இந்திய பிரதமர் நரேந்திர மோடி எத்தியோப்பியாவுக்கு அரசு முறை பயணம் மேற்கொண்டுள்ளார். இந்த பயணத்தின் போது, எத்தியோப்பிய பிரதமர் அபி அஹ்மத் அலி தனது காரில் மோடியை ஓட்டி அழைத்து சென்ற சம்பவம் உலக அரங்கில் பெரும் கவனத்தை ஈர்த்துள்ளது. இது 'கார் டிப்ளமசி' என அழைக்கப்படும் சிறப்பு அங்கீகாரமாக பார்க்கப்படுகிறது. 

பிரதமர் மோடி அடிஸ் அபாபா விமான நிலையத்தில் தரையிறங்கியதும், நோபல் அமைதி பரிசு வென்ற அபி அஹ்மத் அவரை நேரில் வரவேற்றார். வழக்கமான அரசு வாகனங்களுக்கு பதிலாக, அபி அஹ்மத் தனது சொந்த காரில் மோடியை அமர வைத்து ஹோட்டலுக்கு ஓட்டிச் சென்றார். இந்த சம்பவம், இரு நாட்டு தலைவர்களிடையேயான நெருக்கமான உறவை வெளிப்படுத்தியது. வழியில், அவர்கள் ஃப்ரெண்ட்ஷிப் பார்க் மற்றும் சயின்ஸ் மியூசியத்திற்கு திட்டமிடப்படாத நிறுத்தம் செய்தனர். அங்கு எத்தியோப்பிய காப்பி சுவைத்து, இரு நாட்டு உறவுகள் குறித்து உரையாடினர்.

இதையும் படிங்க: 100 நாள் வேலை பெயர் மாற்றத்துக்கு மோடியின் வெறுப்பே காரணம் - ராகுல்காந்தி குற்றச்சாட்டு

பிரதமர் மோடி எத்தியோப்பியாவுக்கு மேற்கொண்ட முதல் இருதரப்பு பயணம், இரு நாடுகளுக்கிடையேயான உறவை புதிய உச்சத்துக்கு கொண்டு சென்றுள்ளது. எத்தியோப்பிய பிரதமர் டாக்டர் அபி அஹ்மத் அலி அவர்களுடன் நடைபெற்ற உச்சி மட்ட பேச்சுவார்த்தையில், இரு நாடுகளும் தங்கள் உறவை 'மூலோபாய கூட்டாண்மை'யாக உயர்த்தியுள்ளன. இதன் மூலம், பொருளாதாரம், பாதுகாப்பு, கல்வி உள்ளிட்ட பல துறைகளில் ஒத்துழைப்பு வலுப்படும் என எதிர்பார்க்கப்படுகிறது.

இந்த பயணத்தின் உச்சகட்டமாக, பிரதமர் மோடிக்கு எத்தியோப்பியாவின் உயரிய விருதான 'கிரேட் ஆனர் நிஷான் ஆஃப் எத்தியோப்பியா' (The Great Honour Nishan of Ethiopia) வழங்கப்பட்டது. இந்த விருது, இரு நாடுகளுக்கிடையேயான உறவை வலுப்படுத்தியதற்கும், மோடியின் தொலைநோக்கு தலைமைக்கும் வழங்கப்பட்டது. இது மோடிக்கு வழங்கப்பட்ட 28வது வெளிநாட்டு அரசு விருது என்பது குறிப்பிடத்தக்கது. விழாவில் பேசிய மோடி, "இந்த விருது எனக்கு பெருமை அளிக்கிறது. இது இந்தியா-எத்தியோப்பியா உறவின் வலிமையை பிரதிபலிக்கிறது" என்றார். 

