2026 சட்டமன்றத் தேர்தல் நெருங்க நெருங்க, தமிழ்நாட்டில் கூட்டணிக் கட்சிகளுக்குள் சீட் பங்கீடு போர் தொடங்கிவிட்டது. இந்த நிலையில் காங்கிரஸ் கட்சி தரப்பில் பகிரங்கமாகவே “அதிக தொகுதிகளும், ஆட்சி அமைந்தால் அமைச்சர் பதவிகளும் வேண்டும்” என்று குரல் கொடுத்திருக்கிறது.

கன்னியாகுமரி மாவட்ட காங்கிரஸ் நிர்வாகிகள் ஆலோசனைக் கூட்டம் நேற்று நடைபெற்றது. கட்சியின் மத்திய பார்வையாளர் அனில் போஸ், சட்டமன்றக் குழு தலைவர் ராஜேஷ் குமார் எம்.எல்.ஏ., பிரின்ஸ் எம்.எல்.ஏ., தாரகை கத்பட் உள்ளிட்டோர் பங்கேற்றனர்.

இக்கூட்டத்தில் பேசிய ராஜேஷ் குமார், “ராகுல் காந்தி தலைமையில் தமிழக காங்கிரஸை வலுப்படுத்த தீவிர முயற்சி நடக்கிறது. ஏற்கனவே வென்ற தொகுதிகள் தவிர, எந்தெந்த தொகுதிகளில் காங்கிரஸ் வெற்றி பெற முடியும் என்பதற்கான பட்டியல் தயாராகி வருகிறது. 

இதையும் படிங்க: 8 முறை எம்.எல்.ஏ!! ‘52 ஆண்டு வெற்றியாளர்’ செங்கோட்டையன் கடந்து வந்த பாதை!!

வரும் சட்டமன்றத் தேர்தலில் தி.மு.க. கூட்டணியில் எங்களுக்கு கூடுதல் தொகுதிகள் ஒதுக்க வேண்டும் என்று உறுதியாக கேட்போம். வெற்றி பெற்று ஆட்சி அமைத்தால் அமைச்சரவையில் காங்கிரஸுக்கு உரிய இடம் கிடைக்க வேண்டும் என்றும் வலியுறுத்துவோம்” என்று தெளிவாக அறிவித்தார்.

மேலும், “வாக்காளர் பட்டியல் சிறப்பு தீவிர சேர்-நீக்கம் பணியில் ஒவ்வொரு காங்கிரஸ் தொண்டரின் ஓட்டும் விடுபடாமல் பார்த்துக்கொள்ள வேண்டும்” என்று கட்சி நிர்வாகிகளுக்கு உத்தரவிட்டார்.

கடந்த 2021 தேர்தலில் 18 தொகுதிகளில் போட்டியிட்டு 18 இடங்களிலும் வென்ற காங்கிரஸ், இம்முறை 25-க்கும் மேல் தொகுதிகளையாவது குறி வைத்திருப்பதாக கட்சி வட்டாரங்கள் தெரிவிக்கின்றன. தி.மு.க. தரப்பில் இதுவரை இதுகுறித்து எந்த பதிலும் வரவில்லை. 2026 தேர்தல் கூட்டணி பேரம் இப்போதே தொடங்கிவிட்டது என்பதை காங்கிரஸ் எம்.எல்.ஏ.வின் இந்த பகிரங்க அறிவிப்பு உறுதிப்படுத்தியிருக்கிறது!

இதையும் படிங்க: மசோதாக்களை நிறுத்தி வச்சேனா? உண்மை என்னானு தெரியுமா? கவர்னர் - முதல்வர் சந்திப்பில் நடந்தவை என்ன?