புதுச்சேரி சட்டசபை இன்று சிறப்புக் கூட்டத்தில் கூடியது. வரும் ஏப்ரல் மாதம் சட்டசபை தேர்தல் நடைபெற உள்ளதால், 2026-27 நிதியாண்டுக்கான முழுமையான பட்ஜெட் தாக்கல் செய்யப்படவில்லை.
அதற்கு பதிலாக, அடுத்த 5 மாதங்களுக்கான இடைக்கால பட்ஜெட் தாக்கல் செய்யப்பட்டது. முதலமைச்சர் என். ரங்கசாமி, ஏப்ரல் முதல் ஆகஸ்ட் வரையிலான காலத்திற்கு ரூ.5,396 கோடி செலவினங்களுக்கான இடைக்கால பட்ஜெட்டை சபையில் தாக்கல் செய்தார்.
சபாநாயகர் ஏம்பலம் செல்வம் குரல் வாக்கெடுப்பு நடத்தி இந்த இடைக்கால பட்ஜெட்டுக்கு சபையின் ஒப்புதலைப் பெற்றார். தேர்தலுக்குப் பிறகு புதிய அரசு அமையும். அந்த அரசு தான் 2026-27 நிதியாண்டுக்கான முழுமையான பட்ஜெட்டை தாக்கல் செய்யும் என்று எதிர்பார்க்கப்படுகிறது.
இதையும் படிங்க: பிப்., 5-ல் கூடுகிறது தமிழக அமைச்சரவை! பிப்.,13ல் இடைக்கால பட்ஜெட்! எகிறும் எதிர்பார்ப்பு!
இதே சபைக் கூட்டத்தில், 2025-26 நிதியாண்டுக்கான கூடுதல் செலவின அறிக்கையும் (Supplementary Demands for Grants) விவாதிக்கப்பட்டது. முதலமைச்சர் ரங்கசாமி மற்றும் துறை அமைச்சர்கள் சார்பில் பல்வேறு துறைகளுக்கான கூடுதல் நிதி கோரிக்கைகள் முன்வைக்கப்பட்டன. ஒட்டுமொத்தமாக அனைத்து துறைகளையும் சேர்த்து ரூ.537 கோடியே 38 லட்சம் கூடுதல் செலவினங்களுக்கு சபையின் ஒப்புதல் கோரப்பட்டது.
சபாநாயகர் ஏம்பலம் செல்வம் குரல் வாக்கெடுப்பு மூலம் இந்த கூடுதல் செலவினங்களுக்கும் ஒப்புதல் அளித்தார். இந்த கூடுதல் நிதி அரசின் தற்போதைய திட்டங்கள், ஊழியர்கள் ஊதியம், ஓய்வூதியம், சமூக நலத் திட்டங்கள், உள்கட்டமைப்பு பணிகள் போன்றவற்றை தொடர்ந்து நடத்த உதவும்.
தேர்தல் நெருங்கும் நிலையில் இடைக்கால பட்ஜெட் மற்றும் கூடுதல் செலவு அனுமதி மூலம் அரசு நிர்வாகம் தடையின்றி நடைபெறும் என்பதை இது உறுதிப்படுத்துகிறது. என்ஆர் காங்கிரஸ் – பாஜக கூட்டணி அரசு தேர்தலுக்கு முன் மக்களுக்கு தேவையான அடிப்படை செலவுகளை உறுதி செய்துள்ளது. தேர்தலுக்குப் பிறகு புதிய அரசு முழு பட்ஜெட்டை தாக்கல் செய்யும் போது புதுச்சேரி மக்களின் எதிர்பார்ப்புகள் அதிகரிக்கும்.
இதையும் படிங்க: அரசு பள்ளியில் ஆர்.எஸ்.எஸ் முகாம்! ஐகோர்ட் நோட்டீஸ்! தமிழக அரசுக்கு கிடுக்குப்பிடி கேள்வி!