பீகார் மாநில சட்டமன்றத் தேர்தலின் முதற்கட்ட வாக்குப்பதிவு நேற்று (நவம்பர் 6) நடைபெற்றது. இதில், இதுவரை இல்லாத அளவுக்கு 64.66 சதவீத வாக்குகள் பதிவாகியுள்ளதாக இந்திய தேர்தல் ஆணையம் (ECI) அறிவித்துள்ளது. இது 1951க்குப் பிறகு பீகார் தேர்தல் வரலாற்றில் உயர்ந்த வாக்குப்பதிவு சதவீதமாகும்.

இதற்கு முன், 2000-ஆம் ஆண்டு சட்டமன்றத் தேர்தலில் 62.57 சதவீதமும், 1998-ஆம் ஆண்டு நாடாளுமன்றத் தேர்தலில் 64.6 சதவீதமும் பதிவாகியிருந்தது. 2020 சட்டமன்றத் தேர்தலின் முதல் கட்டத்தில் 57.29 சதவீதமே வாக்குப்பதிவு நடந்தது. இந்த முறை 7.37 சதவீதம் அதிகரிப்பு ஏற்பட்டுள்ளது. தலைமைத் தேர்தல் அதிகாரி ஞானேஷ் குமார், "1951க்குப் பிறகு இது வரலாற்று சாதனை. வாக்காளர்களின் உற்சாகமும், தேர்தல் இயந்திரத்தின் வெளிப்படைத்தன்மையும் இதற்குக் காரணம்", பீகார் மாநிலத்தில் அமைதியாக நடந்து முடிந்த முதற்கட்ட வாக்குப்பதிவுக்கு வாக்காளர்களுக்கு நன்றி என்று கூறினார்.

இந்த சாதனை, வாக்காளர்களின் உற்சாகத்தையும், ஜனநாயகத்தில் அவர்களின் ஈடுபாட்டையும் எடுத்துக்காட்டுகிறது. முதற்கட்டத்தில் 121 சட்டமன்றத் தொகுதிகளில் வாக்குப்பதிவு நடைபெற்றது. மொத்தம் 3.75 கோடிக்கும் மேற்பட்ட வாக்காளர்கள் உள்ள 18 மாவட்டங்களில், 45,341 வாக்குச்சாவடிகளில் அதே நேரத்தில் வாக்குப்பதிவு தொடங்கியது. முசாஃபர்பூர் மாவட்டம் உயர்ந்த வாக்குப்பதிவை (70.96%) பதிவு செய்துள்ளது. அதேசமயம் பிற மாவட்டங்களிலும் கணிசமான ஏற்றம் காணப்பட்டது. 2000ஆம் ஆண்டு தேர்தலில் 62.57 சதவீதமாக இருந்த வாக்குச் சதவீதம் இப்போது மீண்டும் உயர்ந்துள்ளது. 

இதையும் படிங்க: பீகார் சட்டமன்றத் தேர்தல் 2025: முதல்கட்டமாக 121 தொகுதிகளில்.. வாக்குப்பதிவு விறுவிறு..!!

சமஸ்திபூர் 70.63 சதவீதம், மாதேபுரா 67.21 சதவீதம், வைஷாலி 67.37 சதவீதம், சஹர்சா 66.84 சதவீதம், ககாரியா 66.36 சதவீதம், லக்கிசராய் 65.05 சதவீதம், முங்கர் 60.40 சதவீதம், சிவான் 60.31 சதவீதம், நாளந்தா 58.91 சதவீதம், மற்றும் பாட்னா 57.93 சதவீதம் பதிவு செய்துள்ளது. பட்டினா நகரப் பகுதிகளான பாங்கிபூர், திகா, கும்ரார் போன்றவற்றில் குறைந்த வாக்குப்பதிவு இருந்தது.

பெண் வாக்காளர்களின் பங்கேற்பு குறிப்பிடத்தக்கதாக இருந்தது, பல இடங்களில் அவர்கள் ஆர்வமுடன் வரிசையில் நின்று வாக்குகளைப் பதிவு செய்தனர். தேர்தல் ஆணையத்தின் தலைமை தேர்தல் ஆணையர் ஞானேஷ் குமார் உள்ளிட்ட பலர் வாக்குப்பதிவை நெருக்கமாக கண்காணித்தனர்.

வாக்குப்பதிவு பெரும்பாலும் அமைதியாக நடைபெற்றது என்றாலும், சில சம்பவங்கள் பதிவாகியுள்ளன. துணை முதல்வர் விஜய் குமார் சின்ஹாவின் வாகனத்தின் மீது தாக்குதல் நடந்ததாகவும், சாரன் மாவட்ட மஞ்சி தொகுதியில் கம்யூனிஸ்ட் கட்சி வேட்பாளரின் வாகனம் தாக்கப்பட்டதாகவும் புகார் எழுந்தன. இருப்பினும், தேர்தல் ஆணையம் எந்தவித பெரிய அசம்பாவிதங்களும் இல்லை என உறுதிப்படுத்தியுள்ளது. மாலை 5 மணி வரை 60.13% வாக்குப்பதிவு பதிவானது, இறுதியில் 64.66% ஆக உயர்ந்தது.

இந்த உயர்ந்த வாக்குப்பதிவு குறித்து அரசியல் ஆய்வாளர் பிரசாந்த் கிஷோர் கருத்து தெரிவித்துள்ளார். "மாற்றம் வருகிறது" என்று அவர் கூறியுள்ளார், இது பீகாரின் அரசியல் சூழலை மாற்றக்கூடும் என அவர் சுட்டிக்காட்டினார். தேசிய ஜனநாயக கூட்டணி (NDA) மற்றும் மகாகத்பந்தன் (Mahagathbandhan) இடையே கடும் போட்டி நிலவுகிறது. பாஜக, காங்கிரஸ், RJD போன்ற கட்சிகள் தீவிர பிரச்சாரம் செய்தன.

அடுத்த கட்ட வாக்குப்பதிவு நவம்பர் 11ம் தேதி அன்று 122 தொகுதிகளில் நடைபெறும். வாக்கு எண்ணிக்கை நவம்பர் 14ம் தேதி அன்று நடைபெறும். 85 வயதுக்கு மேற்பட்ட 2 லட்சத்திற்கும் மேற்பட்டோர் வாக்கு பதிவு செய்துள்ளனர். இந்த உயர்ந்த வாக்குப்பதிவு, பீகாரின் ஜனநாயக வலிமையை வெளிப்படுத்துகிறது மற்றும் அரசியல் கட்சிகளுக்கு புதிய சவால்களை ஏற்படுத்தியுள்ளது. 

இதையும் படிங்க: நெருங்கியது பீகார் சட்டசபை தேர்தல்..!! முதற்கட்டமாக 121 தொகுதிகளில் நாளை வாக்குப்பதிவு..!!