ஆன்லைனில் குழந்தைகளை பாலியல் ரீதியாக துன்புறுத்தும் உள்ளடக்கங்களை கண்டறிந்து நடவடிக்கை எடுப்பதில் முக்கிய மாற்றத்தை கூகுள் அறிவித்துள்ளது. இந்தியாவுடன் தொடர்ந்து நடத்தப்பட்ட பேச்சுவார்த்தைகளின் அடிப்படையில், குழந்தைகள் பாலியல் துஷ்பிரயோகத்துடன் தொடர்புடைய தகவல்களை இந்திய அதிகாரிகளிடம் நேரடியாக வழங்குவதற்கான நடைமுறையை செயல்படுத்த கூகுள் முன்வந்துள்ளது.
குழந்தைகளை குறிவைத்து உருவாக்கப்படும் பாலியல் துஷ்பிரயோக உள்ளடக்கங்கள் சமூக வலைதளங்கள் மற்றும் இணைய தளங்களில் பரவுவது சர்வதேச அளவில் பெரும் பிரச்சினையாக இருந்து வருகிறது. இதுபோன்ற உள்ளடக்கங்களை கண்டறிந்து நீக்குவதுடன், சம்பந்தப்பட்ட தகவல்களை சட்ட அமலாக்க அமைப்புகளிடம் கொண்டு செல்வதும் முக்கியமானதாக உள்ளது.
இதுவரை அமெரிக்காவை தலைமையிடமாகக் கொண்ட தொழில்நுட்ப நிறுவனங்கள், குழந்தைகள் பாலியல் துஷ்பிரயோக உள்ளடக்கம் தொடர்பான தகவல்களை முதலில் அமெரிக்காவின் National Center for Missing & Exploited Children (NCMEC) அமைப்பிடம் அளிக்கும் நடைமுறை இருந்து வந்தது. அந்த அமைப்பு பின்னர் சம்பந்தப்பட்ட நாடுகளின் சட்ட அமலாக்க அதிகாரிகளுக்கு தகவல்களை அனுப்பும்.
இதையும் படிங்க: கூகுளுக்கு ரூ.4,435 கோடி அபராதம்! ‘ரகசிய கண்காணிப்பு’ அம்பலம்? தனியுரிமை விதிமீறலில் ஐரோப்பா அதிரடி!
இந்த நடைமுறையில் ஏற்படும் தாமதம், குழந்தைகள் உடனடி ஆபத்தில் இருக்கும் சில சூழல்களில் விசாரணை நடவடிக்கைகளை பாதிக்கக்கூடும் என இந்திய அதிகாரிகள் கவலை தெரிவித்துள்ளனர். இதையடுத்து இந்தியாவுடன் நேரடி தகவல் பகிர்வு தொடர்பான நடைமுறையை கூகுள் முன்னெடுக்கிறது.
கூகுள் வெளியிட்ட தகவலில், குழந்தைகள் பாலியல் துஷ்பிரயோகத்தை எதிர்த்து தொடர்ந்து பணியாற்றி வருவதாகவும், இதுபோன்ற உள்ளடக்கங்களை கண்டறிந்து, தடுத்து, அகற்றி, புகார் அளிப்பதற்காக கணிசமான முதலீடுகளை செய்து வருவதாகவும் தெரிவிக்கப்பட்டுள்ளது. மேலும், இந்திய சைபர் குற்ற ஒருங்கிணைப்பு மையமான I4C-க்கு தேவையான தகவல்களை வழங்குவதற்கான நடைமுறையை செயல்படுத்துவது குறித்து இந்திய அரசுடன் பேச்சுவார்த்தை நடத்தி வருவதாகவும் நிறுவனம் தெரிவித்துள்ளது.
கூகுளின் இந்த முடிவு, இதேபோன்ற நேரடி புகார் நடைமுறையை மெட்டா நிறுவனம் அறிவித்த சில நாட்களுக்குப் பிறகு வெளியாகியுள்ளது. மெட்டாவும் குழந்தைகள் பாதுகாப்பு தொடர்பான விவகாரங்களை I4C-க்கு நேரடியாக தெரிவிக்க ஒப்புக்கொண்டுள்ளது.
இந்தியாவில் ஆன்லைன் குழந்தைகள் பாதுகாப்பு தொடர்பான கண்காணிப்பு மற்றும் நடவடிக்கைகளை விரைவுபடுத்துவதில் இந்த புதிய தகவல் பகிர்வு நடைமுறை முக்கியத்துவம் பெறுகிறது.
இதையும் படிங்க: 12 வயது பேரனுக்கு பாலியல் தொல்லை கொடுத்த பாட்டி! 2 ஆண்டுகளாக நடந்த கொடூரம்! அதிர்ந்த பெற்றோர்!