சென்னை: தமிழகத்தின் புதிய தலைமைச் செயலகத்தை சென்னை பட்டினப்பாக்கத்தில் அமைக்கும் திட்டத்துக்கு எதிர்ப்புகள் அதிகரித்துள்ள நிலையில், மாற்று இடங்கள் குறித்தும் அரசு பரிசீலித்து வருவதாக தகவல்கள் வெளியாகியுள்ளன. ரூ.1,200 கோடி மதிப்பில் புதிய சட்டப்பேரவை மற்றும் தலைமைச் செயலக வளாகத்தை அமைக்க அரசு ஏற்கெனவே அரசாணை வெளியிட்டுள்ள நிலையில், அடுத்தகட்ட நடவடிக்கைகளில் தற்போது குழப்பம் ஏற்பட்டுள்ளதாக கூறப்படுகிறது.

செப்டம்பர் 3-ம் தேதி சட்டப்பேரவையில் 110-வது விதியின் கீழ் முதல்வர் விஜய், நவீன வசதிகளுடன் 20 லட்சம் சதுர அடி பரப்பளவில் புதிய தலைமைச் செயலக வளாகம் அமைக்கப்படும் என அறிவித்திருந்தார். இதையடுத்து பட்டினப்பாக்கத்தில் தமிழ்நாடு வீட்டு வசதி வாரியத்துக்கு சொந்தமான நிலம் தேர்வு செய்யப்பட்டு, அதற்கான அரசாணையும் வெளியிடப்பட்டது.

இந்தத் திட்டத்துக்கு பட்டினப்பாக்கம் மற்றும் சுற்றுவட்டார மீனவ மக்கள் கடும் எதிர்ப்பு தெரிவித்து வருகின்றனர். திட்டம் செயல்படுத்தப்பட்டால் மீனவர்களின் வாழ்வாதாரம் பாதிக்கப்படும் என்றும், அப்பகுதியில் போக்குவரத்து மற்றும் பொதுமக்கள் தொடர்பான பல்வேறு சிக்கல்கள் ஏற்படும் என்றும் எதிர்ப்பாளர்கள் கூறியுள்ளனர். செப்டம்பர் 21-ம் தேதிக்குள் திட்டத்தை திரும்பப் பெற வேண்டும் எனவும் மீனவர்கள் அரசுக்கு காலக்கெடு விதித்திருந்தனர்.

இதையும் படிங்க: ஆளுநர்-முதல்வர் மோதல் இல்லை!! துணைவேந்தர் விவகாரத்தில் அமைச்சர் விஸ்வநாதன் சொன்ன முக்கிய தகவல்!

இதற்கிடையே பல்வேறு அரசியல் கட்சிகளும் திட்டம் தொடர்பாக எதிர்ப்புகளை பதிவு செய்துள்ளன. இதனால் பட்டினப்பாக்கத்தில் திட்டத்தை தொடர்ந்து செயல்படுத்துவது குறித்து அரசு மறுபரிசீலனை செய்து வருவதாக தகவல்கள் வெளியாகியுள்ளன. குறிப்பாக கிழக்கு கடற்கரைச் சாலை பகுதிகளில் மாற்று இடங்கள் ஆய்வு செய்யப்படுவதாக தகவல் வெளியாகியுள்ளது. எனினும், மாற்று இடம் தொடர்பாக இதுவரை அதிகாரப்பூர்வ அரசாணை வெளியிடப்படவில்லை.

முன்னதாக கிண்டி நெடுஞ்சாலை ஆராய்ச்சி நிலையம், நந்தம்பாக்கம் உள்ளிட்ட இடங்களும் புதிய தலைமைச் செயலகத்துக்காக பரிசீலிக்கப்பட்டதாக தகவல்கள் வெளியாகியிருந்தன. தற்போது பட்டினப்பாக்கத்துக்கு எதிர்ப்பு அதிகரித்துள்ளதால், மாற்று இடத்தை தேர்வு செய்வதில் பல்வேறு அம்சங்கள் கணக்கில் எடுத்துக்கொள்ளப்படுவதாக கூறப்படுகிறது.

இதற்கிடையே, இடத்தின் அமைப்பு, கட்டுமானத்துக்கான வசதி உள்ளிட்ட அம்சங்களுடன் வாஸ்து தொடர்பான கருத்துகளும் பரிசீலனையில் இருப்பதாக சில ஊடகத் தகவல்கள் தெரிவிக்கின்றன. ஆனால், இது தொடர்பான அதிகாரப்பூர்வ விளக்கம் இதுவரை வெளியாகவில்லை. இதனால் ரூ.1,200 கோடி மதிப்பிலான புதிய தலைமைச் செயலக திட்டம் பட்டினப்பாக்கத்திலேயே தொடருமா அல்லது மாற்று இடத்துக்கு செல்லுமா என்ற எதிர்பார்ப்பு ஏற்பட்டுள்ளது.

இதையும் படிங்க: மதுரை மாணவன் மரணம்! 16 நாட்களுக்கு பின் உறவினர்களிடம் உடல் ஒப்படைப்பு! போராட்டத்தை கைவிடாத குடும்பத்தினர்!