விழுப்புரம் மாவட்டம் செஞ்சி அடுத்த ஆலம்பூண்டி கிராமத்தைச் சேர்ந்த வடிவேலு-பவானி தம்பதியினரின் இரண்டாவது மகள் 7 வயது சிறுமி ஹேமாவதி (ஹேமலதா) காணாமல் போய் இன்றுடன் 18 நாட்கள் ஆகின்றன.

கடந்த அக்டோபர் 11ஆம் தேதி இரவு தனது பிறந்தநாளைக் குடும்பத்தினருடன் கொண்டாடிய சிறுமி, மறுநாள் அதிகாலை வீட்டில் தூங்கியபோது மாயமானதாகப் பெற்றோர் புகார் அளித்தனர். சத்தியமங்கலம் போலீசார் வழக்குப் பதிவு செய்து 10க்கும் மேற்பட்ட தனிப்படைகளை அமைத்து தேடியும் எந்தத் துப்பும் கிடைக்காததால், வழக்கு சி.பி.சி.ஐ.டி.க்கு மாற்றப்பட்டது.⁠

சி.பி.சி.ஐ.டி. துணைப் போலீஸ் சூப்பிரண்டுகள் கீதா மற்றும் வேல்முருகன் தலைமையில் ஐந்து தனிப்படைகள் அமைக்கப்பட்டு தீவிர விசாரணை நடைபெற்று வருகிறது. ஆலம்பூண்டியில் உள்ள பள்ளியில் தற்காலிக விசாரணை மையம் அமைக்கப்பட்டு, சிறுமியின் தாய், தந்தை, பாட்டி, சகோதரி, உறவினர்கள் மற்றும் அக்கம்பக்கத்தினரிடம் விசாரணை நடத்தப்பட்டது.

இதையும் படிங்க: ராணிப்பேட்டையில் சாலையோரத்தில் தூங்கிய குழந்தை மாயம்! 6 தனிப்படை தேடுதலுக்கு பின் ஆந்திராவில் மீட்பு!

சரித்திரப் பதிவேடு குற்றவாளி ஒருவரைச் சந்தேகத்தின் பேரில் பிடித்து ஆறு மணி நேரம் விசாரித்தும் தகவல் கிடைக்கவில்லை. சிறுமி படித்த பள்ளிக்குச் சென்று வருகைப் பதிவேட்டை ஆய்வு செய்ததோடு, ஆசிரியர்களிடமும் விசாரணை நடத்தப்பட்டது. திருவண்ணாமலை மாவட்டம் கீழ்பெண்ணாத்தூரில் உள்ள சகோதரியின் கல்லூரிக்கும் சென்று தோழிகளிடம் விசாரணை மேற்கொள்ளப்பட்டது.

சந்தேகத்தின் பேரில் இரு இளைஞர்களிடமும் விசாரணை நடந்தது. சிறுமியின் உறவினர்கள் சிலர் பெங்களூரில் இருப்பது தெரியவந்ததால், சி.பி.சி.ஐ.டி. குழுவினர் அங்கு விரைந்துள்ளனர்.⁠

இந்த நிலையில் சிறுமியின் தாய் பவானி, கிராமத்தில் உள்ள சிவன் கோவிலுக்குச் சென்று பூ போட்டுப் பார்த்ததாகவும், குழந்தை உயிருடன் இருக்கிறது எனக் கூறப்பட்டதாகவும் நம்பிக்கை தெரிவித்துள்ளார்.

“எங்கள் குழந்தை உயிருடன் எங்களிடம் வந்து சேரும் என்ற நம்பிக்கையுடன் இருக்கிறோம். போலீசார் இன்னும் இரண்டு-மூன்று நாட்களில் நல்ல தகவல் சொல்வதாகக் கூறியுள்ளனர்,” என அவர் நிருபர்களிடம் தெரிவித்தார்.

கோவில் பூசாரி சுந்தரமூர்த்தி, விபூதி மற்றும் குங்குமம் மூலம் குழந்தை கிடைக்கும் என வந்ததாகக் கூறியுள்ளார். சிறுமி மாயமான வழக்கு தொடர்ந்து மர்மமாக நீடித்து வருகிறது.

இதையும் படிங்க: செஞ்சி சிறுமி எங்கே?... தாய் கொடுத்த முக்கிய துப்பு... பள்ளிக்குள் நுழைந்த சிபிசிஐடி...!