தென் மாநிலங்களில் தொடர்ந்து நிலவும் கடும் வெப்பம், கர்ப்பிணிப் பெண்களின் ஆரோக்கியத்திற்கு பெரும் சவாலாக மாறியுள்ளது. வெப்பநிலை 45 டிகிரி செல்சியஸைத் தாண்டும்போது வெப்பத்தாக்குதலால் உயிரிழப்புகள் ஏற்படுவது வழக்கமாகிவிட்ட நிலையில், சமீபத்திய தேசிய அளவிலான ஆய்வு ஒன்று மேலும் அதிர்ச்சி தரும் தகவலை வெளிப்படுத்தியுள்ளது.

‘இந்தியாவில் தீவிர வெப்ப அழுத்தம் மற்றும் பாதகமான கர்ப்ப விளைவுகள்’ என்ற தலைப்பில் வெளியான இந்த ஆய்வு, 2015 முதல் 2020 வரையிலான காலகட்டத்தில் பிறந்த 2,09,266 குழந்தைகளின் தரவுகளை ஆய்வு செய்தது. இதில் ஆந்திரப் பிரதேசம் மற்றும் தெலுங்கானா மாநிலங்களைச் சேர்ந்த கர்ப்பிணிப் பெண்களின் தகவல்களும் அடங்கும். ஆராய்ச்சியாளர்கள் இந்திய வெப்பக் குறியீட்டைப் (India Heat Index) பயன்படுத்தினர். வெப்பநிலை மட்டும் அல்லாமல் ஈரப்பதம், காற்றின் வேகம் மற்றும் சூரியக் கதிர்வீச்சு ஆகியவற்றையும் கணக்கில் எடுத்துக்கொள்ளும் இந்த குறியீடு, உண்மையான வெப்ப அழுத்தத்தை மிகத் துல்லியமாக அளவிட உதவுகிறது.

கர்ப்பத்தின் முதல் மூன்று மாதங்களில் தொடர்ச்சியான கடும் வெப்பத்திற்கு ஆளாவது, குறைப்பிரசவ அபாயத்தை அதிகரிக்கிறது. இரண்டாவது மற்றும் மூன்றாவது மாதங்களில் (இரண்டாவது மூன்று மாதக் காலம்) அதே வெப்பத்திற்கு ஆளாவது, குறைந்த எடை (2.5 கிலோவுக்குக் குறைவு) கொண்ட குழந்தை பிறப்பதற்கான வாய்ப்பை உயர்த்துகிறது. வெறும் மூன்று அல்லது நான்கு நாட்கள் தொடர்ச்சியான சுட்டெரிக்கும் வெப்பம் கூட, குறைந்த எடை குழந்தை பிறப்பு அபாயத்தை புள்ளிவிவர ரீதியில் குறிப்பிடத்தக்க அளவு உயர்த்துவதாக ஆய்வு சுட்டிக்காட்டுகிறது. ஒவ்வொரு கூடுதல் சுட்டெரிக்கும் நாளும் இந்த அபாயத்தை சுமார் ஒரு சதவீதம் அதிகரிக்கிறது.

இதையும் படிங்க: சர்வதேச சுய பராமரிப்பு தினம் இன்று..!! உங்கள் ஆரோக்கியம் உங்கள் கையில்!

இந்த ஆய்வை குயின்ஸ்லாந்து பல்கலைக்கழகம்–ஐஐடி டெல்லி அகாடமி ஆஃப் ரிசர்ச், ஐஐடி டெல்லி மற்றும் பிற சர்வதேச நிறுவனங்களைச் சேர்ந்த விஞ்ஞானிகள் இணைந்து நடத்தியுள்ளனர். காலநிலை மாற்றத்தால் வெப்ப அலைகள் அதிகரிக்கும் நிலையில், கர்ப்பிணிப் பெண்களை வெப்ப மேலாண்மைத் திட்டங்களில் முன்னுரிமைக் குழுவாக அடையாளம் காண வேண்டும் என ஆராய்ச்சியாளர்கள் வலியுறுத்துகின்றனர். வெயில் காலங்களில் வெயில் தவிர்த்தல், போதுமான நீர் அருந்துதல் மற்றும் நிழலான இடங்களில் ஓய்வெடுத்தல் போன்ற எளிய முன்னெச்சரிக்கை நடவடிக்கைகள் அவசியம் என்றும் அவர்கள் அறிவுறுத்துகின்றனர்.