கராகஸ், ஜனவரி 6: அமெரிக்க அதிபர் டொனால்ட் டிரம்பின் உத்தரவின்பேரில் வெனிசுலா மீது நடத்தப்பட்ட ராணுவ நடவடிக்கையில் அதிபர் நிக்கோலஸ் மதுரோவும் அவரது மனைவி சிலியா புளோரஸும் கைது செய்யப்பட்டு நியூயார்க் சிறையில் அடைக்கப்பட்டுள்ளனர். இதனால் வெனிசுலாவின் துணை அதிபராக இருந்த டெல்சி ரோட்ரிக்ஸ் இடைக்கால அதிபராக பொறுப்பேற்றுள்ளார். அவர் அமெரிக்காவின் சட்டவிரோத ஆக்கிரமிப்பால் மக்கள் அடைந்த துன்பங்களுக்கு துக்கம் தெரிவித்துள்ளார்.

வெனிசுலா அதிபர் நிக்கோலஸ் மதுரோ (63) மற்றும் அவரது மனைவி சிலியா புளோரஸ் (69) ஆகியோர் போதைப்பொருள் கடத்தல் உள்ளிட்ட குற்றச்சாட்டுகளின் பேரில் அமெரிக்காவால் தேடப்பட்டு வந்தனர். ஜனவரி 3ஆம் தேதி அதிகாலையில் அமெரிக்க சிறப்புப் படையினர் கராகஸ் நகரில் உள்ள மதுரோவின் இல்லத்தில் தாக்குதல் நடத்தி அவரையும் மனைவியையும் கைது செய்தனர். 

இந்த நடவடிக்கையில் அமெரிக்க விமானங்கள் வெனிசுலாவின் வான் பாதுகாப்பு அமைப்புகளை முடக்கியதுடன், பல இடங்களில் குண்டுவீச்சு நடத்தப்பட்டது. மதுரோ தம்பதியினர் அமெரிக்க போர்க் கப்பலுக்கு அழைத்துச் செல்லப்பட்டு, பின்னர் நியூயார்க்குக்கு கொண்டு வரப்பட்டனர். அங்கு அவர்கள் போதைப்பொருள் கடத்தல், ஆயுத கடத்தல் உள்ளிட்ட குற்றச்சாட்டுகளின் கீழ் சிறையில் அடைக்கப்பட்டுள்ளனர்.

இதையும் படிங்க: வெனிசுலாவை தாக்க போதைப்பொருள் காரணமில்லை! அமெரிக்காவின் சீக்ரெட் ப்ளான்!! கொட்டிக்கிடக்கும் வளம்!

இக்கைது நடவடிக்கையை அமெரிக்க அதிபர் டிரம்ப் 'பிரமாண்டமான வெற்றி' என்று பாராட்டியுள்ளார். இதனால் வெனிசுலாவின் அரசியல் அமைப்பின்படி துணை அதிபர் டெல்சி ரோட்ரிக்ஸ் (56) இடைக்கால அதிபராக பதவியேற்றார். 

அவர் பதவியேற்பு உரையில், 'நான் ஆழ்ந்த துக்கத்தில் இருக்கிறேன். எங்கள் நாட்டின் மீதான சட்டவிரோத ராணுவ ஆக்கிரமிப்பால் வெனிசுலா மக்கள் அனுபவித்த துன்பங்களுக்கு வருத்தம் அடைகிறேன். இரு ஹீரோக்கள் கடத்தப்பட்டுள்ளனர்' என்று கூறினார். மதுரோவையும் அவரது மனைவியையும் 'ஹீரோக்கள்' என்று அழைத்த அவர், அமெரிக்காவின் நடவடிக்கையை கடுமையாக சாடினார்.

டெல்சி ரோட்ரிக்ஸ் யார்?
டெல்சி ரோட்ரிக்ஸ் வெனிசுலாவின் முன்னாள் துணை அதிபரும், எண்ணெய் துறை அமைச்சருமாவார். 1970களில் புரட்சிகர சோஷலிச கட்சியை நிறுவிய ஜார்ஜ் ரோட்ரிக்ஸின் மகளான இவர், மதுரோவின் தீவிர ஆதரவாளராகவும் விசுவாசியாகவும் அறியப்படுகிறார். வெனிசுலா மக்களிடையே கணிசமான செல்வாக்கு கொண்ட இவர், சோஷலிச கொள்கைகளை வலுவாக ஆதரிப்பவர்.

மதுரோ கைது செய்யப்பட்ட சில மணி நேரங்களிலேயே தலைநகர் கராகஸில் பதற்றமான சூழல் நிலவியது. அதிபர் மாளிகை மீது அடையாளம் தெரியாத ட்ரோன்கள் பறந்ததாகக் கூறி பாதுகாப்புப் படையினர் துப்பாக்கிச் சூடு நடத்தினர். நகரின் பல பகுதிகளில் துப்பாக்கிச் சத்தங்களும், விமான சத்தங்களும் கேட்டன. சில இடங்களில் மின்சாரம் துண்டிக்கப்பட்டது. இந்தச் சூட்டில் அமெரிக்கா ஈடுபடவில்லை என்று வெள்ளை மாளிகை தெரிவித்துள்ளது. தற்போது நிலைமை கட்டுக்குள் வந்துள்ளதாக அதிகாரிகள் கூறுகின்றனர்.

இந்த ராணுவ நடவடிக்கை உலக அளவில் கடும் விமர்சனங்களை ஏற்படுத்தியுள்ளது. பல லத்தீன் அமெரிக்க நாடுகள் இதை 'சட்டவிரோத ஆக்கிரமிப்பு' என்று கண்டித்துள்ளன. வெனிசுலாவில் அமைதி திரும்புமா என்பது பெரும் கேள்விக்குறியாக உள்ளது.

இதையும் படிங்க: வெனிசுலாவில் அமெரிக்கா ஆடிய கோர தாண்டவம்! கியூபாவை சேர்ந்த 32 பேர் பரிதாப மரணம்!