பாட்டாளி மக்கள் கட்சியில் (பா.ம.க.) நீண்டகாலமாக நிலவி வரும் உட்கட்சி பூசல் மேலும் தீவிரமடைந்துள்ளது. கட்சி நிறுவனர் டாக்டர் ராமதாஸ், முன்னாள் தலைவர் அன்புமணி ராமதாஸை கடுமையாக விமர்சித்துள்ளார். 

விழுப்புரம் மாவட்டம் திண்டிவனம் அருகே உள்ள தைலாபுரம் தோட்டத்தில் பெரியார் அவர்களின் 52-வது நினைவு நாளை முன்னிட்டு அவரது உருவச் சிலைக்கு மாலை அணிவித்து மரியாதை செலுத்தினார் டாக்டர் ராமதாஸ். இந்த நிகழ்ச்சியில் பா.ம.க.வின் பல்வேறு நிர்வாகிகள் கலந்துகொண்டனர்.

நிகழ்ச்சிக்குப் பிறகு செய்தியாளர்களை சந்தித்த டாக்டர் ராமதாஸ், அன்புமணி தரப்பினரின் அறிக்கைகளை கடுமையாக சாடினார். அன்புமணி தரப்பு தனது பொதுக்குழு செல்லாது என்று அறிக்கை வெளியிட்டிருப்பதை சுட்டிக்காட்டிய அவர், அவர்கள் "பொய்யர்கள், புரட்டர்கள்" என்று குற்றம்சாட்டினார். 

இதையும் படிங்க: ஜி.கே.மணி தொகுதியில் அன்புமணி போட்டி?! மல்லுக்கட்டும் தொண்டர்கள்!! பாமக-வில் மோதல் உச்சக்கட்டம்!

எது வேண்டுமானாலும் பொய் சொல்வார்கள் என்றும், அதைப் பற்றி கவலைப்பட வேண்டியதில்லை என்றும் தெரிவித்தார். கட்சியில் 99 சதவீத உறுப்பினர்கள் தனது பக்கமே உள்ளனர் என்று நம்பிக்கை தெரிவித்தார்.

மேலும், அன்புமணி பா.ம.க.வில் இல்லை என்று திட்டவட்டமாக கூறிய டாக்டர் ராமதாஸ், அவரை ஏற்கனவே கட்சியில் இருந்து நீக்கிவிட்டதாக அறிவித்தார். அன்புமணி எது வேண்டுமானாலும் பொய்களை பேசுவார் என்றும், வருகிற 29-ம் தேதி நடைபெறும் பொதுக்குழு செல்லாது என்று அறிவிக்க அவருக்கு எந்த உரிமையும் இல்லை என்றும் வலியுறுத்தினார்.

பா.ம.க.வில் கடந்த சில மாதங்களாக ராமதாஸ் - அன்புமணி இடையே மோதல் நிலவி வருகிறது. கட்சி தலைமை, பொதுக்குழு நடத்துதல் உள்ளிட்ட விவகாரங்களில் இரு தரப்பும் மாறுபட்ட கருத்துகளை கொண்டுள்ளன. 

இந்த சர்ச்சை நீதிமன்றம் வரை சென்றுள்ள நிலையில், ராமதாஸின் இந்த கடும் வார்த்தைகள் உட்கட்சி பிளவை மேலும் ஆழப்படுத்தியுள்ளதாக அரசியல் வட்டாரங்கள் கருதுகின்றன. 2026 சட்டமன்றத் தேர்தல் நெருங்கும் வேளையில் இந்த பூசல் கட்சியின் எதிர்காலத்தை பாதிக்கும் என்ற அச்சமும் எழுந்துள்ளது.

இதையும் படிங்க: அன்புமணியின் ஊழல் வழக்கை சிபிஐ விசாரிக்கணும்!! ராமதாஸ் தீர்மானம்! பாமகவில் முற்றும் மோதல்!