தமிழகத்தில் சென்னை மெட்ரோ ரயில் இரண்டாம் கட்ட விரிவாக்கப் பணிகள் உள்ளிட்ட பல்வேறு மக்கள் நலத் திட்டங்களைத் தொடங்கி வைத்தும், முக்கிய நிகழ்வுகளில் பங்கேற்றும் தனது ஒரு நாள் அரசுமுறைப் பயணத்தை வெற்றிகரமாக நிறைவு செய்த பாரதப் பிரதமர் நரேந்திர மோடி, சிறப்பு விமானம் மூலம் மீண்டும் டெல்லிக்குப் புறப்பட்டுச் சென்றார்.

இன்று காலை சென்னை வருகை தந்த பிரதமர் நரேந்திர மோடிக்கு விமான நிலையத்தில் உற்சாக வரவேற்பு அளிக்கப்பட்டது. தொடர்ந்து, சென்னை ஐஐடி மூளை ஆராய்ச்சி மையப் பணிகளைப் பார்வையிட்ட அவர், நந்தம்பாக்கம் வர்த்தக மையத்தில் நடைபெற்ற ஜெய்கோபால் கரோடியா இந்து வித்யாலய பள்ளியின் 50-வது பொன்விழா ஆண்டு நிகழ்வில் பங்கேற்றுப் புதிய செயற்கை நுண்ணறிவு ஆய்வகத்தைத் திறந்து வைத்தார்.

அதே மேடையில், சென்னை மெட்ரோ இரண்டாம் கட்டத் திட்டத்தின் வடபழனி - பூந்தமல்லி வரையிலான வழித்தடம் உள்ளிட்ட சுமார் ரூ.13,000 கோடி மதிப்பிலான முடிவுற்ற புதிய திட்டங்களைத் தொடங்கி வைத்தும், பல்வேறு வளர்ச்சிப் பணிகளுக்கு அடிக்கல் நாட்டியும் சிறப்புப் பேருரையாற்றினார். இவ்விழாவில் தமிழக ஆளுநர் ஆர்.வி. அர்லேகர், முதலமைச்சர் ச. ஜோசப் விஜய், மத்திய இணை அமைச்சர் எல். முருகன் உள்ளிட்டோர் கலந்துகொண்டனர்.

இதையும் படிங்க: அரசு விழாவில் நயினார் நாகேந்திரன் எப்படி உட்காரலாம்? காங்கிரஸ் எம்பி மாணிக்கம் தாகூர் கேள்வி!

நிகழ்ச்சிகள் அனைத்தும் இனிதே நிறைவடைந்ததைத் தொடர்ந்து, மாலையில் சென்னை மீனம்பாக்கம் விமான நிலையத்திற்கு வருகை தந்த பிரதமர் நரேந்திர மோடி, அங்கிருந்து இந்திய விமானப் படையின் தனி விமானம் மூலம் டெல்லிக்குப் புறப்பட்டார்.

முன்னதாக, சென்னை விமான நிலையத்தில் பிரதமருக்குத் தமிழ்நாடு அரசின் சார்பில் முதலமைச்சர் ச. ஜோசப் விஜய் நேரில் சென்று சால்வை அணிவித்து, கைகுலுக்கி மரியாதை நிமித்தமாக வழியனுப்பி வைத்தார். அமைச்சர்கள், உயர் அதிகாரிகள் மற்றும் முக்கிய பிரமுகர்களும் இந்நிகழ்வில் உடனிருந்தனர்.

இதையும் படிங்க: ஆலயம் முதல் மெட்ரோ வரை... இதுதான் பாரதத்தின் அனுபவம்! பிரதமர் மோடி புகழாரம்!