நெல்லை: நெல்லை மாநகரம் தச்சநல்லூர் பகுதியில் 17 வயது சிறுமியை மிரட்டி பாலியல் வன்கொடுமை செய்ததாக கூறப்படும் 40 வயது தொழிலாளியை போக்சோ சட்டத்தின் கீழ் போலீசார் கைது செய்துள்ளனர். சிறுமிக்கு பிறந்த குழந்தையின் மரபணுவுடன், கைது செய்யப்பட்ட நபரின் டிஎன்ஏவை ஒப்பிட்டு விசாரணை நடத்த போலீசார் நடவடிக்கை எடுத்து வருகின்றனர்.

நெல்லை மாநகரப் பகுதியில் வசிக்கும் தம்பதியின் 17 வயது மகள் பள்ளிக்கு செல்லாமல் வீட்டில் இருந்து வந்ததாக கூறப்படுகிறது. கடந்த ஆண்டு சிறுமி கர்ப்பமாக இருந்தது பெற்றோருக்கு தெரியவந்தது. குடும்பத்தினர் இதை வெளியே தெரிவிக்காமல் வைத்திருந்ததாக தெரிகிறது. இந்நிலையில், சில மாதங்களுக்கு முன்பு சிறுமிக்கு மருத்துவமனையில் குழந்தை பிறந்தது.

சிறுமிக்கு 18 வயது நிறைவடையவில்லை என்பதை மருத்துவமனை நிர்வாகம் அறிந்ததைத் தொடர்ந்து, இந்த விவகாரம் தொடர்பாக போலீசாருக்கு தகவல் தெரிவிக்கப்பட்டது. இதையடுத்து தச்சநல்லூர் போலீசார் விசாரணை நடத்தினர். பின்னர் இந்த விவகாரம் தொடர்பாக டவுன் அனைத்து மகளிர் போலீஸ் நிலையத்தில் புகார் அளிக்கப்பட்டது.

இதையும் படிங்க: திருச்செந்தூர் - நெல்லை பயணிகள் ரயில் 7 நாட்கள் ரத்து! தென்னக ரயில்வேயின் முக்கிய அறிவிப்பு!

போலீசார் சிறுமியிடம் விசாரணை நடத்தியபோது, தச்சநல்லூர் பகுதியைச் சேர்ந்த இளைஞர் ஒருவர் தன்னுடன் தொடர்பில் இருந்ததாக அவர் தெரிவித்ததாக கூறப்படுகிறது. இதையடுத்து அந்த நபரை போலீசார் கைது செய்தனர். அவரிடம் மேற்கொள்ளப்பட்ட டிஎன்ஏ பரிசோதனையில், சிறுமியின் கர்ப்பத்துக்கு அவர் காரணம் இல்லை என்பது தெரியவந்ததாக போலீஸ் தரப்பில் தெரிவிக்கப்பட்டுள்ளது. இருப்பினும் சிறுமியிடம் பாலியல் வன்கொடுமையில் ஈடுபட்டதாக கூறப்பட்ட குற்றச்சாட்டின் அடிப்படையில் அவர் மீது நடவடிக்கை எடுக்கப்பட்டது.

இதனிடையே, தச்சநல்லூர் கீழக்கரை பகுதியைச் சேர்ந்த தொழிலாளியான அந்தோணிராஜ், 40, என்பவர்தான் தனது கர்ப்பத்துக்கு காரணம் என சிறுமி போலீசாரிடம் தெரிவித்ததாக கூறப்படுகிறது. இதையடுத்து அவரை போலீசார் கைது செய்து, போக்சோ சட்டத்தின் கீழ் வழக்குப்பதிவு செய்துள்ளனர்.

முதற்கட்ட விசாரணையில் சிறுமியிடம் ஆசைவார்த்தை கூறி, மிரட்டி பாலியல் வன்கொடுமை செய்ததாக அந்தோணிராஜ் மீது குற்றச்சாட்டு எழுந்துள்ளது. இந்தக் குற்றச்சாட்டை உறுதி செய்யும் வகையில், சிறுமியின் குழந்தையின் மரபணுவுடன் அந்தோணிராஜின் டிஎன்ஏவை ஒப்பிட்டு ஆய்வு செய்ய போலீசார் திட்டமிட்டுள்ளனர்.

இந்த வழக்கில் டிஎன்ஏ பரிசோதனை முடிவுகள் வெளியாகிய பின்னரே குழந்தையின் உயிரியல் தந்தை தொடர்பான விவரம் உறுதி செய்யப்படும் என எதிர்பார்க்கப்படுகிறது. சிறுமி தொடர்பான வழக்கு என்பதால் போலீசார் தொடர்ந்து விசாரணை மேற்கொண்டு வருகின்றனர்.

இதையும் படிங்க: தென்காசியில் பயங்கரம்! பாலத்தின் தடுப்புச்சுவரை உடைத்து ஆற்றில் தலைகுப்புற கவிழ்ந்த அரசு பேருந்து! 21 பேர் காயம்!