தமிழகத்தில் நடைபெற்ற மதுராந்தகம், தாராபுரம் சட்டமன்ற இடைத்தேர்தல்களின் முடிவுகள் இன்று வெளியாக உள்ள நிலையில், வாக்கு எண்ணும் பணி தொடங்கியது. சரியாக காலை 8 மணிக்கு தபால் வாக்குகளை எண்ணும் பணி தொடங்கியது. 

தாராபுரம் கள நிலவரம்: 

திருப்பூர் மாவட்டத்தில் உள்ள எல்ஆர்ஜி அரசு கலைக் கல்லூரியில் தாராபுரம் தொகுதியின் வாக்குகள் எண்ணப்படுகின்றன. கடந்த 6-ஆம் தேதி நடைபெற்ற இந்தத் தேர்தலில், மொத்தம் 2,23,000-க்கும் மேற்பட்ட வாக்காளர்களில் சுமார் 1,79,000 பேர் வாக்களித்துள்ளனர். இதன் மூலம் சுமார் 80.25 சதவீத வாக்குகள் பதிவாகியுள்ளன.

இதையும் படிங்க: மதுராந்தகம், தாராபுரத்தை விடுங்க... கடந்த 25 வருஷ இடைத்தேர்தல் முடிவுகள் எப்படியிருந்தது தெரியுமா?

வாக்கு எண்ணிக்கை மையத்தைச் சுற்றி மூன்றடுக்கு பாதுகாப்பு ஏற்பாடுகள் செய்யப்பட்டுள்ளன. ஆயிரத்துக்கும் மேற்பட்ட போலீசார் பாதுகாப்புப் பணியில் ஈடுபடுத்தப்பட்டுள்ளனர்.

தாராபுரம் தொகுதியில் பதிவான வாக்குகள் அடங்கிய மின்னணு வாக்குப்பதிவு இயந்திரங்கள், கடந்த 6-ஆம் தேதி இரவே வாக்கு எண்ணிக்கை மையத்துக்குக் கொண்டு வரப்பட்டன. அவை வைக்கப்பட்டிருந்த அறைகள் மின்சாரம் துண்டிக்கப்பட்டு, முழுமையாகச் சீல் வைக்கப்பட்டன.

இன்று காலை  ஸ்ட்ராங் ரூம் எனப்படும் பாதுகாப்பு அறையின் சீல் அகற்றப்பட்டு, வாக்குப்பதிவு இயந்திரங்கள் எண்ணிக்கை மையத்துக்குக் கொண்டு வரப்பட்டன. சரியாக 8 மணிக்கு வாக்கு எண்ணும் பணிகள் தொடங்கிய நிலையில், தபால் வாக்குகள் எண்ணப்பட்டு வருகிறது. 

தாராபுரம் தொகுதியில் வாக்கு எண்ணிக்கைக்காக மொத்தம் 16 மேசைகள் அமைக்கப்பட்டுள்ளன. இதில் 14 மேசைகளில் மின்னணு வாக்குப்பதிவு இயந்திரங்களில் பதிவான வாக்குகளும், இரண்டு மேசைகளில் தபால் வாக்குகளும் எண்ணப்பட உள்ளன.

தாராபுரம் தொகுதியில் 1,379 தபால் வாக்குகள் பதிவாகியுள்ளதாகத் தெரிவிக்கப்பட்டுள்ளது. இதில் காவல்துறையினர், ஊர்க்காவல் படையினர் மற்றும் அரசு ஊழியர்களின் வாக்குகளும் அடங்கும்.

காலை 7.30 மணி முதல் தபால் வாக்குகள் தொடர்பான பணிகள் தொடங்கும். வாக்குகள் தலா 500 எனப் பிரிக்கப்பட்டு, அவற்றில் வாக்காளர்களின் விவரங்கள் சரியாக உள்ளனவா, வாக்குகள் முறையாகப் பதிவு செய்யப்பட்டுள்ளனவா, செல்லாத வாக்குகள் உள்ளனவா என்பன போன்றவை சரிபார்க்கப்படும். அதன் பின்னர் தபால் வாக்குகள் எண்ணப்படும்.’

மதுராந்தகம் நிலவரம்: 

மதுராந்தகம் சட்டமன்றத் தொகுதியில் நடைபெற்ற இடைத்தேர்தலுக்கான வாக்கு எண்ணிக்கை தொடங்கி நடைபெற்று வருகிறது. செங்கல்பட்டு அருகே ஆத்தூர் பகுதியில் உள்ள சமூக மேம்பாட்டிற்கான ஒருங்கிணைந்த பயிற்சி மைய வளாகத்தில் வாக்கு எண்ணிக்கை நடைபெற உள்ளது. காலை 8 மணிக்கு வாக்கு எண்ணிக்கை தொடங்கியது.

மதுராந்தகம் தொகுதியில் மொத்தம் 1,84,423 வாக்குகள் பதிவாகியுள்ளன. இதற்காக 285 வாக்குச்சாவடிகள் அமைக்கப்பட்டிருந்தன. தேர்தலின்போது 684 பேலட் யூனிட்கள், 342 கட்டுப்பாட்டு யூனிட்கள் மற்றும் 370 விவிபேட் இயந்திரங்கள் பயன்படுத்தப்பட்டன.

வாக்குப்பதிவு முடிந்ததும், மின்னணு வாக்குப்பதிவு இயந்திரங்கள் பலத்த போலீஸ் பாதுகாப்புடன் ஆத்தூரில் உள்ள வாக்கு எண்ணிக்கை மையத்துக்குக் கொண்டுவரப்பட்டன.

வாக்கு எண்ணிக்கைக்காக இரண்டு மேசைகள் தபால் வாக்குகளுக்கும், 14 மேசைகள் மின்னணு வாக்குப்பதிவு இயந்திரங்களில் பதிவான வாக்குகளை எண்ணுவதற்கும் அமைக்கப்பட்டுள்ளன.

மொத்தம் 21 சுற்றுகளாக வாக்குகள் எண்ணப்பட உள்ளன. வாக்கு எண்ணிக்கை மையத்தில் மூன்று அடுக்கு பாதுகாப்பு ஏற்பாடுகள் செய்யப்பட்டுள்ளன. மத்திய ஆயுதக் காவல் படையைச் சேர்ந்த 70 பேரும், தமிழக காவல்துறையைச் சேர்ந்த 200-க்கும் மேற்பட்ட காவலர்களும் பாதுகாப்புப் பணியில் ஈடுபடுத்தப்பட்டுள்ளனர்.

இதையும் படிங்க: இடைத்தேர்தல் வாக்குப்பதிவு ஓவர்..! EVM மெஷின்களுக்கு சீல்..! பலத்த பாதுகாப்பு..!