தமிழக அரசியலில் முன்னாள் அமைச்சர்கள் மீதான சட்ட நடவடிக்கைகள் மீண்டும் கவனத்தை ஈர்த்துள்ளன. தவெக அரசு பொறுப்பேற்று இரண்டு மாதங்கள் கூட நிறைவடையாத நிலையில், திருச்செந்தூர் தொகுதி திமுக எம்எல்ஏவும் முன்னாள் அமைச்சருமான அனிதா ராதாகிருஷ்ணன் கைது செய்யப்பட்டிருப்பது அரசியல் வட்டாரங்களில் பரபரப்பை ஏற்படுத்தியுள்ளது. இதேவேளை, முன்னாள் அமைச்சர் எ.வ. வேலுவுக்கு தொடர்புடையதாக கூறப்படும் இடங்களில் லஞ்ச ஒழிப்புத்துறை அதிகாரிகள் சோதனை நடத்தியிருப்பதும் விவாதத்திற்கு உள்ளாகியுள்ளது.

கடந்த ஜூன் 20-ஆம் தேதி நடைபெற்ற திமுக பொதுக்கூட்டத்தில் அனிதா ராதாகிருஷ்ணன் பேசிய உரையில், தமிழக முதல்வர் விஜய் குறித்து அவதூறான கருத்துகளை தெரிவித்ததாக குற்றச்சாட்டு எழுந்தது. இதையடுத்து தவெக நிர்வாகிகள் ஆத்தூர் காவல் நிலையத்தில் புகார் அளித்தனர். அந்த புகாரின் அடிப்படையில் போலீசார் வழக்குப்பதிவு செய்து விசாரணையை தொடங்கினர்.

இதற்கிடையில், கைது நடவடிக்கையை தவிர்க்கும் நோக்கில் அனிதா ராதாகிருஷ்ணன் சென்னை உயர்நீதிமன்றத்தில் முன்ஜாமீன் கோரி மனு தாக்கல் செய்தார். எனினும், அந்த மனுவை நீதிமன்றம் தள்ளுபடி செய்தது. நீதிமன்றத்தின் உத்தரவு வெளியான சுமார் 90 நிமிடங்களுக்குள் போலீசார் அவரை கைது செய்தனர். இந்த வேகமான நடவடிக்கை அரசியல் கட்சிகளிடையே பல்வேறு கருத்துகளை உருவாக்கியுள்ளது.

இதையும் படிங்க: மாநில உரிமைகளை தாரை வார்த்த தவெக அரசு! ஆளுநர் அர்லேகர் மதுரை ஆய்வுக்கு உதயநிதி ஸ்டாலின் கண்டனம்!

திமுகவினர், அவதூறு தொடர்பான வழக்குகளில் இதற்கு முன்பு திமுக அல்லது அதிமுக ஆட்சிக் காலங்களில் கைது நடவடிக்கைகள் அரிதாகவே மேற்கொள்ளப்பட்டதாக சுட்டிக்காட்டுகின்றனர். எனவே, தற்போதைய கைது நடவடிக்கை அரசியல் ரீதியாகவும் பரவலாக பேசப்பட்டு வருகிறது.

மறுபுறம், கடந்த ஐந்து ஆண்டுகால திமுக ஆட்சியில் முன்னாள் அமைச்சர்கள் மீது மேற்கொள்ளப்பட்ட கைது நடவடிக்கைகள் எண்ணிக்கையில் குறைவாக இருந்ததாக அரசியல் பார்வையாளர்கள் குறிப்பிடுகின்றனர். 2022 ஜனவரியில், ஆவின் நிறுவனத்தில் வேலை வாங்கித் தருவதாக கூறி மோசடி செய்ததாக பதிவு செய்யப்பட்ட வழக்கில் முன்னாள் அமைச்சர் கே.டி. ராஜேந்திர பாலாஜி கர்நாடகாவில் கைது செய்யப்பட்டார். அதே ஆண்டு பிப்ரவரியில், திமுக தொண்டரை தாக்கியதாக பதிவு செய்யப்பட்ட வழக்கில் முன்னாள் அமைச்சர் டி. ஜெயக்குமார் சென்னை போலீசாரால் கைது செய்யப்பட்டு பின்னர் நீதிமன்றக் காவலுக்கு அனுப்பப்பட்டார். தொடர்ந்து, 2024 ஜூலையில் கரூரில் சுமார் ரூ.100 கோடி மதிப்பிலான நில அபகரிப்பு புகாரின் அடிப்படையில் முன்னாள் அமைச்சர் எம்.ஆர். விஜயபாஸ்கரை சிபிசிஐடி அதிகாரிகள் கைது செய்தனர்.

இந்த நிலையில், புதிய ஆட்சியின் தொடக்கத்திலேயே முன்னாள் அமைச்சர்கள் மீது அடுத்தடுத்து மேற்கொள்ளப்படும் சட்ட நடவடிக்கைகள் தமிழக அரசியலில் புதிய விவாதங்களை உருவாக்கியுள்ளன. இந்நடவடிக்கைகள் சட்டத்தின் அடிப்படையிலானவையா அல்லது அரசியல் நோக்கத்துடன் மேற்கொள்ளப்படுகின்றனவா என்பது குறித்து ஆளும் மற்றும் எதிர்க்கட்சிகள் இடையே கருத்து வேறுபாடுகள் தொடர்ந்து நிலவி வருகின்றன. 

இதையும் படிங்க: சென்னை ஆழ்வார்பேட்டை இல்லத்தில் திமுக மறுசீரமைப்பு குழுவுடன் மு.க.ஸ்டாலின் ஆலோசனை!