வாஷிங்டன்: அமெரிக்காவின் போதைப்பொருள் ஒழிப்பு நடவடிக்கையில் டிரம்ப் நிர்வாகம் தீவிரமடைந்துள்ளது. கரீபியன் கடற்பகுதியில் போதை கடத்தல் படகுகளை அமெரிக்க கடற்படை தாக்கி அழித்தது போதாது, வெனிசுவலா நாட்டுக்குள் நிலத்தில் கூட தாக்குதல் நடத்த உள்ளோம் என்று அதிபர் டொனால்ட் டிரம்ப் நேற்று (டிசம்பர் 2) அமைச்சரவை கூட்டத்தில் அறிவித்தார். 

இதன் முன்னதாக, செப்டம்பர் 2 அன்று தொடங்கிய தாக்குதல்களில் 80-க்கும் மேற்பட்டோர் கொல்லப்பட்டுள்ளனர். அவர்கள் அனைவரும் போதை கடத்தல்காரர்களா? என்ற சந்தேகத்தால் சர்வதேச அளவில் கண்டனங்கள் எழுந்துள்ளன.

டிரம்ப் தலைமையிலான அமெரிக்க அரசு, போதைப்பொருள் கடத்தலை தடுக்க ‘கார்டெல் டெரரிஸ்ட்கள்’ (Cartel Terrorists) என்று அழைத்து தாக்குதல்களைத் தொடங்கியது. செப்டம்பர் 2 அன்று வெனிசுவலா படகு ஒன்றை அமெரிக்க கடற்படை முதல் முறையாகத் தாக்கியது. இதில் 11 பேர் கொல்லப்பட்டனர். தாக்குதல் முடிந்த பிறகு, உயிருடன் இருந்தவர்களை மீண்டும் தாக்கி அழித்த சம்பவம் சர்ச்சையை ஏற்படுத்தியது. பின்னர், அக்டோபர், நவம்பர் மாதங்களில் கரீபியன் கடல் மற்றும் கிழக்கு பசிஃபிக் பெருங்கடலில் 10-க்கும் மேற்பட்ட தாக்குதல்கள் நடத்தப்பட்டன. இதில் மொத்தம் 80-க்கும் மேற்பட்டோர் கொல்லப்பட்டுள்ளனர்.

இதையும் படிங்க: பாகிஸ்தானில் 200% HIV அதிகரிப்பு! பாதிக்கப்பட்டது தெரியாமலே வாழும் 80% மக்கள்!

அமெரிக்க பாதுகாப்புத் துறை அமைச்சர் பீட் ஹெக்செத், “இந்தத் தாக்குதல்கள் போதை கடத்தலைத் தடுக்கும் முதல் கட்டம்” என்று கூறினார். ஆனால், அமெரிக்கா ஆதாரங்களை வெளியிடாததால், கொல்லப்பட்டவர்கள் அனைவரும் கடத்தல்காரர்களா என சந்தேகம் எழுந்துள்ளது. 

வெனிசுவலா ஊடகங்கள், “சிலர் சாதாரண மீனவர்கள்” என்று கூறுகின்றன. சர்வதேச சட்ட வல்லுநர்கள், “இது சர்வதேச சட்டத்திற்கு மீறல்” என்று விமர்சித்துள்ளனர். டிரம்ப் அரசு, வெனிசுவலா அதிபர் நிக்கோலஸ் மடூரோ தலைமையிலான ‘கார்டெல் டி லோஸ் சோலெஸ்’ (Cartel de los Soles) என்ற குழுவை ‘வெளிநாட்டு தீவிரவாத அமைப்பு’ என்று அறிவித்துள்ளது.

இந்த சூழலில் நேற்று வெள்ளை மாளிகையில் நடைபெற்ற அமைச்சரவை கூட்டத்தில் டிரம்ப் பேசினார். “போதைப்பொருள் கடத்தல்காரர்களுக்கு எதிராக வெனிசுவலாவில் நாங்கள் விரைவில் தாக்குதல் தொடங்குவோம். நிலத்திலும் இந்தத் தாக்குதலை நடத்துவோம். 

நிலத்தில் தாக்குதல் மிகவும் எளிதானது. கெட்டவர்கள் எங்கு வாழ்கிறார்கள் என்பது எங்களுக்கு தெரியும். போதைப்பொருட்களை அமெரிக்காவுக்கு விற்பனை செய்யும் எவரும் தாக்குதலுக்கு உள்ளாக நேரிடும்” என்று அவர் எச்சரித்தார். வெளியுறவு செயலாளர் மார்கோ ரூபியோ, “வெனிசுவலா மட்டுமல்ல, கொலம்பியா போன்ற நாடுகளும் இதில் ஈடுபட்டால் தாக்குதல் நடக்கும்” என்று சேர்த்தார்.

இந்த அறிவிப்பு வெனிசுவலாவுடன் பதற்றத்தை அதிகரித்துள்ளது. வெனிசுவலா அரசு, “இது ஆக்கிரமிப்பு” என்று கண்டித்துள்ளது. லத்தீன் அமெரிக்க நாடுகள், ஐ.நா. உள்ளிட்ட சர்வதேச அமைப்புகள் கண்டனம் தெரிவித்துள்ளன.

 அமெரிக்க காங்கிரஸில் ஜனநாயகக் கட்சி, “இது போர் அறிவிப்பு போன்றது” என்று விமர்சித்து, தாக்குதல்களை நிறுத்தக் கோரியுள்ளது. ஆனால், டிரம்ப் அரசு, “இது ‘அக்ரெஷன்’ (Aggression) அல்ல, போதை ஒழிப்பு” என்று வாதிடுகிறது.

டிரம்ப், “அமெரிக்காவை போதைப்பொருள் நசுக்கக் கூடாது” என்று கூறி, இந்தத் தாக்குதல்களை ‘ஹோம்லாண்ட் ப்ரொடெக்ஷன்’ (Homeland Protection) என்று நியாயப்படுத்துகிறார். 

வெனிசுவலாவில் ஏற்கனவே பொருளாதார நெருக்கடி உள்ள நிலையில், இந்தத் தாக்குதல்கள் பிராந்தியப் போரைத் தூண்டலாம் என விமர்சகர்கள் எச்சரிக்கின்றனர். அமெரிக்க கடற்படை கரீபியனில் படகுகள், விமானங்கள் குவிக்கப்பட்டுள்ளன.

இதையும் படிங்க: 8 நோபல் பரிசு கிடைச்சிருக்கணும்!! எனக்கு பேராசைலாம் இல்ல! புலம்பி தவிக்கும் ட்ரம்ப்!