தமிழக அரசின் கலைஞர் மகளிர் உரிமைத் தொகை திட்டம் தொடர்பாக சமூக ஊடகங்களில் பரவி வரும் தவறான தகவல்களுக்கு மத்தியில், அரசு தரப்பில் தெளிவான மறுப்பு வெளியிடப்பட்டுள்ளது. சமீபத்தில், 1.31 கோடி தகுதியான பெண்களின் வங்கிக் கணக்குகளில் ஒரே நாளில் ரூ.5,000 தொகை வரவு வைக்கப்பட்டது பெரும் வரவேற்பைப் பெற்றது.

இத்தொகை, பிப்ரவரி, மார்ச், ஏப்ரல் மாதங்களுக்கான முன்பணமாக ரூ.3,000-உம், கோடைக்கால சிறப்புத் தொகுப்பாக ரூ.2,000-உம் சேர்த்து அமைந்துள்ளது. மொத்தம் ரூ.6,550 கோடி நிதி ஒரே நாளில் வழங்கப்பட்டது தமிழக வரலாற்றில் முன்னெப்போழும் நிகழாத சாதனையாகக் கருதப்படுகிறது.

இதையும் படிங்க: அக்கவுண்ட்ல இன்னும் ரூ.5000 வரலையா..?? அப்போ உடனே இத பண்ணுங்க..!! வெளியான முக்கிய தகவல்..!!

இந்நிலையில், “இத்தொகையை மாலைக்குள் வங்கியிலிருந்து எடுத்துவிடாவிட்டால் அரசே திருப்பி எடுத்துக்கொள்ளும்” என்ற வதந்தி பரவியது. இது முற்றிலும் பொய்யானது என தமிழ்நாடு அரசின் உண்மை சரிபார்ப்பு (TN Fact Check) பிரிவு அதிகாரப்பூர்வமாக மறுத்துள்ளது. அரசு இதுபோன்ற எந்த அறிவிப்பையும் வெளியிடவில்லை என்றும், இத்தகைய தவறான தகவல்களை பரப்ப வேண்டாம் என்றும் வலியுறுத்தியுள்ளது.

கலைஞர் மகளிர் உரிமைத் தொகை திட்டம் 2023-ஆம் ஆண்டு முதல் மாதாந்திர ரூ.1,000-ஆக வழங்கப்பட்டு வருகிறது. வரும் சட்டமன்றத் தேர்தல் சூழலில், சிலர் இத்திட்டத்தை தடுக்க முயல்வதாகக் கூறி, முதலமைச்சர் மு.க.ஸ்டாலின் முன்கூட்டியே இந்த நடவடிக்கையை மேற்கொண்டார். இதனால் பயனாளிகள் மிகுந்த மகிழ்ச்சியடைந்துள்ளனர்.

திமுக கூட்டணி கட்சிகள் இம்முயற்சியை பாராட்டி வருகின்றன. மேலும், திராவிட மாடல் ஆட்சி 2.0-இல் இத்தொகை ரூ.2,000-ஆக உயர்த்தப்படும் என முதல்வர் உறுதியளித்துள்ளார். இது பெண்களின் வாழ்வாதாரத்தை மேம்படுத்தும் முக்கிய திட்டமாக விளங்குகிறது. எனவே, வதந்திகளை நம்பாமல், அரசின் அதிகாரப்பூர்வ அறிவிப்புகளை மட்டுமே நம்ப வேண்டும்.

இதையும் படிங்க: இந்த ஒரு தகுதி இருந்தால் போதும்... விடுபட்ட மகளிருக்கு உடனே உரிமைத் தொகை கிடைக்கும்... அமைச்சர் அதிரடி அறிவிப்பு...!