அமெரிக்காவின் வெள்ளை மாளிகையில் நடைபெற்ற முக்கிய செயற்கை நுண்ணறிவு (ஏ.ஐ.) கூட்டத்தில், அமெரிக்க அதிபர் டொனால்ட் டிரம்ப் கூகுள் நிறுவனத்தின் சி.இ.ஓ. சுந்தர் பிச்சையை ‘அரக்கன்’ (monster) என குறிப்பிட்டு புகழ்ந்தார். இது நகைச்சுவையான பாராட்டாகவே அமைந்தது.

இந்த கூட்டத்தில் கூகுள் சி.இ.ஓ. சுந்தர் பிச்சை, மெட்டா சி.இ.ஓ. மார்க் ஜுக்கர்பெர்க், ஆந்த்ரோபிக் சி.இ.ஓ. டேரியோ அமோடி, என்விடியா சி.இ.ஓ. ஜென்சென் ஹுவாங், ஓப்பன் ஏ.ஐ. தலைவர் கிரெக் ப்ராக்மேன், எலான் மஸ்க் உள்ளிட்ட பெரும் தொழில்நுட்ப நிறுவனங்களின் தலைவர்கள் கலந்துகொண்டனர். ஏ.ஐ. பாதுகாப்பு, சுய கட்டுப்பாடு மற்றும் நவீன தொழில்நுட்பங்களை கண்காணிக்கும் கட்டமைப்பு குறித்து ஆலோசனைகள் நடைபெற்றன. 

தலைவர்கள் தன்னார்வ அடிப்படையிலான ‘வெள்ளை மாளிகை சூப்பர் இன்டெலிஜென்ஸ் ஒப்பந்தத்தில்’ கையெழுத்திட்டனர். இதில் உள் மற்றும் வெளி மதிப்பாய்வுகள், சுயாதீன தணிக்கைகள் போன்ற நடவடிக்கைகள் அடங்கும். டிரம்ப் இதை ‘தார்மீக ரீதியாக பிணைக்கும்’ ஒப்பந்தம் என வர்ணித்தார்.

இதையும் படிங்க: ஹார்முஸ் ஜலசந்தி இனி "டிரம்ப் ஜலசந்தி"!! பரபரப்பை கிளப்பிய டிரம்ப்!! ஈரானின் கோரிக்கை நிராகரிப்பு..!!

செய்தியாளர்கள் சந்திப்பில் டிரம்ப் சுந்தர் பிச்சையை அறிமுகப்படுத்தினார். “இவர் ஓர் அரக்கன். யாருக்கும் அது தெரியாது. என்ன ஒரு அற்புதமான வாழ்க்கை! அரக்கனாக இருந்து இந்த (மீடியா) தொல்லைகளை சந்திக்க வேண்டியதில்லை. உங்களுக்குத் தெரிந்திருக்க வேண்டியது சுந்தர் என்பது மட்டும்தான்” என அவர் கூறினார். சுந்தர் பிச்சை தலைகுனிந்து சிரித்துக்கொண்டே நின்றார். 

பின்னர் இந்திய பாணியில் கைகளை மடக்கி வணங்கி, “நான் அரக்கன் என்பதை விட சிறந்த குறிச்சொல் கிடைக்கும் என நம்புகிறேன்” என நகைச்சுவையாக பதிலளித்தார். டிரம்ப் சிரித்தபடி தட்டிக்கொடுத்து பாராட்டினார். தொழில்நுட்பத் துறையில் பிச்சையின் செல்வாக்கு மற்றும் வெற்றியை இந்த வார்த்தைகள் குறிக்கின்றன.

கூட்டத்தில் டிரம்ப் ஏ.ஐ.யை இனி ‘சூப்பர் இன்டெலிஜென்ஸ்’ (எஸ்.ஐ.) என அழைக்கப்படும் என அறிவித்தார். தொழில்நுட்பத் தலைவர்களுடன் இணைந்து அதிகாரப்பூர்வமாக பெயர் மாற்றம் செய்யப்பட்டதாக அவர் தெரிவித்தார். அரசு ஆவணங்களிலும் இதைப் பயன்படுத்த உத்தரவு பிறப்பிக்கப்பட்டுள்ளது. ஏ.ஐ. பாதுகாப்பு குறித்த சுய கட்டுப்பாட்டை டிரம்ப் வலியுறுத்தினார்.

இந்த நிகழ்வு தொழில்நுட்பத் துறையில் இந்திய வம்சாவளியினரின் செல்வாக்கை மீண்டும் உலக அரங்கில் உயர்த்தியுள்ளது. சுந்தர் பிச்சையின் அமைதியான ஆனால் சக்திவாய்ந்த தலைமைத்துவம் டிரம்ப்பின் புகழாரத்தால் மேலும் வெளிச்சம் பெற்றுள்ளது.

இதையும் படிங்க: ஊடகங்களுக்கு வெள்ளை மாளிகை தடை: அதிபர் ட்ரம்ப் உத்தரவை ரத்து செய்த அமெரிக்க நீதிமன்றம்!