இந்தியாவின் பின்னலாடை ஏற்றுமதியில் 68 சதவீதம் தமிழ்நாட்டின் திருப்பூர் மாநகரில் இருந்தே நடக்கிறது. 1980 முதல் 90 களில் இங்கு வளர்ந்த பின்னலாடை ஏற்றுமதி தொழில் கடந்த 10 ஆண்டுகளில் அமெரிக்கா, ஐரோப்பா உள்ளிட்ட மேற்கத்திய நாடுகளில் சந்தைகளை வசப்படுத்தி ஆண்டுக்கு 46 ஆயிரம் கோடி ரூபாய் என்ற அளவில் ஏற்றுமதி நடக்கிறது. இந்த ஏற்றுமதியில் கிட்டத்தட்ட 30 முதல் 40 சதவீத அளவுக்கான பின்னலாடைகள் திருப்பூரில் இருந்து அமெரிக்காவுக்கு ஏற்றுமதி செய்யப்பட்டு வருகின்றன. அமெரிக்க ஏற்றுமதியை நம்பி சிலநூறு பெரிய பின்னலாடை நிறுவனங்களும், லட்சக்கணக்கான தொழிலாளர்களும் இங்கு இருக்கிறார்கள்.
இந்நிலையில் அமெரிக்க அதிபர் டொனால்ட் ட்ரம்ப் விதித்த 50 சதவீத அபராத வரியானது திருப்பூர் பின்னலாடை தொழிலை ஸ்தம்பிக்கச்செய்து உள்ளது. இங்கிருந்து ஏற்றுமதி செய்வதற்காக ஏற்கனவே பெறப்பட்ட ஆர்டர்களுக்கு 25 சதவீத வரி ஒரு மாதமாக இருந்து வந்த நிலையில், ஆகஸ்ட் 27ந்தேதி(இன்று) முதல் 50 சதவீதமாக உயர்த்தப்பட்டு அமலுக்கு வருகிறது. இதனால் ஏற்கனவே சில மாதங்களுக்கு முன்னதாக பெறப்பட்ட பின்னலாடை ஏற்றுமதிக்கான ஆடைகளை பழைய விலையில் பெற்று விற்பது என்பது அமெரிக்க இறக்குமதியாளர்களுக்கு இயலாத விஷயமாகி விட்டது.
அதாவது கடந்த இரு மாதங்களுக்கு முன்னர் திருப்பூரில் இருந்து இறக்குமதி செய்யும் பின்னலாடை ஒன்றை 10 டாலருக்கு விற்ற ஒரு இறக்குமதியாளர், ட்ரம்ப் விதித்த 50 சதவீத வரி காரணமாக, இன்று முதல் அதை 16 முதல் 18 டாலர் மதிப்பில் தான் விற்க முடியும் என்ற நிலைக்கு தள்ளப்பட்டு உள்ளனர். இதனால், இந்திய பின்னலாடை துணிகளை இறக்குமதி செய்யாமல் நிறுத்தி வைத்துள்ளனர். ஒரு பக்கம் அமெரிக்க ஏற்றுமதியாளர்களுக்கு சிக்கல் ஏற்பட்டு உள்ளது போல, திருப்பூர் பின்னலாடை ஏற்றுமதியாலர்களுக்கும் சிக்கல் ஏற்பட்டு உள்ளது.
இதையும் படிங்க: 75 கிலோவில் கொழுக்கட்டை படையல்.. திருச்சி மலைக்கோட்டையில் கஜபூஜையுடன் தொடங்கியது சதுர்த்தி விழா!
திருப்பூர் பின்னலாடை நிறுவனங்களில் இதன்மூலம் தினசரி 500 கோடி ரூபாய் முதல் 700 கோடி ரூபாய் உடனடி இழப்பு ஏற்படும் என்று திருப்பூர் ஏற்றுமதியாளர்கள் தெரிவிக்கின்றனர். ‘அமெரிக்காவின் 50 சதவீத அதீத வரி திருப்பூர் பின்னலாடைத்தொழிலை நேரடியாக பாதிப்புக்கு ஆளாக்கும் என்பது உண்மை. சில நிறுவனங்கள் நேரடியாகவும், சில நிறுவனங்கள் மறைமுகமாகவும் பாதிக்கப்படுவார்கள். ஏற்கனவே கொடுத்த ஆடர்களை செய்ய வேண்டாம் என நிறுத்தி விட்டார்கள்.
மேலும் ஏற்கனவே பாதி உற்பத்தியில் இருக்கக்கூடிய ஆடைகள் நிலை குறித்து இறக்குமதி வர்த்தகர்களிடம் பேசி வருகிறோம், இருதரப்பும் இந்த வரிவிதிப்பால் ஏற்படும் இழப்பை பரஸ்பரம் எவ்வாறு பகிர்ந்து கொள்வது என்று பேசி வருகிறோம். இந்த நிலை நீடித்தால் மாதந்தோறும் 2 ஆயிரம் கோடி ரூபாய் அளவுக்கு வர்த்தக இழப்பு ஏற்படும். மாற்றுச்சந்தைகளை தேடும் வரை இந்த நிலை நீடிக்கக்கூடும்.
திருப்பூரில் 30 முதல் 40 சதவீதம் வரை அமெரிக்க ஆர்டர்களை நம்பி இருக்கும் நிறுவனங்கள் இந்த நிலை நீடிக்கும் பட்சத்தில் தாக்குப்பிடிப்பது மிகவும் கடினமாக இருக்கும். வேறு சந்தைகளை நாடி அதில் வர்த்தக மேம்பாட்டை நிலைப்படுத்த குறைந்தபட்சம் ஆறு மாதம் முதல் ஒரு வருட காலம் எடுக்கும் அதுவரை தாக்குப் பிடிக்கும் நிறுவனங்கள் நிலைத்து நிற்கும். ஆனால் அனைத்து நிறுவனங்களும் தாக்குப் பிடிக்கும் என்று கூற முடியாது. அடுத்த ஒரு சில மாதங்களில், அமெரிக்க ஆர்டர்களை மட்டும் நம்பி இருக்கும் நூற்றுக்கு மேற்பட்ட நிறுவனங்கள் மூடப் படலாம்.
ஆனாலும் ஏற்கனவே திருப்பூருக்கு தொழிலாளர்கள் பற்றாக்குறை இருப்பதால் அங்கு வேலையில் சந்திக்கும் தொழிலாளர்கள் மாற்று நிறுவனங்களில் வேலைக்கு சேர்வதற்கான வாய்ப்பு உள்ளது. அமெரிக்கா நம் மீது விதித்துள்ள வரியால் போட்டி நாடுகளுக்கு சாதகமாக அமையும். திருப்பூரின் ஏற்றுமதி பாதிக்கப்படும். புதிய நாடுகளுடன் வரியில்லா ஒப்பந்தம் மேற்கொள்வது, அமெரிக்காவுடன் இந்த வரியை நீக்க பேச்சுவார்த்தை நடத்துவது போன்ற விஷயங்கள் நடைபெற வேண்டும். அரசு சலுகைகளும் வழங்க வேண்டும். அதுவரை தாக்குப்பிடிக்க வேண்டிய கட்டத்தில் இருக்கிறோம் என்கின்றனர் ஏற்றுமதியாளர்கள்.
இதையும் படிங்க: விநாயகர் சதுர்த்தி கொண்டாடுவது உரிமை ஆனா... கட் அண்ட் கறாராக கட்டுப்பாடுகளை விதித்த மதுரை ஐகோர்ட்...!