தூத்துக்குடியில் உப்பளங்களை கையகப்படுத்தி கப்பல் கட்டும் தளம் அமைக்க மத்திய அரசு திட்டமிட்டுள்ளது. இதற்காக 3,000 ஏக்கர் நிலம் தேர்வு செய்யப்பட்டுள்ளது, இதில் முள்ளக்காடு முதல் புன்னக்காயல் வரையிலான உப்பளப் பகுதிகள் அடங்கும். இத்திட்டம் தூத்துக்குடியை முக்கிய கப்பல் கட்டுமான மையமாக மாற்றுவதை நோக்கமாகக் கொண்டுள்ளது. தமிழ்நாடு, ஆந்திர பிரதேசம், ஒடிசா, குஜராத், மகாராஷ்டிரா ஆகிய ஐந்து மாநிலங்களில் 15,000 ஏக்கரில் ரூ.1.50 லட்சம் கோடி மதிப்பீட்டில் கப்பல் கட்டுமானத் தொகுப்புகள் செயல்படுத்தப்பட உள்ளன. 

தூத்துக்குடியில் 1,800 ஏக்கர் முதற்கட்டமாகவும், பின்னர் 1,200 ஏக்கர் கூடுதலாகவும் கையகப்படுத்தப்பட உள்ளது. இத்திட்டத்தின் மூலம் பசுமை எரிபொருள் பயன்படுத்தும் கப்பல்கள் உற்பத்தி செய்யப்படும், குறிப்பாக பசுமை ஹைட்ரஜன் தொழில்நுட்பம் மேம்படுத்தப்படும். இதற்காக ரூ.2 லட்சம் கோடி முதலீடு செய்யப்பட்டு, 40 லட்சம் டன் பசுமை ஹைட்ரஜன் உற்பத்தி திட்டங்கள் ஒப்புதல் பெற்றுள்ளன. இது உலகளவில் பாராட்டப்பட்டுள்ளது.

இதையும் படிங்க: திறப்புக்கு ரெடியான வின்ஃபாஸ்ட் ஆலை.. தூத்துக்குடி செல்கிறார் முதல்வர் ஸ்டாலின்..!!

இருப்பினும், இத்திட்டம் உப்பளத் தொழிலை அழித்து, ஆயிரக்கணக்கான குடும்பங்களின் வாழ்வாதாரத்தைப் பாதிக்கும் என தமிழக வெற்றி கழகம் எதிர்ப்பு தெரிவித்துள்ளது. முள்ளக்காடு பகுதியில் மட்டும் 500 ஏக்கர் கையகப்படுத்தப்படுவதாகவும், இது உப்பு உற்பத்திக்கு பெயர் பெற்ற தூத்துக்குடியின் பாரம்பரியத் தொழிலை அழிக்கும் எனவும் குற்றச்சாட்டு எழுந்துள்ளது. இதற்கு எதிராக மாபெரும் போராட்டம் நடத்தப்படும் என அக்கட்சி எச்சரித்துள்ளது.

மறுபுறம், கப்பல் கட்டுமானத் துறையில் முதலீடுகள் அதிகரித்து வருகின்றன. கோச்சின் ஷிப்யார்டு மற்றும் டச்சு நிறுவனமான டேமன் இணைந்து ரூ.1,500 கோடி மதிப்பில் கப்பல் உதிரிபாக உற்பத்தி மையம் அமைக்கப்பட உள்ளது. மேலும், சென்னை ராதா இன்ஜினியரிங் வொர்க்ஸ் நிறுவனம் 1,400 பேருக்கு வேலைவாய்ப்புடன் கப்பல் உற்பத்தி மையத்தை அமைக்கிறது. இத்திட்டங்கள் தூத்துக்குடியை கடல் வணிக மையமாக மாற்றினாலும், உப்பளத் தொழிலின் எதிர்காலம் குறித்து கவலைகள் எழுப்பப்பட்டுள்ளன.

இந்நிலையில் தூத்துக்குடியில் உப்பளங்களை கையகப்படுத்தி கப்பல் கட்டும் தளம் அமைப்பதற்கு எதிர்ப்பு தெரிவித்து, திருச்செந்தூர் பிரதான சாலையில் உள்ள முத்தையாபுரம் பஜாரில் இன்று கண்டன ஆர்ப்பாட்டம் நடைபெற்றது. ஆர்ப்பாட்டத்துக்கு உப்பு உற்பத்தியாளர் சங்க தலைவர் மந்திரமூர்த்தி தலைமை வகித்தார்.

இந்த போராட்டத்தில் உப்பு உற்பத்தியாளர் சங்கங்கள், உப்பளத் தொழிலாளர் சங்கங்கள், மீன்பீடி தொழிலாளர் சங்கங்கள், வியாபாரிகள் சங்கங்கள், விவசாயிகள் சங்கங்கள், கடலோர மக்கள் வாழ்வுரிமை இயக்கம் மற்றும் ஏராளமான சமூக ஆர்வலர்கள், பொது மக்கள் பலர் கலந்து கொண்டனர். மேலும் போராட்டத்திற்கு ஆதரவு தெரிவித்து முத்தையாபுரம், முள்ளக்காடு, ஸ்பிக்நகர் சுற்று வட்டாரங்களில் உள்ள வியாபாரிகள் தங்கள் கடைகளை இன்று அடைத்து இருந்தனர்.

உப்பளங்களை கையகப்படுத்துவது உள்ளூர் பொருளாதாரத்திற்கு பேரழிவை ஏற்படுத்தும் என கவலை தெரிவிக்கும் பொதுமக்கள், இதற்கு மாற்றாக, வேறு இடங்களில் கப்பல் கட்டும் தளம் அமைக்க வேண்டும் என கோரிக்கை விடுத்துள்ளனர். மத்திய அரசு இத்திட்டத்தை மறு ஆய்வு செய்ய வேண்டும் எனவும், மக்களின் கருத்துகளை கேட்டு முடிவெடுக்க வேண்டும் எனவும் அரசியல் தலைவர்கள் வலியுறுத்துகின்றனர். இந்த எதிர்ப்பு தொடர்ந்து வலுப்பெறும் என எதிர்பார்க்கப்படுகிறது.

இதையும் படிங்க: வெள்ளை வேட்டி சட்டையில் கலக்கலாக வந்த பிரதமர் மோடி..!! புதிய முனையக் கட்டடம் திறந்து வைப்பு..!