கன்னியாகுமரி மாவட்டம் நாகர்கோவில் அருகே பேருந்துக்காகக் காத்திருந்த கல்லூரி மாணவிக்குப் பாலியல் தொல்லை அளித்ததாக ஆளும் தமிழக வெற்றிக் கழகத்தின் மாவட்டச் செயற்குழு உறுப்பினர் கிறிஸ்டோபர் மீது எழுந்துள்ள புகார் குறித்து அதிமுக பொதுச்செயலாளரும் சட்டமன்ற எதிர்க்கட்சித் தலைவருமான எடப்பாடி கே. பழனிசாமி கடுமையான கண்டனத்தை வெளிப்படுத்தியுள்ளார்.

இது தொடர்பாக அவர் வெளியிட்டுள்ள எக்ஸ் தளப் பதிவில், நாகர்கோவில் அருகே பேருந்து நிறுத்தத்தில் காத்திருந்த கல்லூரி மாணவிக்கு உதவுவது போல நடித்து, ஆளுங்கட்சியான தவெக மாவட்டச் செயற்குழு உறுப்பினர் கிறிஸ்டோபர் பாலியல் துன்புறுத்தலுக்கு ஆளாக்கியதாக வரும் செய்தி மிகுந்த அதிர்ச்சியளிக்கிறது எனக் குறிப்பிட்டுள்ளார். 

பெண்களைக் காப்பதில் தமிழ்நாடு நம்பர் 1 ஆட்சியாக இருக்கும் என்று வாக்குறுதி அளித்தபோது, தனது கட்சிக்காரர்கள் இருப்பதை இன்றைய முதலமைச்சர் மறந்துவிட்டாரோ என்னவோ தெரியவில்லை என்று அவர் விமர்சித்துள்ளார். ஆளுங்கட்சி தவெக-வின் காமுக நபர்களால் பெண்களுக்குப் பாலியல் தொந்தரவு ஏற்படுவது நாளுக்கு நாள் அதிகரித்து வருவதாக அவர் சாடியுள்ளார்.

இதையும் படிங்க: பெருந்துறை இடைத்தேர்தல்: திமுக, அதிமுகவில் முன்னாள் அமைச்சர்களுக்கு வாய்ப்பு? தவெக விஜய்க்கு அதிர்ச்சி வைத்தியம்!

ஆட்சிதான் மாறியிருக்கிறதே தவிர முந்தைய சூழலைப் போல் காட்சி மாறவில்லை என்பதைப் போல, தற்போதைய தவெக கட்சி பாலியல் குற்றவாளிகளுக்கான முகவரியாக மாறி நிற்கிறது என்று எடப்பாடி பழனிசாமி குற்றம்சாட்டியுள்ளார். 

இத்தனை தொடர் கொடுமைகளுக்கும் நடுவே அரசு விளம்பரப்படுத்திய சிங்கப்பெண் அதிரடிப் படை எங்கே போனது என்றும், அது உறக்க நிலைக்கு சென்றுவிட்டதா என்றும் அவர் கேள்வி எழுப்பியுள்ளார். 

கல்லூரி மாணவிக்குப் பாலியல் தொல்லை கொடுத்ததாகக் குற்றம்சாட்டப்பட்டுள்ள தவெக நிர்வாகி கிறிஸ்டோபர் மீது எந்தவிதமான அரசியல் குறுக்கீடுகளும் இன்றி மிகக் கடுமையான சட்ட நடவடிக்கை எடுக்கப்பட வேண்டும் என அவர் அரசை வலியுறுத்தியுள்ளார்.

இறுதியாக, தமிழகப் பெண்களுக்கும் சிறுமிகளுக்கும் உருக்கமான வேண்டுகோள் விடுத்துள்ள எடப்பாடி பழனிசாமி, உங்களுக்கு உதவி செய்வதாக முகம் தெரியாத நபர்கள், குறிப்பாகத் தவெக-வினர் அணுகினால் உடனடியாகக் காவல்துறையைத் தொடர்பு கொள்ளுங்கள். 

உங்களை யாரேனும் தவறாக அணுக முற்பட்டால் உங்களைத் தற்காத்துக் கொள்வதற்கான தற்காப்பு உபகரணங்களை எப்போதும் உங்கள் கைப்பையில் வைத்துக் கொள்ளுங்கள்; நமக்கு நாமே பாதுகாப்பு என்பதே இந்த ஆட்சியின் தற்போதைய அவல நிலையாக உள்ளது என மிகக் காட்டமாகத் தெரிவித்துள்ளார்.

இதையும் படிங்க: தனுஷை வைத்து அதிமுக போடும் கணக்கு என்ன? அரசியல் வட்டாரத்தில் எழும் கேள்விகள்!!