ஈரானில் நிலவி வரும் பதற்றமான சூழல் மற்றும் அரசுக்கு எதிரான மக்கள் போராட்டங்கள் தீவிரமடைந்துள்ளதைக் கருத்தில் கொண்டு, இந்தியக் குடிமக்கள் அந்த நாட்டிற்குச் செல்வதைத் தவிர்க்க வேண்டும் என மத்திய வெளியுறவு அமைச்சகம் அறிவுறுத்தியுள்ளது.

ஈரானில் தற்போது ஏற்பட்டுள்ள உள்நாட்டுப் பாதுகாப்பு அச்சுறுத்தல்கள் காரணமாக, மறு உத்தரவு வரும் வரை இந்தியர்கள் அத்தியாவசியமற்ற பயணங்களைத் தவிர்க்குமாறு கேட்டுக்கொள்ளப்பட்டுள்ளனர். ஈரானின் பல்வேறு நகரங்களில் போராட்டக்காரர்களுக்கும் பாதுகாப்புப் படையினருக்கும் இடையே மோதல்கள் வலுத்து வருவதால், அங்குள்ள இந்தியர்களின் பாதுகாப்பை உறுதி செய்யும் பொருட்டு இந்த  அலர்ட் விடுக்கப்பட்டுள்ளது. ஏற்கனவே ஈரானில் தங்கியிருக்கும் இந்தியர்கள் தங்களது நடமாட்டத்தைக் குறைத்துக் கொள்ளவும், அங்குள்ள இந்தியத் தூதரகத்துடன் தொடர்பில் இருக்குமாறும் வெளியுறவு அமைச்சகம் அறிவுறுத்தியுள்ளது.

ஈரானில் அரசுக்கு எதிராக மக்கள் திரண்டு நடத்தி வரும் போராட்டங்கள் கட்டுக்கடங்காமல் சென்று கொண்டிருப்பதாகத் தகவல்கள் தெரிவிக்கின்றன. இதனால் பொதுப் போக்குவரத்து, தகவல் தொடர்பு உள்ளிட்ட அடிப்படைச் சேவைகள் பாதிக்கப்பட்டுள்ளன. இந்த அசாதாரணச் சூழலைத் தொடர்ந்து, இந்தியத் தூதரகம் வெளியிட்டுள்ள அறிவிப்பில், "ஈரானில் இருக்கும் இந்திய மாணவர்கள் மற்றும் பணியாளர்கள் மிகுந்த எச்சரிக்கையுடன் இருக்க வேண்டும்; போராட்டங்கள் நடைபெறும் இடங்களுக்குச் செல்வதைத் தவிர்க்க வேண்டும்" எனக் குறிப்பிடப்பட்டுள்ளது. அத்தியாவசியத் தேவைகளுக்கு மட்டுமே வெளியே வர வேண்டும் என்றும், எமர்ஜென்சி சூழலில் தூதரகத்தை அணுகலாம் என்றும் கூறப்பட்டுள்ளது.

இதையும் படிங்க: சரிவை கண்ட ஈரானிய 'ரியால்'..!! மத்திய வங்கி ஆளுநர் ராஜினாமா..!! வெடிக்கும் போராட்டங்கள்..!!

மத்திய வெளியுறவு அமைச்சகத்தின் இந்த அறிவுறுத்தல், சுற்றுலா மற்றும் வணிக ரீதியாக ஈரான் செல்லத் திட்டமிட்டிருந்த இந்தியர்களிடையே பெரும் தாக்கத்தை ஏற்படுத்தியுள்ளது. சர்வதேச அளவில் நிலவும் அரசியல் மாற்றங்களுக்கு மத்தியில், ஈரானின் உள்நாட்டு விவகாரங்கள் மோசமடைந்து வருவதால் இந்த முன்னெச்சரிக்கை நடவடிக்கை எடுக்கப்பட்டுள்ளது. ஈரானில் உள்ள நிலைமைகளை இந்திய அரசு தொடர்ந்து ‘கழுகுப் பார்வை’யுடன் கண்காணித்து வருவதாகவும், தேவைப்பட்டால் இந்தியர்களை மீட்பதற்கான சிறப்பு விமானங்கள் குறித்து ஆலோசிக்கப்படும் என்றும் அரசு வட்டாரங்கள் தெரிவிக்கின்றன. ஈரான் பயணம் குறித்த இந்தத் தடை உத்தரவு, அடுத்தகட்ட அறிவிப்பு வரும் வரை அமலில் இருக்கும் என்று தெரிவிக்கப்பட்டுள்ளது.

இதையும் படிங்க: பாதுகாப்பே இல்ல... கேட் கீப்பர் கத்தியால் தாக்கப்பட்ட சம்பவம்... ரயில்வே ஊழியர்கள் உள்ளிருப்பு போராட்டம்...!