தமிழக சட்டமன்றத் தேர்தலில் அதிமுக பெரும் தோல்வியைச் சந்தித்த பிறகு கட்சியில் ஏற்பட்ட உடைவு மற்றும் அதனைத் தொடர்ந்து நடைபெறும் பேச்சுவார்த்தைகள் தமிழக அரசியலை பரபரப்பாக்கியுள்ளன. எடப்பாடி கே. பழனிச்சாமி தலைமையிலான ஒரு அணியும், முன்னாள் அமைச்சர்கள் எஸ்.பி. வேலுமணி மற்றும் சி.வி. சண்முகம் தலைமையிலான மற்றொரு அணியும் இடையே ஏற்பட்ட பிளவு, கட்சியை இரண்டாக உடைத்தது.

இந்தப் பிளவு தற்காலிகமானதா அல்லது நிரந்தரமானதா என்பது குறித்து தற்போது தீவிரமான விவாதங்கள் இருந்து வந்தன. தேர்தல் முடிவுகளுக்குப் பிறகு அதிமுக எம்எல்ஏக்கள் இரு தரப்பாகப் பிரிந்தனர். ஈபிஎஸ் தரப்புக்கு சுமார் 22 எம்எல்ஏக்களும், வேலுமணி-சண்முகம் தரப்புக்கு 25 எம்எல்ஏக்களும் ஆதரவு இருந்ததாகக் கூறப்படுகிறது. நம்பிக்கை வாக்கெடுப்பின்போது வேலுமணி தரப்பினர் தமிழக வெற்றிக் கழக அரசுக்கு ஆதரவு அளித்தனர்.

இதனால் ஈபிஎஸ் தரப்பு அவர்கள் மீது கட்சித் தாவல் தடைச் சட்டத்தின் கீழ் நடவடிக்கை எடுக்கக் கோரி சபாநாயகரிடம் மனு அளித்தது. மேலும், வேலுமணி, சண்முகம் உள்ளிட்டோரை கட்சிப் பதவிகளிலிருந்து நீக்கியும் ஈபிஎஸ் அறிவித்தார். பல கட்ட ஆலோசனைகளுக்கு பிறகு மீண்டும் எடப்பாடி பழனிச்சாமி தரப்பும் வேலுமணி தரப்பும் இணைய உள்ளதாக தெரிகிறது. அதிமுக இது தொடர்பாக கருத்து தெரிவித்திருக்கிறது.

இதையும் படிங்க: MGR, ஜெயலலிதா படங்களை வைக்கக் கூட அனுமதிக்காதவர் EPS..! அமைச்சர் செங்கோட்டையன் சரமாரி குற்றச்சாட்டு..!

" எனக்கு பின்னாலும் இன்னும் எத்தனை நூற்றாண்டுகள் ஆனாலும் அனைத்திந்திய அண்ணா திராவிட முன்னேற்ற கழகம் மக்களுக்காகவே இயங்கும் “ என்று மறைந்த முதலமைச்சர் ஜெயலலிதா தெரிவித்ததை சுட்டிக்காட்டி உள்ளது. கோடான கோடி தொண்டர்களின் தியாகத்தால் வளர்ந்த இந்த எஃகு கோட்டையை இனி எவராலும் அசைக்க முடியாது என்றும் கூறி உள்ளது.இனி நமக்குள் பிரிவில்லை என்றும் இந்த எஃகு கோட்டையை தகர்க்க இனி எவருக்கும் வழியில்லை எனவும் தெரிவிக்கப்பட்டிருக்கிறது. கோட்டையில் மீண்டும் நமது இரட்டை இலை கொடி பறப்பது மட்டுமே நமது இலக்கு என்றும் கூறியுள்ளது.

இதையும் படிங்க: தவெகவில் இசக்கி சுப்பையா மாஸ் ENTRY..! ராஜினாமா ஏற்ற உடனே TWIST..! பிளக்கும் அதிமுக..!