தமிழக வெற்றிக் கழகம் (தவெக) தொடங்கி மூன்று ஆண்டுகள் ஆகியும், ஒரு திட்டமும் முழுமையாக நிறைவேற்றப்படவில்லை என்று கட்சியின் மேல் மட்ட நிர்வாகிகளே வேதனையுடன் குமுறுகின்றனர். அறிவிப்புகள் மட்டுமே வந்து கொண்டிருக்கின்றன; செயல்பாடுகள் தேங்கி நிற்கின்றன என்ற குற்றச்சாட்டு கட்சி வட்டாரத்தில் பரபரப்பை ஏற்படுத்தியுள்ளது.
தவெகவின் முதல் பூத் கமிட்டி மாநாடு கோவையில் 2025 ஏப்ரல் 26-ஆம் தேதி நடைபெற்றது. எல்லா மண்டலங்களிலும் இதுபோன்ற மாநாடுகள் நடைபெறும் என்று தலைமை அறிவித்தது. ஆனால் இன்று வரை எந்த மண்டலத்திலும் அடுத்த மாநாடு நடக்கவில்லை. அதேபோல, ஐந்து மண்டலங்கள், 120 மாவட்டங்களில் கொள்கை விளக்க கூட்டங்கள் நடத்த விஜய் கடந்த ஜூலை மாதம் உத்தரவிட்டார். சேலத்தில் மட்டுமே ஒரு கொள்கை விளக்க பொதுக்கூட்டம் நடந்தது; மற்ற இடங்களில் எதுவும் நடக்கவில்லை.
பின்னர், மக்கள் குறைதீர் விண்ணப்பங்கள் திட்டம் திடீரென அறிவிக்கப்பட்டது. நிர்வாகிகள் வீடு வீடாகச் சென்று மனுக்களை சேகரித்து தலைமையிடம் கொடுத்தனர். ஆனால் அவை அப்படியே கிடப்பில் போடப்பட்டுவிட்டன. கடந்த ஆண்டு 'திங்கள்தோறும் தலைவர்' என்ற திட்டத்தின் கீழ் திங்கள் கிழமை தோறும் விஜய் கீழ்மட்ட நிர்வாகிகளுடன் பேசுவார் என்று அறிவிக்கப்பட்டது. ஆனால் இது நாள் வரை ஒரு திங்கள்கூட நடக்கவில்லை.
இதையும் படிங்க: அண்ணாதுரையை கழட்டி விட்ட தவெக! விஜய் புது ப்ளான்! நிர்வாகிகளுக்கு பறந்த உத்தரவு!
ஜனவரி 21-ஆம் தேதி 'தலைமை நிர்வாகிகள் தொகுதிவாரியாக சுற்றுப்பயணம் வருவர்' என்று அறிவிக்கப்பட்டது. ஆனால் ஒரு தொகுதிக்குக்கூட வரவில்லை. மாவட்டம் தோறும் செயல் வீரர்கள் கூட்டம் நடக்கும் என்றனர்; சென்னையில் மட்டுமே நடந்தது. விஜயின் சுற்றுப்பயண அறிவிப்பும் அந்தரத்தில் நிற்கிறது.
நிர்வாகிகள் கூறுகையில், ஒரு வேலையை செய்து கொண்டிருக்கும்போதே அடுத்த உத்தரவு வருகிறது. புதிய உத்தரவு வந்தவுடன் முந்தையது கைவிடப்படுகிறது. இப்படி மூன்று ஆண்டுகளில் வெறும் அறிவிப்புகளும் உத்தரவுகளுமே வந்துள்ளன. எந்த ஒரு திட்டமும் முழுமையாக நிறைவேறவில்லை என்று மனம் நொந்து பேசியுள்ளனர்.
இந்த உள்ளூர் அதிருப்தி தவெகவின் அமைப்பு வலிமைக்கு பெரும் சவாலாக உருவெடுத்துள்ளது. 2026 சட்டமன்றத் தேர்தலுக்கு முன் கட்சியை ஒருங்கிணைக்க வேண்டிய நிலையில் இத்தகைய குற்றச்சாட்டுகள் பெரும் விவாதத்தை ஏற்படுத்தியுள்ளன. தலைமை இதற்கு விரைவில் தீர்வு காண வேண்டும் என்ற எதிர்பார்ப்பு எழுந்துள்ளது.
இதையும் படிங்க: விஜய்க்கு தீராத தலைவலி!! தவெகவில் உச்சக்கட்ட உட்கட்சி மோதல்!! எச்சரித்தும் அடங்காத நிர்வாகிகள்!