ஈரான் உச்ச தலைவர் மோஜ்தபா கமேனியின் உடல்நிலை கவலைக்கிடமாக இருப்பதாக இஸ்ரேல் ஊடகங்கள் தகவல் வெளியிட்ட நிலையில், அவர் சிலருடன் உரையாடுவது போன்ற வீடியோவை ஈரான் தரப்பு வெளியிட்டுள்ளது. இதனால், மோஜ்தபா கமேனியின் தற்போதைய நிலை குறித்த விவாதம் மீண்டும் தீவிரமடைந்துள்ளது.

அமெரிக்கா மற்றும் இஸ்ரேல் இணைந்து ஈரான் மீது நடத்திய தாக்குதலில், கடந்த பிப்ரவரி 28-ம் தேதி அப்போதைய ஈரான் உச்ச தலைவர் அயதுல்லா அலி கமேனி கொல்லப்பட்டதாக தெரிவிக்கப்பட்டது. இதையடுத்து, அவரது மகன் மோஜ்தபா கமேனி உச்ச தலைவராக பதவியேற்றார்.

பதவியேற்ற பின்னர் மோஜ்தபா கமேனி பொதுவெளியில் அதிகம் தோன்றவில்லை. அவரது பெயரில் எழுத்துப்பூர்வ அறிக்கைகள் மட்டுமே வெளியிடப்பட்டு வந்தன. பாதுகாப்பு அச்சுறுத்தல் காரணமாக அவர் பொதுநிகழ்ச்சிகளில் பங்கேற்பதை தவிர்த்து வருவதாக கூறப்பட்டது. தனது தந்தையின் இறுதிச்சடங்கிலும் அவர் கலந்து கொள்ளவில்லை.

இதையும் படிங்க: ஈரான் உச்ச தலைவர் மொஜ்தபா கமெனி நிலை கவலைக்கிடம்? எந்த நேரத்திலும் உயிரிழக்கக்கூடும்? பரபரப்பு தகவல்!

இதற்கிடையே, அயதுல்லா அலி கமேனி கொல்லப்பட்ட தாக்குதலில் மோஜ்தபா கமேனியும் காயமடைந்ததாகவும், அவரது தோற்றத்தில் பாதிப்பு ஏற்பட்டிருக்கலாம் என்றும் தகவல்கள் வெளியாகின. இதனால் அவர் தலைமறைவாக இருப்பதாகவும், அவரது நிலை குறித்து பல்வேறு சந்தேகங்கள் இருப்பதாகவும் அவ்வப்போது செய்திகள் வெளியாகி வந்தன.

இந்த சூழலில், மோஜ்தபா கமேனி மிகவும் கவலைக்கிடமான நிலையில் இருப்பதாகவும், அவரது மறைவு குறித்த தகவல் விரைவில் வெளியாகலாம் என்றும் இஸ்ரேல் செய்தி நிறுவனங்கள் தெரிவித்ததாக கூறப்படுகிறது.

இதற்கு மத்தியில், ஈரானின் அதிகாரப்பூர்வ மெஹர் செய்தி நிறுவனம் தேதி குறிப்பிடப்படாத வீடியோ ஒன்றை வெளியிட்டுள்ளது. அதில் மோஜ்தபா கமேனி சில நபர்களுடன் அமர்ந்து உரையாடுவது போன்ற காட்சிகள் இடம்பெற்றுள்ளன.

நீண்ட நாட்களாக அவரது உடல்நிலை மற்றும் இருப்பிடம் குறித்து பல்வேறு தகவல்கள் வெளியாகி வந்த நிலையில், ஈரான் தரப்பில் இருந்து அவர் தொடர்பான காட்சி வெளியாவது இதுவே முதல் முறை என கூறப்படுகிறது.

எனினும், இந்த வீடியோ எப்போது பதிவு செய்யப்பட்டது என்பது தெளிவாக தெரியவில்லை. எனவே, வீடியோ தற்போதைய நிலையை உறுதிப்படுத்துகிறதா என்பதும் உடனடியாக உறுதி செய்யப்படவில்லை. இதனால், மோஜ்தபா கமேனியின் உடல்நிலை குறித்த பரபரப்பு தொடர்ந்து நீடிக்கிறது.

இதையும் படிங்க: சவுதிக்கு பாதுகாப்பு கிடைக்காது! பாகிஸ்தான்-துருக்கி ஒப்பந்தம் குறித்து ஈரான் அதிரடி எச்சரிக்கை!