மத்திய கிழக்கு பிராந்தியத்தில் பதற்றத்தைத் தணிப்பதற்காகவும் மேலும் ஒரு போர் வெடிப்பதைத் தடுப்பதற்காகவும் நான்கு தரப்பு பேச்சுவார்த்தை நடைபெற்றது. டெஹ்ரானில் நடந்த கூட்டத்தில் சவூதி அரேபியாவின் பாதுகாப்பு அமைச்சர் இளவரசர் காலித் பின் சல்மான், பாகிஸ்தான் ராணுவத் தளபதி ஆசிம் முனீர் மற்றும் துருக்கிய உளவுத்துறைத் தலைவர் இப்ராஹிம் கலின் ஆகியோர் பங்கேற்று ஈரான் அதிபர் மசூத் பெசெஷ்கியானைச் சந்தித்தனர்.

இந்தச் சந்திப்பில் பிராந்திய பாதுகாப்பு, அமெரிக்க-இஸ்ரேல் தொடர்பான ராணுவ நடவடிக்கைகளின் விளைவுகள் மற்றும் பாலஸ்தீன-லெபனான் மக்களுக்கு ஆதரவு அளிப்பது குறித்து விரிவாக விவாதிக்கப்பட்டது.

இந்த நாடுகளுடனான விவாதங்கள் சிறப்பாக இருந்ததாக ஈரான் தரப்பில் குறிப்பிடப்பட்டது. பிராந்திய அமைதி மற்றும் பாதுகாப்பை வலுப்படுத்துவதற்காகப் பேச்சுவார்த்தைகளைத் தொடர்ந்து நடத்த ஒப்புக்கொள்ளப்பட்டது.

இதையும் படிங்க: வாக்காளர் மோசடி குறித்து தகவல் சொன்னால் ரூ.9.49 கோடி பரிசு!! இடைக்காலத் தேர்தலுக்கு முன் டிரம்ப் அதிரடி!!

சவுதி அரேபியா, துருக்கி மற்றும் பாகிஸ்தான் ஆகிய நாடுகளுடன் டெஹ்ரானில் நடந்த பேச்சுவார்த்தைக்குப் பிறகு பிராந்தியத்தில் ஒரு புதிய சூழல் உருவாகி வருவதாக ஈரான் தேசிய பாதுகாப்பு கவுன்சிலின் செயலாளர் மொஹ்சென் ரெசாயி தெரிவித்தார். நான்கு நாடுகளும் தொடர்ந்து உரையாடலை மேற்கொள்ளவும் பிராந்திய ஒத்துழைப்பை வலுப்படுத்தவும் உடன்பட்டதாக கூறப்பட்டது.

ஐநா பொதுச்செயலாளர் அன்டோனியோ குட்டரெஸ் வெளியிட்டுள்ள பதிவில் மத்திய கிழக்கில் எந்தவொரு பதற்றமும் ஏற்படாமல் தடுப்பது அவசியம் என்றும் ஈரான் மீதான பெரும் ராணுவத் தாக்குதலையும் வளைகுடா நாடுகள் மீதான தாக்குதலையும் தடுத்து நிறுத்த வேண்டும் என்றும் குறிப்பிட்டுள்ளார்.

இந்தப் பேச்சுவார்த்தை மத்திய கிழக்கு பிராந்தியத்தில் அமைதியை நிலைநாட்டும் முயற்சியாகப் பார்க்கப்படுகிறது. நான்கு நாடுகளும் தொடர்ந்து ஆலோசனைகளை நடத்தி வரும் எனத் தெரிவிக்கப்பட்டுள்ளது.

இதையும் படிங்க: திபெத்தில் சீனா கட்டும் பிரமாண்ட அணையால் இந்தியாவுக்கு வெள்ள ஆபத்து?! சீன ஆராய்ச்சியாளர்கள் கொடுத்த வார்னிங்!