தாய்லாந்து: அரண்மனை வாழ்க்கைக்கு அப்பால் விமானத் துறையிலும் தனது திறமையை வெளிப்படுத்தியுள்ளார் தாய்லாந்து ராணி சுதிதா. இவர், நவீன கிரீபென் ரக போர் விமானத்தை முதல்முறையாகத் தனியாக இயக்கி தனது விமானப் பயணத்தில் புதிய மைல்கல்லை எட்டியுள்ளார். இந்த நிகழ்வு அக்டோபர் 8ஆம் தேதி தெற்கு தாய்லாந்தின் சூரத் தானி மாகாணத்தில் நடைபெற்றது. 

41 நிமிடங்கள் தனிப் பயணம்

தாய்லாந்து விமானப்படையின் விங் 7 தளத்தில் நடைபெற்ற இந்தப் பயிற்சியின்போது, ஒற்றை இருக்கை கொண்ட ஜேஏஎஸ் 39சி கிரீபென் போர் விமானத்தை ராணி சுதிதா இயக்கினார். விமானத்தை இயக்குவதற்கு முன்பாக, அவர் விமானத் தயார்நிலையைச் சரிபார்த்து, பயணத் திட்டம் குறித்த விளக்கத்தையும் பெற்றார்.

அதன்பிறகு விமானத்தை ஓடுபாதைக்குக் கொண்டு சென்று புறப்பட்ட அவர், திட்டமிட்ட பயிற்சிப் பயணத்தை வெற்றிகரமாக நிறைவு செய்து தரையிறங்கினார். இந்தப் பயணம் சுமார் 41 நிமிடங்கள் நீடித்ததாக விமானத் துறைச் செய்திகள் தெரிவிக்கின்றன. தாய்லாந்து அரசர் மஹா வச்சிரலாங்கோன், விமானம் புறப்பட்டதிலிருந்து தரையிறங்கும் வரை நிகழ்வைக் கவனித்தார்.

இதையும் படிங்க: King of Injustice! அநீதியின் அரசர்! ஐரோப்பிய நாடாளுமன்றத்தில் அதிபர் ட்ரம்பின் நிர்வாண சிலை!!

பூங்கொத்து கொடுத்து வாழ்த்திய அரசர்

பயணத்தை முடித்துத் திரும்பிய ராணி சுதிதாவை அரசர் பூங்கொத்து கொடுத்து வரவேற்றார். மேலும், கிரீபென் விமானத்தை இயக்கியதை அங்கீகரிக்கும் வகையில், ‘கிரீபென் ஆர்டர் கோல்டன் பேட்ச்’ எனப்படும் தங்க நிறச் சின்னத்தையும் அவருக்கு வழங்கினார். இந்த அங்கீகாரம் விமானப் பயணத்தைச் சாதித்தவர்களுடன் தொடர்புடையது. 

2010 முதல் விமான அனுபவம்

ராணி சுதிதா 2010ஆம் ஆண்டு முதல் விமானப் பயிற்சியில் ஈடுபட்டு வருகிறார். செஸ்னா டி-41, பிலாட்டஸ் பிசி-9 உள்ளிட்ட பல்வேறு விமானங்களை இயக்கிய அனுபவம் அவருக்கு உள்ளது. பல்வேறு விமானங்களில் அவர் இதுவரை 1,188 மணி நேரத்துக்கும் அதிகமாகப் பறந்துள்ளதாகத் தகவல்கள் தெரிவிக்கின்றன. கிரீபென் போர் விமானத்தைத் தனியாக இயக்குவதற்கு முன்பாக, இரு இருக்கைகள் கொண்ட கிரீபென் விமானத்திலும் பயிற்சி பெற்றுள்ளார்.

முன்னதாக விமானப் பணியாளராகப் பணியாற்றிய சுதிதா, 2019ஆம் ஆண்டு தாய்லாந்து அரசர் மஹா வச்சிரலாங்கோனைத் திருமணம் செய்துகொண்டார். தற்போது போர் விமானத்தை இயக்கிய முதல் தாய் பெண் விமானி என்ற அடையாளத்தையும் அவர் பெற்றுள்ளார். 

இதையும் படிங்க: இந்த முறையாவது கிடைக்குமா நோபல்?! 8 போரை நிறுத்தியதாக அதிபர் டிரம்ப் மீண்டும் சுயதம்பட்டம்!