தொடர்ந்து இரு தலைவர்களும் 8 முக்கிய ஒப்பந்தங்கள் மற்றும் புரிந்துணர்வு உடன்படிக்கைகளில் கையெழுத்திட்டனர். இவை இரு நாடுகளின் ஒத்துழைப்பை விரிவுபடுத்தும் வகையில் அமைந்துள்ளன. முதலாவதாக, இரு நாடுகளுக்கிடையேயான உறவை மூலோபாய கூட்டாண்மையாக உயர்த்துதல். இரண்டாவதாக, சுங்க விவகாரங்களில் ஒத்துழைப்பு மற்றும் பரஸ்பர நிர்வாக உதவி தொடர்பான உடன்படிக்கை.

மூன்றாவதாக, எத்தியோப்பியா வெளியுறவு அமைச்சகத்தில் தரவு மையம் அமைப்பதற்கான புரிந்துணர்வு உடன்படிக்கை. நான்காவதாக, ஐ.நா. அமைதி காக்கும் செயல்பாடுகளில் பயிற்சி ஒத்துழைப்புக்கான செயல்படுத்தல் ஏற்பாடு. ஐந்தாவதாக, ஜி20 பொதுவான கட்டமைப்பின் கீழ் கடன் மறுசீரமைப்பு தொடர்பான புரிந்துணர்வு உடன்படிக்கை. இது எத்தியோப்பியாவின் பொருளாதார சவால்களை எதிர்கொள்ள உதவும். ஆறாவதாக, ஐசிசிஆர் உதவித்தொகை திட்டத்தின் கீழ் எத்தியோப்பிய மாணவர்களுக்கான உதவித்தொகையை இரட்டிப்பாக்குதல்.

ஏழாவதாக, ஐடெக் திட்டத்தின் கீழ் எத்தியோப்பிய மாணவர்கள் மற்றும் தொழில்முறை வல்லுநர்களுக்கு செயற்கை நுண்ணறிவில் சிறப்பு குறுகிய கால படிப்புகள் வழங்குதல். எட்டாவதாக, அடிஸ் அபாபாவில் உள்ள மகாத்மா காந்தி மருத்துவமனையின் திறனை விரிவுபடுத்துதல், குறிப்பாக தாய்மை சுகாதாரம் மற்றும் பிறந்த குழந்தை பராமரிப்பு துறைகளில் இந்தியா உதவி செய்யும். இந்த ஒப்பந்தங்கள், ஆப்பிரிக்காவில் இந்தியாவின் செல்வாக்கை வலுப்படுத்தும் என நிபுணர்கள் கருத்து தெரிவிக்கின்றனர்.

எத்தியோப்பியா, ஆப்பிரிக்க யூனியனின் தலைமையிடமாக இருப்பதால், இந்த பயணம் மூலம் இந்தியா ஆப்பிரிக்க கண்டத்துடன் உறவை மேம்படுத்துகிறது. மேலும், இரு நாடுகளும் ஐ.நா. அமைதி காக்கும் செயல்பாடுகளில் இணைந்து செயல்படுவது, உலக அமைதிக்கு பங்களிக்கும்.

பிரதமர் மோடி, எத்தியோப்பியாவின் வளர்ச்சி முயற்சிகளை பாராட்டினார். "எத்தியோப்பியாவின் வளர்ச்சி, ஆப்பிரிக்காவின் வளர்ச்சி" என்று கூறிய அவர், இந்தியா தொடர்ந்து ஆதரவு அளிக்கும் என உறுதியளித்தார். இந்த பயணம், இரு நாடுகளின் வரலாற்று உறவை புதுப்பித்துள்ளது. 1948 முதல் தூதரக உறவுகள் கொண்ட இவ்விரு நாடுகள், இப்போது புதிய அத்தியாயத்தை தொடங்கியுள்ளன.

இதையும் படிங்க: அனுபவம் வாய்ந்த ஒரு தலைவர் அவர்..!! சிவராஜ் பாட்டீல் மறைவுக்கு பிரதமர் மோடி இரங்கல்..!!