிருந்த செவிலியர்களை இவ்வாறு நடத்தியது அவர்களுக்கு இழைக்கப்பட்ட மாபெரும் துரோகம் என்று தினகரன் சுட்டிக்காட்டினார். தேர்தலுக்கு முன்பு போராட்டக் களத்திற்குச் சென்று ஆதரவு தெரிவித்தும், தேர்தல் அறிக்கையில் செவிலியர்களைப் பணி நிரந்தரம் செய்வோம் என்று வாக்குறுதி அளித்தும், ஆட்சிக்கு வந்ததும் அதே கோரிக்கையை முன்வைத்துப் போராடும் செவிலியர்களைக் காவல்துறையை வைத்து அடக்கி ஒடுக்குவதாக அவர் குறிப்பிட்டார்.

இதையும் படிங்க: குடிநீர் TO தூய்மைப் பணி வரை..! தவெக ஆட்சியா.? தனியாரின் ஆட்சியா.? TTV தினகரன் சரமாரி கேள்வி..!!

போராட்டக் களத்தில் இருந்த செவிலியர்களைப் பார்த்து காவலர் ஒருவரே “வேண்டாம், உங்க உயிர் முக்கியம்” என மிரட்டியதாகவும் அவர் குறிப்பிட்டு, சினிமாவில் தான் ஹீரோ; நிஜத்தில் தான் ஒரு வில்லன் என்பதை முதலமைச்சர் ஜோசப் விஜய் தெரிவிக்க முற்படுகிறாரா என்ற கேள்வியை எழுப்பினார்.கொரோனா போன்ற பெருந்தொற்றுக் காலத்தில் தங்களின் உயிரையும் பொருட்படுத்தாமல் பொதுமக்களின் உயிரைக் காக்க முன்களத்தில் நின்று பணியாற்றிய செவிலியர்களின் நியாயமான கோரிக்கைகளைப் பேச்சுவார்த்தை மூலம் நிறைவேற்ற தமிழ்நாடு அரசு முன்வர வேண்டும் என தினகரன் வலியுறுத்தினார்.

இதையும் படிங்க: கட்சி நிர்வாகிகளுக்கு மட்டும் காம்ப்ரமைஸ் ஆகுவிங்களா CM..? பாலியல் குற்றம்... பொளந்து கட்டிய TTV தினகரன்.!