இந்தியாவின் தொழில்நுட்ப வளர்ச்சி, மலிவான டேட்டா, யுபிஐ பணப்பரிவர்த்தனை உள்ளிட்ட சாதனைகளைச் சுட்டிக்காட்டி, ஸோகோ நிறுவனத்தின் நிறுவனர் ஸ்ரீதர் வேம்பு வெளியிட்டுள்ள பதிவு கவனம் பெற்றுள்ளது. இந்தியாவின் ‘நிஜ பாஸ்’ முகேஷ் அம்பானி என எலான் மஸ்க் கூறியதாக வெளியான கருத்துக்குப் பதிலளிக்கும் வகையில் அவர் தனது கருத்துகளைப் பகிர்ந்துள்ளார்.

மலிவான டேட்டா… ஜியோவின் பங்கு!

ஸ்ரீதர் வேம்பு தனது பதிவில், உலகிலேயே குறைந்த விலையில் மொபைல் டேட்டா கிடைக்கும் நாடுகளில் இந்தியாவும் ஒன்று எனக் குறிப்பிட்டுள்ளார். இந்தியாவில் பயணம் செய்யும்போது உள்ளூர் வைஃபை இணைப்பைத் தேட வேண்டிய அவசியமின்றி, மொபைல் டேட்டாவைப் பயன்படுத்தியே கணினியில் பணியாற்ற முடிவதாக அவர் தெரிவித்துள்ளார்.

இந்தியாவில் குறைந்த விலையில் டேட்டா சேவைகள் கிடைப்பதற்கு முகேஷ் அம்பானியின் ஜியோ நிறுவனம் முக்கியப் பங்காற்றியதாகவும் அவர் குறிப்பிட்டுள்ளார். அதிக டேட்டா வழங்கும் திட்டங்களையும், இரண்டு சிம் கார்டுகளைக் கொண்ட மொபைல் போன்களையும் இந்தியர்கள் பரவலாகப் பயன்படுத்துவது இதற்கு ஓர் எடுத்துக்காட்டு என அவர் தெரிவித்துள்ளார்.

இதையும் படிங்க: இந்தியாவில் ஸ்டார்லிங்கை தடுப்பது யார்? நீங்களே யூகித்துக்கொள்ளுங்கள்! எலான் மஸ்க்கின் பதிவால் பரபரப்பு!

மருந்து முதல் யுபிஐ வரை

இந்தியாவில் மருந்துகள் ஒப்பீட்டளவில் குறைந்த விலையில் கிடைப்பதையும் ஸ்ரீதர் வேம்பு சுட்டிக்காட்டியுள்ளார். இந்தியாவுக்கு வரும் வெளிநாட்டினர் மருந்துகளை வாங்கிச் செல்வது அதிகரித்துள்ளதாகவும் அவர் தனது பதிவில் குறிப்பிட்டுள்ளார்.

அதேபோல், யுபிஐ எனப்படும் ஒருங்கிணைந்த பணப்பரிவர்த்தனை அமைப்பு, குறைந்த செலவில் டிஜிட்டல் பரிவர்த்தனைகளை மேற்கொள்ள உதவுவதாக அவர் தெரிவித்துள்ளார். இத்தகைய சேவைகள் பொதுமக்களின் அன்றாட வாழ்க்கையில் ஏற்படுத்தியுள்ள மாற்றங்களையும் அவர் எடுத்துரைத்துள்ளார்.

ஸ்டார்ட்அப் நிறுவனங்கள் வளர்ச்சி

இந்தியாவில் போட்டித்தன்மை கொண்ட பொருளாதாரத்தை உருவாக்கவும், புதிய தொழில்முனைவோரை ஊக்குவிக்கவும் பிரதமர் மோடி தலைமையிலான அரசு நடவடிக்கை எடுத்துள்ளதாக ஸ்ரீதர் வேம்பு கருத்து தெரிவித்துள்ளார். குறிப்பாக, விண்வெளித் தொழில்நுட்பத் துறையில் இந்திய ஸ்டார்ட்அப் நிறுவனங்கள் குறைந்த செலவில் ராக்கெட்டுகளை உருவாக்குவதில் முன்னேறி வருவதாக அவர் குறிப்பிட்டுள்ளார்.

இது ஸ்பேஸ்எக்ஸ் நிறுவனத்துக்குப் போட்டியை உருவாக்கக்கூடும் என்றும், சீன மின்சார வாகனங்கள் டெஸ்லாவுக்குச் சவாலாக இருப்பதைப் போல இந்திய நிறுவனங்களின் வளர்ச்சியும் முக்கியத்துவம் வாய்ந்தது என்றும் அவர் ஒப்பிட்டுள்ளார்.

இந்தியாவின் வளர்ச்சியை மதிப்பிடும்போது, நிறுவனங்களின் செல்வாக்கை மட்டும் பார்க்காமல், பொதுமக்களுக்குக் கிடைக்கும் சேவைகள், தொழில்நுட்ப முன்னேற்றம் மற்றும் புதிய நிறுவனங்களின் வளர்ச்சி ஆகியவற்றையும் கவனிக்க வேண்டும் என்பதே ஸ்ரீதர் வேம்புவின் பதிவின் மையக் கருத்தாக உள்ளது.

இதையும் படிங்க: தஞ்சை பெரிய கோயிலில் டிஜிட்டல் புரட்சி..! GPAY மூலம் பணம் செலுத்தும் வசதி அறிமுகம்..!!