தமிழக அரசியலில் திமுக தலைமையிலான கூட்டணியில் இருந்து வரும் விடுதலை சிறுத்தைகள் கட்சி (வி.சி.க.), கேரளாவில் பெரும் திருப்பத்தை ஏற்படுத்தியுள்ளது. கேரளாவில் வரும் சட்டசபை தேர்தலில் மார்க்சிஸ்ட் கம்யூனிஸ்ட் கட்சி தலைமையிலான இடதுசாரி ஜனநாயக முன்னணி (எல்டிஎஃப்) கூட்டணியில் இணைந்து போட்டியிட வி.சி.க. முடிவு செய்துள்ளது. 

இதன்மூலம் கேரளாவில் காங்கிரஸ் கட்சிக்கு எதிரான நிலைப்பாட்டை வி.சி.க. எடுத்துள்ளது. இது தமிழக-கேரளா அரசியலில் பெரும் விவாதத்தை ஏற்படுத்தியுள்ளது.

தமிழகத்தில் திமுக, காங்கிரஸ், கம்யூனிஸ்ட் கட்சிகள், வி.சி.க. ஆகியவை ஒரே கூட்டணியில் உள்ளன. ஆனால் கேரளாவில் கம்யூனிஸ்ட் கட்சிகள் (எல்டிஎஃப்) ஆட்சியில் இருக்க, காங்கிரஸ் தலைமையிலான ஐக்கிய ஜனநாயக முன்னணி (யுடிஎஃப்) பிரதான எதிர்க்கட்சியாக உள்ளது. இந்த இரு துருவங்களுக்கு இடையே வி.சி.க. எல்டிஎஃப் பக்கம் சேர்ந்துள்ளது. கட்சித் தலைவர் திருமாவளவன் கேரளாவில் காங்கிரஸ், பாஜக கட்சிகளை எதிர்த்து பிரசாரம் மேற்கொள்ள உள்ளார்.

இதையும் படிங்க: "உச்சந்தலையில் பேரிடி..கூட்டணி உடையும்"... தேமுதிக இணைவு குறித்து திருமா கொடுத்த ரியாக்‌ஷன்...! 

வி.சி.க. நிர்வாகிகள் கூறுகையில், “கேரளாவில் முதல்வர் பினராயி விஜயன் பங்கேற்ற நிகழ்ச்சியில் திருமாவளவன் கலந்து கொண்டார். பின்னர் இருவரும் சந்தித்து கூட்டணி குறித்து விவாதித்தனர். தமிழகம், புதுச்சேரி போல கேரளாவிலும் வி.சி.க. போட்டியிடும். குறிப்பாக தமிழர்கள் அதிகம் வசிக்கும் மூணாறு போன்ற தொகுதிகளை ஒதுக்குமாறு கேட்டுள்ளோம்” என்றனர்.

வி.சி.க. தமிழகத்துடன் கேரளா, மகாராஷ்டிரா, கர்நாடகா உள்ளிட்ட மாநிலங்களில் கட்சியை விரிவுபடுத்தி வருகிறது. அங்கு நிர்வாகிகளை நியமித்து, திருமாவளவன் பொதுக்கூட்டங்களில் பங்கேற்று கட்சியை வளர்த்து வருகிறார். கேரளாவில் எல்டிஎஃப் கூட்டணி மூலம் வி.சி.க. தனது செல்வாக்கை விரிவாக்க முயல்கிறது.

இந்த முடிவு தமிழகத்தில் திமுக-காங்கிரஸ் கூட்டணியில் சலசலப்பை ஏற்படுத்தலாம். காங்கிரஸ் தரப்பில் இதற்கு இதுவரை எந்த அதிகாரப்பூர்வ பதிலும் வரவில்லை. ஆனால் அரசியல் வட்டாரங்களில் வி.சி.க.வின் இந்த நகர்வு 2026 தேர்தலில் தென்னிந்திய அரசியலை பாதிக்கும் என கருதப்படுகிறது. திருமாவளவன் தலைமையில் வி.சி.க. தேசிய அளவில் வளர்ச்சி காணும் நிலையில், இந்த கூட்டணி முடிவு கட்சிக்கு புதிய வாய்ப்புகளை திறக்கும் என எதிர்பார்க்கப்படுகிறது.

இதையும் படிங்க: திமுக கூட்டணியில் தேமுதிக... அரசியல் எதிரிகளின் அடிவயிறு எரியும்..!! - திருமா. தாக்கு..!!