மத்திய உள்துறை அமைச்சரும் பாஜகவின் மூத்த தலைவருமான அமித் ஷா, 2 நாள் சுற்றுப்பயணமாக டெல்லியில் இருந்து தனி விமானம் மூலம் நேற்று இரவு 11 மணியளவில் திருச்சி விமான நிலையத்துக்கு வந்தடைந்தார். 

விமான நிலையத்தில் பாஜக மாநில தலைவர் நயினார் நாகேந்திரன், முன்னாள் மத்திய அமைச்சர் பொன். ராதாகிருஷ்ணன், திருச்சி மாவட்ட தலைவர் ஒண்டிமுத்து உள்ளிட்ட முக்கிய நிர்வாகிகள் உற்சாக வரவேற்பு அளித்தனர். 

வரவேற்பு நிகழ்ச்சி முடிந்ததும் அமித் ஷா திருச்சி கலெக்டர் அலுவலக சாலையில் உள்ள தனியார் நட்சத்திர விடுதியில் தங்கினார். அவருடன் மத்திய அமைச்சர்கள் எல். முருகன் மற்றும் மன்சுக் மாண்டவியா ஆகியோரும் வந்திருந்தனர்.

இதையும் படிங்க: சைலண்டாக அமித்ஷாவை பார்த்த விஜயின் நலம்விரும்பி!! விரைவில் ரிலீஸாகிறது ஜனநாயகன்! டெல்லி க்ரீன் சிக்னல்!

இன்று (பிப்ரவரி 14) காலை 11 மணிக்கு புதுச்சேரி மாநிலத்தின் காரைக்காலில் பாஜக சார்பில் பிரம்மாண்ட தேர்தல் பிரசார பொதுக்கூட்டம் நடைபெறுகிறது. இதில் கலந்துகொண்டு அமித் ஷா மக்களுக்கு உரையாற்ற உள்ளார். 

இந்த கூட்டம் புதுச்சேரி சட்டமன்றத் தேர்தலை முன்னிட்டு மிக முக்கியத்துவம் வாய்ந்ததாக கருதப்படுகிறது. ஏப்ரல் மாதத்தில் நடைபெறவுள்ள தேர்தலில் ஆளும் என்.ஆர். காங்கிரஸ் - பாஜக கூட்டணியை வலுப்படுத்தும் வகையில் இந்த பொதுக்கூட்டம் அமையும் என எதிர்பார்க்கப்படுகிறது. காரைக்கால் பகுதியில் உள்ள 5 தொகுதிகளிலும் வெற்றி பெறுவதற்கு தீவிர முயற்சிகள் மேற்கொள்ளப்பட்டு வருகின்றன.

பொதுக்கூட்ட நிகழ்ச்சிகள் முடிந்த பிறகு, புதுச்சேரி முதலமைச்சர் என். ரங்கசாமியை அமித் ஷா தனியாக சந்தித்து முக்கிய ஆலோசனை நடத்த உள்ளார். இந்த சந்திப்பில் சட்டசபை தேர்தலுக்கான கூட்டணி விரிவாக்கம், மற்ற கட்சிகளை இணைப்பது மற்றும் தொகுதி பங்கீடு குறித்து விரிவான விவாதம் நடைபெறும். 

ஏற்கனவே பாஜக - என்.ஆர். காங்கிரஸ் கூட்டணியில் அ.தி.மு.க. மற்றும் லட்சிய ஜனநாயக கட்சி இணைந்து போட்டியிடுவது உறுதியாகியுள்ளது. இந்த கட்சிகளுக்கு எத்தனை தொகுதிகள் ஒதுக்குவது, பாஜகவும் என்.ஆர். காங்கிரஸும் எத்தனை தொகுதிகளில் நேரடியாக போட்டியிடுவது என்பது இன்றைய ஆலோசனையில் இறுதி செய்யப்படும் என தகவல்கள் தெரிவிக்கின்றன.

புதுச்சேரி தேர்தலில் வலுவான கூட்டணியை உருவாக்கி ஆட்சியை தக்கவைப்பதே இப்போதைய இலக்கு. அமித் ஷாவின் இந்த பயணம் தேர்தல் களத்தை சூடுபிடிக்கச் செய்துள்ளது. மக்கள் மத்தியில் பெரும் எதிர்பார்ப்பை ஏற்படுத்தியுள்ளது. தமிழகத்திலும் புதுச்சேரியிலும் பாஜகவின் தேர்தல் உத்திகள் வேகமெடுத்து வருகின்றன.

இதையும் படிங்க: பாஜ தேசிய தலைவராக நிதின் நபின் பொறுப்பேற்பு! பிரதமர் மோடி, ஜெ.பி. நட்டா உள்ளிட்டோர் வாழ்த்து!!