மேற்காசியப் பகுதியில் நீடித்து வரும் போர் பதற்றத்தின் மத்தியில், ஹார்முஸ் ஜலசந்தி தொடர்பாக ஈரான் எடுத்துள்ள புதிய முடிவு சர்வதேச அளவில் முக்கிய கவனத்தை ஈர்த்துள்ளது. அமெரிக்கா மற்றும் இஸ்ரேல் இணைந்து ஈரான் மீது போர் தொடுத்ததைத் தொடர்ந்து, கடந்த 25 நாட்களுக்கும் மேலாக மோதல் தீவிரமாக நீடித்து வருகிறது.

அணு ஆயுத தடை ஒப்பந்தத்தில் ஈரான் இணங்காததால் இந்த மோதல் உருவானது. அதனைத் தொடர்ந்து, அமெரிக்கா மேற்கொண்ட தாக்குதல்களுக்கு பதிலடியாக, வளைகுடா நாடுகளில் உள்ள அமெரிக்க ராணுவ தளங்கள் மீது ஈரான் தாக்குதல் நடத்தி வருகிறது. இந்த சூழலில், உலக வர்த்தகத்திற்கு முக்கியமான கடற்பாதையான ஹார்முஸ் ஜலசந்தியை ஈரான் மூடியது.

இதனால் சர்வதேச அளவில் கச்சா எண்ணெய் விநியோகம் கடுமையாக பாதிக்கப்பட்டது. அமெரிக்கா மற்றும் அதன் நட்பு நாடுகளின் கப்பல்களுக்கு இந்த ஜலசந்தியை கடக்க அனுமதி இல்லை என ஈரான் முன்பே அறிவித்திருந்தது. இதன் தாக்கம் உலகளாவிய பொருளாதாரத்திலும் உணரப்பட்டு வருகிறது.

இதையும் படிங்க: பாக்., மாதிரி இந்தியா தரகர் நாடு கிடையாது!! அனைத்துக் கட்சி கூட்டத்தில் ஜெய்சங்கர் காட்டம்!!

இந்நிலையில், புதிய திருப்பமாக, சில நாடுகளுக்கு மட்டும் ஹார்முஸ் ஜலசந்தி வழியாக கப்பல்கள் செல்ல அனுமதி வழங்கப்படும் என ஈரான் அறிவித்துள்ளது. இந்தியா, ரஷ்யா, பாகிஸ்தான், சீனா மற்றும் ஈராக் ஆகிய நாடுகளின் கப்பல்கள் பாதுகாப்பாக கடந்து செல்ல அனுமதி வழங்கப்படும் என தெரிவிக்கப்பட்டுள்ளது.

இந்த அறிவிப்பை ஈரானின் வெளியுறவு அமைச்சர் அப்பாஸ் அர்காசி  (Abbas Araghchi) வெளியிட்டார். ஹார்முஸ் ஜலசந்தி முழுமையாக மூடப்படவில்லை என்றும், ஈரானின் நட்பு நாடுகளுக்கு மட்டுப்படுத்தப்பட்ட அனுமதி வழங்கப்படுவதாகவும் அவர் விளக்கமளித்துள்ளார்.

இதற்கிடையில், போரை முடிவுக்கு கொண்டு வர அமெரிக்க அதிபர் டொனால்டு ட்ரம்ப் (Donald Trump) 15 அம்ச திட்டத்தை முன்வைத்துள்ளதாக தகவல்கள் வெளியாகியுள்ளன. ஆனால், அந்த திட்டத்தை ஏற்க மறுத்த ஈரான் தொடர்ந்து தாக்குதல்களை மேற்கொண்டு வருகிறது.

மொத்தத்தில், ஒரு புறம் போர் நீடித்து கொண்டிருக்க, மறுபுறம் தேர்ந்தெடுக்கப்பட்ட நாடுகளுக்கு சலுகை வழங்கும் ஈரானின் இந்த நடவடிக்கை, சர்வதேச அரசியல் மற்றும் வர்த்தகத்தில் புதிய மாற்றங்களை உருவாக்கும் என நிபுணர்கள் கருதுகின்றனர்.

இதையும் படிங்க: மக்கள் மத்தியில் ட்ரம்ப் செல்வாக்கு சரிவு!! அடுத்தடுத்த போர்! அமைதியின்மையால் மக்கள் வெறுப்பு!