தமிழக அரசியல் களத்தில் ஒரு முக்கியமான திருப்பமாக, அதிமுகவின் மூத்த தலைவரும் முன்னாள் அமைச்சருமான கே.ஏ. செங்கோட்டையன், நவம்பர் 27 அன்று நடிகரும் தமிழக வெற்றிக் கழகத் தலைவருமான விஜய் முன்னிலையில் அக்கட்சியில் இணைந்தார். ஐம்பது ஆண்டுகளுக்கும் மேலாக அதிமுகவில் இருந்து செயல்பட்டு வந்த செங்கோட்டையன், கட்சியில் இருந்து நீக்கப்பட்ட பிறகு எம்.எல்.ஏ பதவியை ராஜினாமா செய்து, புதிய அரசியல் பயணத்தைத் தொடங்கினார். இந்த இணைப்பு, தமிழக வெற்றிக் கழகத்திற்கு பெரும் பலத்தை ஏற்படுத்தியது என்றால் மிகையல்ல, ஏனெனில் செங்கோட்டையன் எம்.ஜி.ஆர் மற்றும் ஜெயலலிதாவின் உண்மையான விசுவாசியாக அறியப்பட்டவர்.

செங்கோட்டையனின் அரசியல் பயணம் 1972-ல் எம்.ஜி.ஆர் அதிமுகவைத் தொடங்கிய போது தொடங்கியது. வெறும் 20 வயதில் எம்.ஜி.ஆரின் இயக்கத்தில் இணைந்த அவர், 1977-ல் சத்தியமங்கலம் தொகுதியில் போட்டியிட்டு இளம் வயதிலேயே எம்.எல்.ஏ ஆனார். எம்.ஜி.ஆரின் நம்பிக்கைக்குரியவராகவும், பின்னர் ஜெயலலிதாவின் நெருக்கமான ஆலோசகராகவும் திகழ்ந்தார். ஒரே தொகுதியான கோபிச் செட்டிபாளையத்தில் எட்டு முறை வெற்றி பெற்று சாதனை படைத்தார். ஜெயலலிதா ஆட்சிகளில் பல்வேறு துறைகளில் அமைச்சராகப் பொறுப்பு வகித்தார்.

கட்சியின் தேர்தல் உத்திகளை வகுப்பதிலும், அமைப்புரீதியாக பலப்படுத்துவதிலும் முக்கிய பங்காற்றினார். 1996-ல் அதிமுக படுதோல்வி அடைந்த போது பலர் கட்சியை விட்டு விலகிய நிலையிலும், செங்கோட்டையன் ஜெயலலிதாவின் பக்கம் உறுதியாக நின்றார். ஆனால், ஜெயலலிதா மறைவுக்குப் பிறகு அதிமுகவில் ஏற்பட்ட பிளவுகள் செங்கோட்டையனை பாதித்தன. கட்சியை ஒன்றிணைக்க வேண்டும் என்று எடப்பாடி பழனிசாமியிடம் வலியுறுத்தியதால், அவருக்கு எதிராக குரல் எழுப்பியதாகக் கூறி கட்சியில் இருந்து நீக்கப்பட்டார். இந்த நிலையில், தமிழக வெற்றிக் கழகத்தில் இணைவது அவருக்கு புதிய தளத்தை அளித்தது.

இதையும் படிங்க: வைரல் வீடியோ...!! “இதையெல்லாம் வேற எங்கேயாவது வச்சிக்கோ” - கூட்டத்திற்குள் வைத்து செங்கோட்டையனை அசிங்கப்படுத்திய தவெக தொண்டர்கள்...!

விஜய் அவரை வரவேற்று, "எம்.ஜி.ஆர் மற்றும் ஜெயலலிதா என்ற இரு பெரும் தலைவர்களின் நம்பிக்கைக்குரியவராக இருந்த செங்கோட்டையனின் 50 ஆண்டு அரசியல் அனுபவம் எங்கள் கட்சிக்கு பெரும் பலம்" என்று கூறினார். குறிப்பிடத்தக்க விஷயம் என்னவென்றால், தமிழக வெற்றிக் கழகத்தில் இணைந்த பிறகும் செங்கோட்டையன் எம்.ஜி.ஆர் மற்றும் ஜெயலலிதாவின் விசுவாசத்தை விட்டுவிடவில்லை. கட்சியில் இணைந்த போது தனது சட்டைப் பையில் ஜெயலலிதாவின் புகைப்படத்தை வைத்திருந்தார். இந்த நிலையில் இன்று MGR ன் நினைவுதினம் அனுசரிக்கப்படுகிறது. எனவே, ஈரோட்டில், எம். ஜி. ஆர் திருவுருவ படத்திற்கு செங்கோட்டையன் மலர்தூவி மரியாதை செலுத்தினார்.

இதையும் படிங்க: விஜயின் ஈரோடு மக்கள் சந்திப்பு! த.வெ.க.,வில் இணையும் பிரபலங்கள் யார்? லிஸ்ட் ரெடி!