தாராபுரம் தொகுதி இடைத்தேர்தல் விவகாரத்தில் நாம் தமிழர் கட்சியின் வேட்பாளர் கார்த்திகா உள்ளிட்ட நிர்வாகிகளைக் கைது செய்துள்ள தமிழக வெற்றிக் கழக (தவெக) அரசின் எதேச்சதிகாரப் போக்கைக் கண்டித்துக் குரல் எழுப்பிய திமுக, அதிமுக, பாஜக உள்ளிட்ட அனைத்துக் கட்சிகளின் தலைவர்கள் மற்றும் சனநாயக இயக்கங்களுக்கு நாம் தமிழர் கட்சியின் தலைமை ஒருங்கிணைப்பாளர் சீமான் தனது நெஞ்சார்ந்த நன்றியைத் தெரிவித்துள்ளார்.
அரசியல் பழிவாங்கும் நோக்கத்தோடு பொய் வழக்குப் புனைந்து, தாராபுரம் தொகுதியின் வேட்பாளராகப் போட்டியிட்ட அன்புத்தங்கை கார்த்திகா உள்ளிட்ட 10-க்கும் மேற்பட்ட நாம் தமிழர் உறவுகளைத் தவெக அரசு கைது செய்துள்ளதாகக் குற்றம்சாட்டியுள்ள அவர், அதிகார மமதையுடன் ஆளும் அரசு ஏவும் இத்தகைய அடக்குமுறைகளைக் கண்டித்து மாற்று அரசியல் கட்சிகள் ஒன்றிணைந்து குரல் எழுப்பியுள்ளது மிகுந்த நம்பிக்கையளிப்பதாகக் குறிப்பிட்டுள்ளார்.
இந்த அநீதிக்கு எதிராகக் குரல் கொடுத்த திமுக தலைவர் மு.க.ஸ்டாலின், அதிமுக பொதுச்செயலாளர் எடப்பாடி பழனிச்சாமி, தமிழ்த்தேசியப் பேரியக்கத் தலைவர் பெ.மணியரசன், திராவிடர் கழகத் தலைவர் கி.வீரமணி, எதிர்க்கட்சித் தலைவர் உதயநிதி ஸ்டாலின், பாஜக மாநிலத் தலைவர் நயினார் நாகேந்திரன், பாமக தலைவர் அன்புமணி இராமதாஸ், தேமுதிக பொதுச்செயலாளர் பிரேமலதா விஜயகாந்த், அமமுக பொதுச்செயலாளர் டிடிவி தினகரன், இந்தியக் கம்யூனிஸ்ட் கட்சியின் மு.வீரபாண்டியன், தவாக தலைவர் த.வேல்முருகன், திமுக எம்பி கனிமொழி, முன்னாள் ஆளுநர் தமிழிசை சௌந்தர்ராஜன், புதிய தமிழகம் நிறுவனர் மருத்துவர் கிருஷ்ணசாமி, மமக தலைவர் ஜவாஹிருல்லா, மஜக தலைவர் தமிமுன் அன்சாரி, 'வி தி லீடர்ஸ்' அமைப்பின் தலைவர் அண்ணாமலை, எஸ்டிபிஐ கட்சியின் உமர் பாரூக், தனியரசு உள்ளிட்ட அனைத்து அரசியல் கட்சித் தலைவர்கள், நாடாளுமன்ற-சட்டமன்ற உறுப்பினர்கள் மற்றும் சமூகச் செயற்பாட்டாளர்களுக்கு அவர் பெயர் குறிப்பிட்டு விரிவான நன்றியினைப் பதிவு செய்துள்ளார்.
இதையும் படிங்க: நாதக வேட்பாளர் கார்த்திகா கைது: தவெக அரசுக்கு திமுக எம்.பி கனிமொழி கண்டனம்!
தவறான ஒரு செயல் நடக்கும் போது அரசியல் கட்சிகளைக் கடந்து அனைவரும் ஒன்றாக முன்னின்று கண்டித்துக் குரல் எழுப்புவது தமிழ்நாட்டில் சனநாயகம் இன்னும் சாகவில்லை என்ற நம்பிக்கையைத் தருவதாகத் தெரிவித்துள்ள சீமான், மக்களாட்சியின் மாண்புகளைக் காலில் போட்டு மிதிக்கும் ஆளும் தவெக அரசின் அடக்குமுறைகளுக்கு எதிராகச் சனநாயக ஆற்றல்களின் உரத்த குரல் ஒன்றுபட்டு ஓங்கி ஒலிக்க வேண்டும் என்றும், அடக்குமுறைகள் வீழ்ந்து சனநாயகம் நிச்சயம் வெல்லும் என்றும் தனது அறிக்கையில் தெரிவித்துள்ளார்.
இதையும் படிங்க: நாதக நிர்வாகிகள் கைதுக்கு எதிர்ப்பு: அக். 24-ல் தமிழகம் முழுவதும் நாம் தமிழர் கட்சி ஆர்ப்பாட்டம்!