கோவையில் இன்று நடைபெற்ற கட்சி நிர்வாகிகள் கூட்டத்தில் உரையாற்றிய முதலமைச்சர் மு.க. ஸ்டாலின், மேற்கு மண்டலத் தொகுதிகளில் வெற்றி பெறுவதற்கான முக்கிய வியூகங்களை வகுத்துக் கொடுத்தார். கடந்த நாடாளுமன்றத் தேர்தலில் இப்பகுதியில் கிடைத்த மாபெரும் வெற்றியைச் சட்டமன்றத் தேர்தலிலும் உறுதி செய்ய வேண்டும் என அவர் வலியுறுத்தினார்.

ஒருவரின் வீட்டிற்கு நேரடியாகச் சென்று வாக்குக் கேட்கிறப் பிரசாரத்திற்கு, வேறு எந்த நவீனத் தொழில்நுட்பமும் ஈடாகாது. தேர்தலுக்கு முன்பாக ஒவ்வொரு வாக்காளரையும் குறைந்தபட்சம் 5 முறையாவது நேரில் சந்தித்து நம் அரசின் சாதனைகளை விளக்க வேண்டும் என அவர் உத்தரவிட்டார். கடந்த எம்பி தேர்தலில் மேற்கு மண்டலத்தில் மக்கள் நமக்கு அளித்த ஆதரவு வரலாறு காணாதது. அதே எழுச்சியைச் சட்டமன்றத் தேர்தலிலும் கொண்டு வர வேண்டும். எங்குப் பார்த்தாலும் உதயசூரியன் மட்டுமே ஒளிர வேண்டும்" எனத் தொண்டர்களை உற்சாகப்படுத்தினார்.

கோவையில் ₹300 கோடியில் கட்டப்பட்டுள்ள பெரியார் அறிவுலகம், புதிதாகத் திறக்கப்பட்டுள்ள குறுச்சி - குனியமுத்தூர் பாதாளச் சாக்கடைத் திட்டம், மற்றும் இளைஞர்களுக்கு வேலைவாய்ப்பை வழங்கும் ஐடி பூங்காக்கள் எனத் திமுக அரசு கோவைக்குச் செய்துள்ள நீண்டகாலத் திட்டங்களை அவர் பட்டியலிட்டார்.
அதிமுக மற்றும் அதன் கூட்டணி குறித்துப் பேசிய அவர், திமுக கூட்டணியை விமர்சிப்பவர்கள், தற்போது இருக்கும் எதிர்க்கட்சிக் கூட்டணியை ஒரு சர்க்கஸ் கூடாரம் என்றுதான் சொல்ல வேண்டும். கொள்கையற்ற அந்தக் கூட்டணிகளை மக்கள் ஒருபோதும் ஏற்க மாட்டார்கள் என தாக்கிப் பேசினார்.

இதையும் படிங்க: கோவையில் ₹300 கோடியில் பெரியார் அறிவுலகம்.. 3D கோளரங்கத்தை ஆய்வு செய்த முதல்வர் ஸ்டாலின்!

மக்களைச் சந்திக்கும் போது நாம் பொறுமையுடன் செயல்பட வேண்டும். ஒவ்வொரு வீட்டிலும் நமது 'திராவிட மாடல்' அரசின் பயனை அடைந்த குடும்பங்கள் உள்ளனர். அவர்களை நமது நிரந்தர வாக்காளர்களாக மாற்ற வேண்டியது உங்கள் பொறுப்பு என்றார்.

2026 தேர்தலில் 200-க்கும் மேற்பட்டத் தொகுதிகளைக் கைப்பற்ற வேண்டும் என்ற இலக்கை நோக்கித் திமுக நகர்ந்து வரும் நிலையில், கோவையில் முதல்வரின் இந்தப் பேச்சு அக்கட்சியினரிடையே பெரும் உற்சாகத்தை ஏற்படுத்தியுள்ளது.

இதையும் படிங்க: கோவையில் சந்திரயான் மாதிரி சிலை திறப்பு...! இஸ்ரோ விஞ்ஞானி மயில்சாமி அண்ணாதுரை பெருமிதம்!