தமிழக அரசியல் களத்தில் புதிய எதிர்பார்ப்பை ஏற்படுத்தி வந்த நடிகர் விஜய்யின் பிரசார முறை, இப்போது பெரும் விவாதத்துக்கு உள்ளாகியுள்ளது. அவரது ஸ்டைல் ஓட்டுக்களை பெற்றுத் தருமா அல்லது மற்ற கட்சிகளுக்கு சாதகமாக அமையுமா என்கிற கேள்வி தேர்தல் வட்டாரத்தில் எழுந்துள்ளது.

மார்ச் 30ஆம் தேதி தமிழக சட்டமன்ற தேர்தலுக்கான வேட்பு மனு தாக்கல் தொடங்கிய முதல் நாளிலேயே தமிழக வெற்றி கழகம் (தவெக) தலைவர் விஜய் சென்னை பெரம்பூர் தொகுதியில் வேட்பு மனு தாக்கல் செய்தார். பல கட்சிகள் இன்னும் தங்கள் வேட்பாளர்களை அறிவிக்காத நிலையில் அவர் காட்டிய இந்த வேகம் அனைவரையும் ஆச்சரியப்படுத்தியது. ‘இவர் உண்மையிலேயே அரசியலை சீரியஸாக எடுத்துக்கொண்டு செயல்படப் போகிறார்’ என்ற எண்ணத்தை அது ஏற்படுத்தியது.

ஆனால் அந்த உற்சாகம் சில மணி நேரங்கள் மட்டுமே நீடித்தது. பெரம்பூர் மற்றும் கொளத்தூர் பகுதிகளில் மதியம் வரை பிரசாரம் செய்த விஜய், திடீரென தனது பிரசார திட்டத்தை ரத்து செய்துவிட்டார். போலீசார் போதிய பாதுகாப்பு கொடுக்கவில்லை எனக் கூறி ஒரு அறிக்கையை வெளியிட்டு பனையூர் வீட்டுக்கு திரும்பினார். அங்கிருந்து அவர் வெளியே வரவில்லை. 

இதையும் படிங்க: மும்பையில் த்ரிஷாவிடம் அமித்ஷா தரப்பு பேச்சுவார்த்தை?! அதிமுக -பாஜகவில் இணைகிறதா தவெக?

விஜய்யின் ரசிகர்கள் அடுத்த நாள் பிரசாரம் தொடரும் என ஆவலுடன் காத்திருந்தனர். ஆனால் ஏப்ரல் 1ஆம் தேதி வரை எந்த செய்தியும் இல்லை. இந்த நிலையில் ஏப்ரல் 2ஆம் தேதி திடீரென வெளியே வந்த விஜய் திருச்சி கிழக்கு தொகுதியில் வேட்பு மனு தாக்கல் செய்தார். அங்கு சிறிது நேரம் பிரசாரமும் செய்தார். ஆனால் தனது கட்சியின் வேட்பாளர்களை வாக்காளர்களுக்கு அறிமுகம் செய்யும் வாய்ப்பை அவர் முழுமையாக பயன்படுத்தவில்லை. வேட்பாளர்களை அப்படியே விட்டுவிட்டு உடனடியாக சென்னைக்கு பறந்தார்.

அதன்பிறகு விஜய்யின் தரப்பில் இருந்து பிரசாரம் தொடர்பான எந்த தகவலும் வரவில்லை. இந்த வித்தியாசமான பிரசார பாணி மற்ற கட்சி வேட்பாளர்களுக்கு மகிழ்ச்சியை அளித்துள்ளது. ஏனெனில், ஆண்ட கட்சிகளுக்கு மாற்று என்று கூறி அரசியலுக்கு வந்த விஜய், பிரசாரத்தில் அந்த மாற்றை காட்டவில்லை என அவரது ரசிகர்கள் வருத்தம் தெரிவிக்கின்றனர். 

தேர்தல் களம் சூடுபிடிக்கும் நேரத்தில் விஜய்யின் இந்த லோ-ப்ரொஃபைல் அணுகுமுறை அவருக்கு லாபமா அல்லது எதிர்க்கட்சிகளுக்கு பலமா என்பதை நாடு முழுவதும் உள்ள தமிழக மக்கள் ஆவலுடன் கவனித்து வருகின்றனர். அவரது அடுத்த நகர்வு என்னவாக இருக்கும் என்பதைப் பொறுத்தே தவெகவின் எதிர்காலம் அமையும் என்கிற எதிர்பார்ப்பு நிலவுகிறது.

இதையும் படிங்க: டெல்லி கிளம்பிய விஜய்! சென்னையில் அவசர கூட்டம்! கூட்டணி குறித்து ஆலோசிக்கும் தவெக!