தமிழக சட்டமன்றத் தேர்தல் களம் மற்றும் அதன் அரசியல் தாக்கங்கள் குறித்துப் பல்வேறு விவாதங்கள் அனல் பறந்து வரும் வேளையில், இந்தியத் தேர்தல் ஆணையத்தால் முன்னெடுக்கப்பட்ட வாக்காளர் பட்டியல் சிறப்புத் தீவிர திருத்தப் பணிகளான SIR (Special Intensive Revision) நடைமுறையின் போது நிகழ்ந்த வாக்காளர் நீக்கங்களுக்கும், தேர்தல் முடிவுகளுக்கும் இடையே மிக நெருக்கமான தொடர்பு இருப்பதாகப் பிரபல ஆங்கில நாளிதழான 'தி இந்து பிசினஸ் லைன்' (The Hindu Business Line) வெளியிட்டுள்ள விரிவான ஆய்வுக் கட்டுரை பெரும் அரசியல் அதிர்வலைகளை ஏற்படுத்தியுள்ளது.

இதில், குறைந்த எண்ணிக்கையில் வாக்காளர்கள் நீக்கப்பட்ட தொகுதிகளில் திமுகவும், பெருமளவில் வாக்காளர்கள் நீக்கப்பட்ட தொகுதிகளில் தவெகவும் முன்னிலை பெற்று வெற்றி கண்டுள்ளதாக அப்புள்ளிவிவரங்கள் படம்பிடித்துக் காட்டியுள்ளன.

பிசினஸ் லைன் வெளியிட்டுள்ள தரவுப் பகுப்பாய்வின்படி, 2026 சட்டமன்றத் தேர்தலுக்கு முன்னதாக மேற்கொள்ளப்பட்ட வாக்காளர் பட்டியல் சரிபார்ப்பு நடவடிக்கையின் போது, சுமார் 20,000 முதல் 80,000 வரை வாக்காளர்கள் அதிகளவில் நீக்கப்பட்ட 135 முக்கியத் தொகுதிகளில், தமிழக வெற்றிக் கழகம் (தவெக) மட்டுமே தனித்து 84 தொகுதிகளில் அபார வெற்றி பெற்றுள்ளது கண்டறியப்பட்டுள்ளது; இதற்கு நேர்மாறாக, குறைந்த அளவிலான வாக்காளர்கள் மட்டுமே சரிபார்க்கப்பட்டு நீக்கப்பட்ட தொகுதிகளில் ஆளும் திராவிட முன்னேற்றக் கழகம் (திமுக) தனக்கான வெற்றியைத் தக்கவைத்துக் கொண்டுள்ளது.

இதையும் படிங்க: SIR விவகாரம்! அக்டோபர் 15-ல் சென்னையில் இந்தியா கூட்டணி மெகா போராட்டம்! முதல்வர் விஜய்க்கும் அழைப்பு?!

மேலும், கடந்த 2021 சட்டமன்றத் தேர்தலில் திமுக கூட்டணி மாபெரும் வெற்றியைப் பதிவு செய்த தொகுதிகளை ஆய்வு செய்ததில் மற்றொரு ஆச்சரியமூட்டும் உண்மை தெரியவந்துள்ளது; அதாவது, கடந்த முறை திமுக அமோக வாக்கு வித்தியாசத்தில் வெற்றி பெற்ற தொகுதிகளில் மட்டும் இம்முறை தொகுதிக்குச் சராசரியாக 31,454 வாக்காளர்களின் பெயர்கள் வாக்காளர் பட்டியலிலிருந்து நீக்கப்பட்டுள்ளன.

நகர்ப்புறங்கள் மற்றும் புறநகர்ப் பகுதிகளில் இடம்பெயர்ந்த வாக்காளர்கள், போலிப் பதிவுகள், இரட்டைப் பதிவுகள் மற்றும் இறந்தவர்களின் பெயர்களை நீக்குவதாகக் கூறி தேர்தல் ஆணையம் மேற்கொண்ட இந்த அதிரடித் தூய்மைப்படுத்தல் நடவடிக்கையே பல தொகுதிகளின் வெற்றி தோல்வியைத் தீர்மானிக்கும் முக்கியக் காரணியாக மாறியுள்ளதாக அந்த ஆய்வில் சுட்டிக்காட்டப்பட்டுள்ளது.

திமுகவின் பாரம்பரிய மற்றும் பலமான வாக்கு வங்கியாகக் கருதப்பட்ட பகுதிகளில் இத்தனை பல்லாயிரக்கணக்கான வாக்காளர்கள் நீக்கப்பட்டதும், அதே தொகுதிகளில் புதிய சக்தியாகக் களம் கண்ட தவெக அமோக வெற்றிகளை அறுவடை செய்திருப்பதும் அரசியல் விமர்சகர்கள் மற்றும் தேர்தல் வல்லுநர்களிடையே பெரும் விவாதப் பொருளாக உருவெடுத்துள்ளது.

 இந்த வாக்காளர் நீக்கம் தற்செயலான தேர்தல் ஆணையத்தின் வழக்கமான நிர்வாக நடைமுறையா அல்லது தேர்தல் களத்தின் போக்கையே புரட்டிப்போட்ட மறைமுகத் திருப்புமுனையா என்ற காரசாரமான விவாதங்கள் தற்போது சமூக வலைத்தளங்களிலும் அரசியல் வட்டாரங்களிலும் காட்டுத்தீயாகப் பரவி வருகின்றன.

இதையும் படிங்க: வெடிக்கும் SIR விவகாரம்..! தேர்தல் ஆணையத்தை முற்றுகையிட்டு போராட்டம்... இந்தியா கூட்டணி முடிவு..!!