தமிழ்நாட்டில் 2026 சட்டமன்றத் தேர்தலை முன்னிட்டு, ஆளும் திராவிட முன்னேற்றக் கழகம் தனது தேர்தல் அறிக்கையை மக்களின் உண்மையான தேவைகளை அடிப்படையாகக் கொண்டு தயாரிக்கும் நோக்கில் புதிய முயற்சியை மேற்கொண்டுள்ளது. இதற்காக பொதுமக்களிடமிருந்து நேரடியாகக் கருத்துகளைச் சேகரிக்கும் வகையில் ஒரு பிரத்யேக மொபைல் செயலியை உருவாக்கியுள்ளது திமுக. இந்தச் செயலியை தமிழக முதலமைச்சரும், திமுக தலைவருமான மு.க. ஸ்டாலின் இன்று சென்னை அண்ணா அறிவாலயத்தில் நடைபெற்ற நிகழ்ச்சியில் தொடங்கி வைத்தார்.

இந்த முயற்சி திமுகவின் தேர்தல் அறிக்கை தயாரிப்பில் ஒரு மைல்கல்லாகக் கருதப்படுகிறது. ஏனெனில், இதுவரை எந்தக் கட்சியும் தேர்தல் அறிக்கைக்காக தனிப்பயன் மொபைல் செயலியை அறிமுகம் செய்ததில்லை என்று கட்சி வட்டாரங்கள் தெரிவிக்கின்றன. தேர்தல் அறிக்கையில் இடம்பெற வேண்டிய திட்டங்கள், நலத்திட்டங்கள், கொள்கைகள் குறித்து பொதுமக்கள் தங்களது யோசனைகளையும் கோரிக்கைகளையும் இந்தச் செயலி மூலம் எளிதாகத் தெரிவிக்க முடியும்.

இது வெறும் வாக்குறுதிகளாக இல்லாமல், மக்களின் உண்மையான எதிர்பார்ப்புகளைப் பிரதிபலிக்கும் அறிக்கையை உருவாக்க உதவும் என்று திமுக நம்பிக்கை தெரிவித்துள்ளது.திமுகவின் தேர்தல் அறிக்கை தயாரிப்புக் குழு, கட்சியின் துணைப் பொதுச்செயலாளரும் நாடாளுமன்ற உறுப்பினருமான கனிமொழி தலைமையில் செயல்படுகிறது. இக்குழு ஏற்கெனவே மாவட்டங்கள் தோறும் சுற்றுப்பயணம் மேற்கொண்டு பல்வேறு தரப்பினரிடம் கருத்துகளைக் கேட்டு வருகிறது. ஜனவரி 9 முதல் இந்தச் சுற்றுப்பயணம் தீவிரமடையும் என்று எதிர்பார்க்கப்படுகிறது. இந்நிலையில், செயலி மூலம் டிஜிட்டல் வழியில் கருத்துகளைச் சேகரிப்பது பரந்துபட்ட மக்கள் பங்களிப்பை உறுதி செய்யும் என்று கட்சி நிர்வாகிகள் கூறுகின்றனர்.

இதையும் படிங்க: திராவிடம் எங்கே இருக்கிறது..? இப்படி பேசியவர் தான் திருமா... இப்ப என்னமோ..! சீமான் காட்டம்...!

இந்தச் செயலி தவிர, வாட்ஸ்அப் எண் மற்றும் சமூக வலைதளக் கணக்குகளையும் தேர்தல் அறிக்கைக் குழு அறிமுகம் செய்துள்ளது. இவை அனைத்தும் மக்களின் கருத்துகளை எளிதில் பதிவு செய்யவும், ஆய்வு செய்து அறிக்கையில் இணைக்கவும் உதவும். இந்தப் புதிய செயலி அறிமுகம் தமிழக அரசியலில் டிஜிட்டல் ஜனநாயகத்தின் அடுத்த கட்டமாகப் பார்க்கப்படுகிறது. பொதுமக்கள் இந்த வாய்ப்பைப் பயன்படுத்தி தங்களது கருத்துகளைத் தெரிவிப்பதன் மூலம் தேர்தல் அறிக்கையை வலுப்படுத்த முடியும் என்பது திமுகவின் எதிர்பார்ப்பு.

இதையும் படிங்க: நாங்க பாவமில்லையா? மயானத்தில் கவன ஈர்ப்பு ஆர்ப்பாட்டம் நடத்திய தூய்மை பணியாளர்கள்...!