இந்தியாவில் தெரு நாய்களின் எண்ணிக்கை கணிசமாக உள்ளது. உலக சுகாதார அமைப்பின் அறிக்கையின்படி, உலகளவில் வெறிநாய்க்கடி இறப்புகளில் மூன்றில் ஒரு பங்கு இந்தியாவில் நிகழ்கிறது. 2024 ஆம் ஆண்டில் நாடு முழுவதும் 37 லட்சம் நாய்க்கடி சம்பவங்கள் பதிவாகியுள்ளன, இதில் குழந்தைகள் மற்றும் முதியவர்கள் அதிகம் பாதிக்கப்பட்டுள்ளனர். டெல்லியில் ஒரு மாணவி தெரு நாய் கடியால் ரேபிஸ் தொற்றுக்கு உள்ளாகி உயிரிழந்த சம்பவம் தெரு நாய்களை காப்பகத்தில் அடைக்கும் உத்தரவுக்கு முக்கிய காரணமாக அமைந்தது.
டெல்லியில் தெரு நாய்களை காப்பகங்களில் அடைக்க வேண்டும் என்ற உச்ச நீதிமன்றத்தின் உத்தரவு நாடு முழுவதும் பெரும் விவாதத்தைத் தூண்டியது. பெரும் எதிர்ப்பு கிளம்பிய நிலையில், தற்போது, டெல்லியில் தெரு நாய்களை காப்பகங்களில் அடைக்க வேண்டும் என்ற உத்தரவுக்கு தடைவிதித்து உச்சநீதிமன்றம் புதிய உத்தரவை பிறப்பித்துள்ளது. தெரு நாய்களை காப்பகத்தில் அடைக்கும் நடவடிக்கைக்கு தடை விதித்து உச்ச நீதிமன்றத்தின் 3 நீதிபதிகள் அடங்கிய அமர்வு இந்த புதிய உத்தரவை பிறப்பித்துள்ளது.
தெரு நாய்களுக்கு பொதுவெளியில் உணவளிக்கக்கூடாது என்றும் அதற்கென்று ஒதுக்கப்பட்ட இடங்களில் உணவளிக்க வேண்டும் என்றும் உச்சநீதிமன்றம் தெரிவித்துள்ளது. தெருநாய்கள் விவகாரத்தில் நாடு முழுவதும் பொருந்தக்கூடிய வழிகாட்டு நெறிமுறைகளை ஏற்படுத்த போவதாக உச்ச நீதிமன்றம் அறிவித்துள்ளது. தெருக்களில் திரியும் நாய்களைப் பிடித்து கருத்தடை மற்றும் தடுப்பூசி செலுத்தி மீண்டும் அதே பகுதியில் விடலாம் என்றும் உச்சநீதிமன்றம் தெரிவித்துள்ளது. மிகவும் ஆக்ரோஷமான மற்றும் ரேபிஸ் நோய் பாதித்த நாய்கள் பிடிக்கப்பட்டால் மீண்டும் பொது வெளியில் விடக்கூடாது என்றும் தெரிவிக்கப்பட்டுள்ளது. உச்ச நீதிமன்றத்தின் இரண்டு நீதிபதிகள் அமர்வு பிறப்பித்த உத்தரவுக்கு தடைவிதித்து மூன்று நீதிபதிகள் அமர்வு புதிய உத்தரவை பிறப்பித்தது.
இதையும் படிங்க: #BREAKING: தெரு நாய்களை காப்பகத்தில் அடைக்க தடை.. சுப்ரீம் கோர்ட் அதிரடி உத்தரவு..!
தெரு நாய்கள் தொடர்பாக அனைத்து மாநில உயர்நீதிமன்றங்களில் உள்ள வழக்குகளையும் உச்ச நீதிமன்றத்திற்கு மாற்றி நீதிபதிகள் உத்தரவிட்டுள்ளனர். தெரு நாய்களை கையாள்வது தொடர்பான நெறிமுறை உருவாக்க அனைத்து மாநில அரசுகளும் பதிலளிக்க உச்சநீதிமன்றம் நோட்டீஸ் வழங்கி உள்ளது. மேலும், நாய்களை பிடிப்போரை தடுப்பவருக்கு 25 ஆயிரம் ரூபாய் முதல் 2 லட்சம் ரூபாய் வரை அபராதம் விதிக்கப்படும் என உச்ச நீதிமன்றம் எச்சரித்துள்ளது.
இதையும் படிங்க: விசாரணைக்கு வாங்க... ஜெகத்ரட்சகனுக்கு எதிரான ED நோட்டீஸுக்கு சுப்ரீம் கோர்ட் தடை!