தமிழக சட்டசபை தேர்தல் 2026-இல் தி.மு.க. கூட்டணியில் தொகுதி பங்கீடு சிக்கலால் கம்யூனிஸ்ட் கட்சிகள் கடுப்பில் உள்ளன. இந்திய கம்யூனிஸ்ட் கட்சிக்கு (சிபிஐ) 4 தொகுதிகள், மார்க்சிஸ்ட் கம்யூனிஸ்ட் கட்சிக்கு (சிபிஎம்) 5 தொகுதிகள் மட்டுமே ஒதுக்கப்படும் என்று தி.மு.க. தரப்பு கறார் காட்டியுள்ளது. இதனால் கோபமடைந்த இரு கட்சிகளும் தனித்தனியே நிர்வாகக் குழு கூட்டம் கூட்டி முடிவெடுக்க உள்ளன.

2021 சட்டசபை தேர்தலில் இரு கம்யூனிஸ்ட் கட்சிகளுக்கும் தலா 6 தொகுதிகள் ஒதுக்கப்பட்டன. ஆனால் சிபிஐ 2 தொகுதிகளிலும், சிபிஎம் 2 தொகுதிகளிலும் மட்டுமே வெற்றி பெற்றன.

இதனால் வரும் தேர்தலில் தொகுதிகளை குறைத்து ஒதுக்க தி.மு.க. முடிவு செய்துள்ளது. கூட்டணியில் கட்சிகள் எண்ணிக்கை அதிகரித்துள்ளதால், இதற்கு மேல் தர இயலாது என்று தி.மு.க. குழுவினர் உறுதியாக தெரிவித்துள்ளனர்.

இதையும் படிங்க: விருத்தாசலமா? விருகம்பாக்கமா? குழம்பி தவிக்கும் பிரேமலதா? தேமுதிக சார்பில் போட்டி எங்கே?

தொகுதி பங்கீடு குறித்து இரு கம்யூனிஸ்ட் கட்சிகளின் குழுவினர் தி.மு.க. குழுவுடன் இரண்டு முறை பேச்சு நடத்தினர். சிபிஐ 7 தொகுதிகளும், சிபிஎம் 10 தொகுதிகள் (இரட்டை இலக்கம்) கேட்டன.

ஆனால் தி.மு.க. தரப்பில் தலா 4-5 தொகுதிகள் மட்டுமே தர முடியும் என்று கூறியது. இதனால் பேச்சு முறிந்தது. தி.மு.க.வுடன் மேலும் பேச்சு நடத்தாமல் அடம்பிடித்து வரும் இரு கட்சிகளும் தங்கள் நிர்வாகக் குழு கூட்டத்தில் இறுதி முடிவு எடுக்க உள்ளன.

இன்று காலை மார்க்சிஸ்ட் கம்யூனிஸ்ட் கட்சியின் நிர்வாகக் குழு கூட்டம் நடைபெறுகிறது. நாளை இந்திய கம்யூனிஸ்ட் கட்சியின் நிர்வாகக் குழு கூட்டம் நடக்கிறது. கூட்டணியில் தொடரலாமா, வெளியேறலாமா, தனித்து போட்டியிடலாமா என்பது குறித்து இந்த கூட்டங்களில் முடிவு எடுக்கப்படும் என்று கட்சி வட்டாரங்கள் தெரிவிக்கின்றன.

தி.மு.க. கூட்டணியில் காங்கிரஸ், விசிக, தேமுதிக, மதிமுக உள்ளிட்ட கட்சிகளுக்கு அதிக தொகுதிகள் ஒதுக்கப்பட்டுள்ள நிலையில், கம்யூனிஸ்ட் கட்சிகளுக்கு குறைவாக ஒதுக்குவது தொடர்பான இந்த முடிவு கூட்டணியில் புதிய பதற்றத்தை ஏற்படுத்தியுள்ளது.

இரு கட்சிகளும் கூட்டணியை விட்டு வெளியேறினால் தி.மு.க.வுக்கு தென் மாவட்டங்களில் தாக்கம் ஏற்படும் என்று அரசியல் வட்டாரங்கள் கருதுகின்றன. தேர்தல் அறிவிப்பு நெருங்கும் நிலையில் இந்த பிரச்னை தி.மு.க. கூட்டணியின் வலிமையை சோதிக்கும் சூழலை உருவாக்கியுள்ளது.

இதையும் படிங்க: டெல்லி கிளம்பிய விஜய்! சென்னையில் அவசர கூட்டம்! கூட்டணி குறித்து ஆலோசிக்கும் தவெக!