தமிழக சட்டசபை தேர்தலில் மிகப்பெரிய அதிர்ச்சியை ஏற்படுத்திய வெற்றிகளில் ஒன்றாக கொளத்தூர் தொகுதி முடிவு பார்க்கப்பட்டது. முன்னாள் முதலமைச்சர் மு.க.ஸ்டாலினை சுமார் 8 ஆயிரம் வாக்குகள் வித்தியாசத்தில் தோற்கடித்து தவெக வேட்பாளர் வி.எஸ்.பாபு வெற்றி பெற்றது அரசியல் வட்டாரங்களில் பரபரப்பை ஏற்படுத்தியது. திமுகவின் கோட்டையாக கருதப்பட்ட கொளத்தூரில் ஸ்டாலினை தோற்கடித்ததால், புதிய அமைச்சரவையில் வி.எஸ்.பாபுவுக்கு முக்கிய இடம் கிடைக்கும் என எதிர்பார்ப்பு நிலவியது.
ஆனால் நேற்று வெளியிடப்பட்ட முதலமைச்சர் விஜயின் 9 பேர் கொண்ட அமைச்சரவை பட்டியலில் வி.எஸ்.பாபுவின் பெயர் இடம்பெறாதது அரசியல் வட்டாரங்களில் புதிய விவாதத்தை கிளப்பியுள்ளது. குறிப்பாக, “ஸ்டாலினை தோற்கடித்த எனக்கு கூட அமைச்சரவை வாய்ப்பு கிடைக்கவில்லையா?” என்ற மனநிலையில் வி.எஸ்.பாபு அதிருப்தியில் இருப்பதாக தகவல்கள் வெளியாகியுள்ளன.
தவெக கட்சியின் உள்ளக வட்டாரங்களில், வி.எஸ்.பாபுவை சமாதானப்படுத்தும் முயற்சிகள் நடைபெற்று வருவதாக கூறப்படுகிறது. அவருக்கு கட்சியில் முக்கிய நிர்வாக பொறுப்பு அல்லது சட்டசபை தொடர்பான பதவி வழங்கப்படும் என ஒரு தரப்பு தகவல் தெரிவிக்கிறது. இதன் மூலம் கட்சிக்குள் அதிருப்தி உருவாகாமல் தடுக்க முயற்சி மேற்கொள்ளப்படுவதாக கூறப்படுகிறது.
இதையும் படிங்க: Breaking News! மு.க.ஸ்டாலினை சந்திக்கிறார் முதல்வர் விஜய்! ஆழ்வார்பேட்டை இல்லத்தில் வரலாற்று நிகழ்வு!
மறுபுறம், அமைச்சரவை அமைப்பில் சமூக மற்றும் மண்டல சமநிலைக்கு முக்கியத்துவம் அளிக்கப்பட்டதாக தவெக வட்டாரங்கள் விளக்கம் அளித்து வருகின்றன. தமிழகத்தின் பல்வேறு பகுதிகள் மற்றும் சமூக பிரதிநிதித்துவத்தை கருத்தில் கொண்டே அமைச்சர்கள் தேர்வு செய்யப்பட்டதாக கூறப்படுகிறது. இதனால் சில முக்கிய வெற்றி பெற்ற எம்எல்ஏக்கள் அமைச்சரவையில் இடம் பெற முடியாத நிலை ஏற்பட்டதாக தகவல் வெளியாகியுள்ளது.
அதே நேரத்தில், எதிர்காலத்தில் அமைச்சரவை விரிவாக்கம் செய்யப்படும் போது வி.எஸ்.பாபுவுக்கு வாய்ப்பு கிடைக்கலாம் என்றும் அரசியல் வட்டாரங்களில் பேசப்படுகிறது. கொளத்தூரில் ஸ்டாலினை தோற்கடித்த வெற்றி, தவெக அரசியலில் வி.எஸ்.பாபுவுக்கு பெரிய அரசியல் அடையாளத்தை உருவாக்கியிருப்பதால், அவரை கட்சி நீண்டகாலமாக புறக்கணிக்காது எனவும் கூறப்படுகிறது.
இதையும் படிங்க: மு.க.ஸ்டாலினுடன் திருமாவளவன் திடீர் சந்திப்பு! விஜய்க்கு ஆதரவு என்பதில் நீடிக்கும் மர்மம்!