சர்வதேச விளையாட்டு அரங்கில் தமிழ்நாட்டின் கொடியைப் பட்டொளி வீசிப் பறக்கச் செய்யும் வகையில், 'ட்ரீம் ஒலிம்பிக்ஸ் 2036' என்ற வரலாற்றுச் சிறப்புமிக்க புதிய திட்டத்தைத் தொடங்கி வைத்துள்ள முதலமைச்சர் ச. ஜோசப் விஜய், ஒலிம்பிக்கில் தங்கம் வெல்லும் தமிழக வீரர்களுக்கு ரூ.5 கோடி பரிசுத் தொகை வழங்கப்படும் என்று அதிரடியாக அறிவித்துள்ளார்.

சென்னை எம்.ஆர்.சி நகரில் உள்ள தனியார் நட்சத்திர விடுதியில் நடைபெற்ற பிரம்மாண்ட பாராட்டு விழாவில், ஜப்பானில் நடைபெற்ற 20-வது ஆசிய விளையாட்டுப் போட்டிகள் மற்றும் உஸ்பெகிஸ்தானில் நடைபெற்ற 46-வது செஸ் ஒலிம்பியாட் போட்டிகளில் பதக்கங்கள் வென்று தமிழ்நாட்டிற்கும் இந்தியாவிற்கும் பெருமை சேர்த்த வீரர், வீராங்கனைகளுக்கு அரசு சார்பில் உயரிய ஊக்கத்தொகை வழங்கி முதல்வர் கௌரவித்தார்.

விழாவில் உரையாற்றிய முதலமைச்சர் விஜய், எதிர்கால ஒலிம்பிக் போட்டிகளில் தமிழக வீரர்கள் சாதனை படைப்பதற்காக இப்புதிய திட்டம் தொடங்கப்பட்டுள்ளதாகத் தெரிவித்தார். அதன்படி, ஒலிம்பிக்கில் தங்கம் வெல்லும் தமிழக வீரர்களுக்கு ரூ.5 கோடியும், வெள்ளிப் பதக்கம் வெல்பவர்களுக்கு ரூ.3 கோடியும், வெண்கலப் பதக்கம் வெல்பவர்களுக்கு ரூ.2 கோடியும் தமிழ்நாடு அரசு சார்பில் பரிசுத் தொகையாக வழங்கப்படும் என்றும், ஒலிம்பிக் போட்டிகளில் பங்கேற்கத் தகுதி பெறும் வீரர்களுக்கு மட்டுமே ரூ.15 லட்சம் ஊக்கத்தொகை வழங்கப்படும் என்றும் அறிவித்தார்.

இதையும் படிங்க: தாய்மாமன் தங்க மோதிரம் திட்ட விதிகளில் தளர்வு! தமிழக அரசு அரசாணை வெளியீடு!

முன்னதாகப் பேசிய விளையாட்டுத்துறை அமைச்சர் ஆதவ் அர்ஜுனா, கடந்த 100 ஆண்டுகளாகத் தமிழ்நாட்டிலிருந்து ஒலிம்பிக்கில் தங்கம் வெல்ல முடியாத சூழல் நிலவுவதாகவும், தேசிய அளவில் தமிழ்நாடு விளையாட்டுப் பதக்கப் பட்டியலில் 7-வது இடத்தில் உள்ளதாகவும் சுட்டிக்காட்டினார். இந்நிலையை மாற்றித் தமிழகத்திலிருந்து ஒலிம்பிக் பதக்கங்களை அள்ளும் வகையில் திட்டங்கள் தீட்டப்பட்டு வருவதாகவும், பள்ளிகளில் வாரத்தில் 5 நாட்களும் உடற்கல்வி வகுப்புகளை நடத்த முதலமைச்சர் உத்தரவிட்டுள்ளதைப் போலக் கல்லூரிகளிலும் பி.டி வகுப்புகளைக் கட்டாயமாகக் கொண்டுவர வேண்டும் என்றும் அவர் கேட்டுக்கொண்டார். மேலும், பயிற்சியாளர்களுக்கு 50% ஊக்கத்தொகை வழங்கப்படும் என்றும், திருநங்கைகளுக்கென மாநில அளவிலான விளையாட்டுப் போட்டிகள் நடத்தப்படும் என்றும் தெரிவித்தார்.

இவ்விழாவில் 3 பதக்கங்களை வென்ற தடகள வீராங்கனை வித்யா ராம்ராஜுக்கு ரூ.1.55 கோடியும், விஷால் டி.கே-விற்கு ரூ.80 லட்சமும், கிரிக்கெட் வீரர்கள் வாஷிங்டன் சுந்தர் மற்றும் கமலினிக்குத் தலா ரூ.75 லட்சமும் வழங்கப்பட்டது. மேலும் ஜோஷ்னா சின்னப்பா, வேலவனுக்குத் தலா ரூ.60 லட்சமும், பரணிகா, அபிநயா, ராஜேஷ் ரமேஷ், ஷமீனா ரியாஸுக்குத் தலா ரூ.30 லட்சமும் முதலமைச்சர் விஜய் நேரடியாக வழங்கினார். செஸ் ஒலிம்பியாட் போட்டியில் வென்ற குகேஷ், பிரக்ஞானந்தா, வைஷாலி, சவிதாஸ்ரீ ஆகியோருக்கும் ஊக்கத்தொகை வழங்கி அரசு சார்பில் சிறப்பு விருந்தளிக்கப்பட்டது.

ஊக்கத்தொகையைப் பெற்றுக்கொண்டு பேசிய வீராங்கனை வித்யா ராம்ராஜ், வீரர்கள் தங்களது 100 சதவீத உழைப்பைக் கொடுத்தால் போதும், அரசு அனைத்து உதவிகளையும் செய்யத் தயாராக இருக்கிறது என்றார். தடகள வீரர் விஷால் பேசுகையில், விடுதிகளில் தற்போது செய்யப்பட்டுள்ள நவீன குளிரூட்டப்பட்ட வசதிகளைப் பயன்படுத்தித் தமிழக வீரர்கள் நிச்சயம் ஒலிம்பிக்கில் வெல்வோம் என்று நெகிழ்ச்சியுடன் தெரிவித்தார்.

இதையும் படிங்க: குடிமகன்களால் தொல்லை..! எடுத்த நடவடிக்கை என்ன? தமிழக அரசுக்கு ஐகோர்ட் உத்தரவு!