திருநெல்வேலி மாநகரின் பெருமைக்குரிய நெல்லையப்பர் காந்திமதி அம்பாள் திருக்கோயிலில் ஆனி மாத பெருந்திருவிழா நெருங்கி வரும் நிலையில், பணிகள் முழு வீச்சில் நடைபெற்று வருகின்றன. தமிழகத்தின் மிகப் பழமையான சிவாலயங்களில் ஒன்றான இந்தக் கோயில், வரலாற்றுச் சிறப்பு மிக்கது. இங்கு ஆண்டுதோறும் நடைபெறும் ஆனிப் பெருந்திருவிழா பக்தர்கள் மத்தியில் அளவற்ற பக்தியையும், உற்சாகத்தையும் ஏற்படுத்தும் நிகழ்வாகக் கருதப்படுகிறது. 

குறிப்பாக, ஆசியாவிலேயே மிக அதிக எடை கொண்ட சுவாமி தேர் உள்பட ஐந்து தேர்கள் ரதவீதிகளில் உலா வரும் காட்சி, பல்லாயிரக்கணக்கான பக்தர்களை ஈர்க்கும் முக்கிய அம்சமாகும். இந்த ஆண்டு திருவிழாவின் முதல் கட்ட நிகழ்வாகக் கடந்த மே 29-ஆம் தேதி பந்தக்கால் நடப்பட்டது. அதிகாலையில் கோயில் நடை திறக்கப்பட்டு, சிறப்பு பூஜைகள் நடைபெற்றன. விநாயகருக்கு தனிப்பட்ட வழிபாடு செய்யப்பட்ட பின்னர், பந்தக்காலுக்கு புதிய வஸ்திரம் அணிவிக்கப்பட்டு, தீபாராதனை காண்பிக்கப்பட்டது. 

வாத்திய முழக்கங்களுடன் ஊர்வலமாக எடுத்துவரப்பட்ட பந்தக்கால், கோயில் வாசல் மண்டபத்தில் நடப்பட்டது. அதனைத் தொடர்ந்து மஞ்சள், பால் உள்ளிட்ட புனித திரவியங்களால் அபிஷேகம் செய்யப்பட்டு, நவதானியங்கள் தூவப்பட்டு மகா தீபாராதனை நடைபெற்றது. ஏராளமான பக்தர்கள் இந்நிகழ்வில் பங்கேற்று சுவாமி தரிசனம் செய்தனர். பந்தக்கால் நடப்பட்டதைத் தொடர்ந்து, கோயில் வளாகத்தில் திருவிழா பூர்வாங்கப் பணிகள் தொடங்கியுள்ளன. கொடியேற்றம், அலங்கார பந்தல் அமைப்பு, தேர் சீரமைப்பு, தேர்களுக்கு தேவையான பொருட்கள் தயாரித்தல் உள்ளிட்ட பணிகள் வேகமாக முன்னேறி வருகின்றன. 

இதையும் படிங்க: இன்றைய ராசிபலன் (02-06-2026)..!! இந்த ராசிக்காரர்களுக்கு இன்று பேச்சுத்திறன் அதிகரிக்கும்..!!

இந்நிலையில், விநாயகர் திருவிழா கொடியேற்றம் இன்று விமரிசையாக நடைபெற்றது. கோயில் நடை அதிகாலையில் திறக்கப்பட்டு சிறப்பு பூஜைகள் நடத்தப்பட்டன. கொடிபட்டம் ஊர்வலமாக எடுத்துவரப்பட்டு, மூலஸ்தானத்துக்கு எதிரே உள்ள கொடிமரத்தில் சிறப்பு சடங்குகளுடன் விநாயகர் கொடியேற்றம் நிறைவேற்றப்பட்டது. விநாயகர் திருவிழா காலத்தில் காலை மற்றும் மாலை வேளைகளில் விநாயகருக்கு சிறப்பு பூஜைகளும், உட்பிரகார வீதியுலாவும் நடைபெறும். இதைத் தொடர்ந்து, ஆனி பெருந்திருவிழாவுக்கான அழைப்பிதழ் அச்சிடுதல், பந்தல் அமைப்பு, தேர்களை சுத்தப்படுத்துதல், அலங்கரித்தல் உள்ளிட்ட பல்வேறு ஏற்பாடுகள் தீவிரமடைய உள்ளன.

வரும் 20-ஆம் தேதி ஆனித்தேர் திருவிழா கொடியேற்றத்துடன் தொடங்குகிறது. ஒன்பதாம் நாளான 28-ஆம் தேதி விழாவின் சிகர நிகழ்வான ஆனித்தேரோட்டம் வெகு விமரிசையாக நடைபெறவுள்ளது. இந்த ஆண்டும் ஏராளமான பக்தர்கள் திருவிழாவில் கலந்துகொண்டு சுவாமி தரிசனம் செய்வார்கள் என எதிர்பார்க்கப்படுகிறது. திருவிழாவை சீரும் சிறப்புமாக நடத்திட திருக்கோயில் நிர்வாகம் அனைத்து ஏற்பாடுகளையும் துல்லியமாக செய்து வருகிறது. 

பக்தர்கள் பாதுகாப்பு, போக்குவரத்து ஏற்பாடுகள் உள்ளிட்ட அனைத்து நடவடிக்கைகளும் திட்டமிட்டு செயல்படுத்தப்படும் என நிர்வாகம் தெரிவித்துள்ளது. இந்த பழமை வாய்ந்த திருவிழா, தமிழ் பண்பாட்டின் சிறப்பை உலகுக்கு உணர்த்தும் வகையில் அமையும் என பக்தர்கள் மகிழ்ச்சி தெரிவித்துள்ளனர். 

இதையும் படிங்க: வைகாசி பிரம்மோற்சவத்தில் தென்கலை - வடகலை மோதல்..!! காஞ்சிபுரத்தில் பரபரப்பு..!!