தமிழகத்தில் கடந்த தி.மு.க. ஆட்சிக் காலத்தில் தனியார் பள்ளிகளுக்கான அங்கீகாரம் மற்றும் தடையில்லா சான்றிதழ் வழங்குவதில் பெருமளவில் லஞ்சம் வசூலிக்கப்பட்டதாக தமிழ்நாடு தனியார் பள்ளிகள் சங்கம் பரபரப்பு குற்றச்சாட்டை முன்வைத்துள்ளது. அதே நேரத்தில், தற்போதைய தமிழக வெற்றிக் கழக ஆட்சியில் எந்தவித முறைகேடும் இல்லாமல் அனுமதிகள் வழங்கப்படுவதாகவும் அந்த அமைப்பு தெரிவித்துள்ளது.
தமிழ்நாடு நர்சரி, பிரைமரி, மெட்ரிக் மேல்நிலை மற்றும் சி.பி.எஸ்.இ. பள்ளிகள் சங்கத்தின் மாநில பொதுச்செயலர் நந்தகுமார் அளித்த பேட்டியில் பல்வேறு அதிர்ச்சி தகவல்களை வெளியிட்டுள்ளார்.
அவரது கூற்றுப்படி, கடந்த ஆட்சியில் பணம் வழங்கிய பள்ளிகளுக்கு மட்டுமே அங்கீகாரம் மற்றும் தடையில்லா சான்றிதழ் கிடைத்ததாக கூறப்படுகிறது. பணம் வழங்காத பள்ளிகளின் கோப்புகள் மாதக்கணக்கில் மட்டுமல்ல, ஆண்டுக்கணக்கிலும் நிலுவையில் வைக்கப்பட்டதாக அவர் குற்றம்சாட்டியுள்ளார்.
இதையும் படிங்க: சீமான் போராடியதை முடித்துக் கொடுத்த முதல்வர் விஜய்! அரசு பஸ்களில் மீண்டும் இடம் பிடித்தது தமிழ்நாடு!
நர்சரி பள்ளிகளிடம் ரூ.3 லட்சம், மெட்ரிக் பள்ளிகளிடம் ரூ.5 லட்சம் மற்றும் சி.பி.எஸ்.இ. பள்ளிகளிடம் ரூ.10 லட்சம் முதல் ரூ.15 லட்சம் வரை வசூலிக்கப்பட்டதாகவும் அவர் தெரிவித்துள்ளார். மேலும் புதிய பள்ளிகளை தொடங்குவதற்கே ரூ.35 லட்சம் முதல் ரூ.50 லட்சம் வரை லஞ்சம் கொடுத்தால் மட்டுமே அனுமதி கிடைக்கும் சூழல் இருந்ததாகவும் கூறியுள்ளார்.
கடந்த ஐந்து ஆண்டுகளில் மட்டும் தனியார் பள்ளிகளிடமிருந்து ரூ.300 கோடிக்கும் அதிகமான தொகை வசூலிக்கப்பட்டதாகவும், இந்த பணப் பரிவர்த்தனைகள் சென்னையில் உள்ள குறிப்பிட்ட இடங்களில் நடைபெற்றதாகவும் நந்தகுமார் கூறியுள்ளார். சில அதிகாரிகள் மற்றும் கல்வித்துறை தொடர்புடைய நபர்களின் பெயர்களையும் அவர் குறிப்பிட்டுள்ளார்.
இதற்கிடையில், தமிழக வெற்றிக் கழக ஆட்சி பொறுப்பேற்ற பிறகு அங்கீகாரம் மற்றும் தடையில்லா சான்றிதழ் பெற எந்தவித பணமும் செலுத்த வேண்டிய நிலை இல்லை என்றும், பள்ளிகளின் விண்ணப்பங்கள் வெளிப்படையான முறையில் பரிசீலிக்கப்பட்டு வருவதாகவும் அவர் தெரிவித்துள்ளார்.
எனினும், நந்தகுமார் முன்வைத்துள்ள இந்த குற்றச்சாட்டுகள் குறித்து சம்பந்தப்பட்ட முன்னாள் அமைச்சர்கள் அல்லது கல்வித்துறை அதிகாரிகள் தரப்பில் இதுவரை அதிகாரப்பூர்வ விளக்கம் வெளியாகவில்லை. இந்த விவகாரம் அரசியல் மற்றும் கல்வி வட்டாரங்களில் புதிய விவாதத்தை கிளப்பியுள்ளது.
இதையும் படிங்க: Breaking! திமுக ஆட்சியில் வெளியிடப்பட்ட 500 மின்சார பஸ் டெண்டர் ரத்து! அடுத்தடுத்து அதிரடி காட்டும் தவெக அரசு!