அமெரிக்க அதிபர் டொனால்ட் டிரம்ப், ஈரான் மீது திட்டமிட்டிருந்த தாக்குதலை வளைகுடா நாடுகளின் வேண்டுகோளுக்கு இணங்க ஒத்திவைத்துள்ளார். மேற்காசியப் பதற்றத்தை விரைவில் முடிவுக்குக் கொண்டுவரப் போவதாகவும் அவர் அறிவித்துள்ளார்.

நிருபர்களிடம் பேசிய டிரம்ப், “நாங்கள் அந்தப் போரை மிக விரைவாக முடிவுக்குக் கொண்டுவரப் போகிறோம். அவர்கள் ஒரு உடன்பாட்டை ஏற்படுத்திக்கொள்ள மிகவும் விரும்புகிறார்கள்” என்று தெரிவித்தார். மேலும், “கச்சா எண்ணெய் விலைகள் அதலபாதாளத்தில் வீழ்வதை நீங்கள் காண்பீர்கள். அங்கே அபரிமிதமான எண்ணெய் இருப்பதால் விலை கடுமையாகச் சரியும்” என்றும் அவர் கூறினார்.

இருப்பினும், ஈரான் அணு ஆயுதத் தயாரிப்பைத் தடுக்கும் விதிமுறைகளுக்கு ஒப்புக்கொள்ளாவிட்டால் தாக்குதலுக்கு முழுத் தயார் நிலையில் அமெரிக்கா இருப்பதாகத் துணை அதிபர் ஜே.டி. வேன்ஸ் எச்சரித்துள்ளார். இந்த 72 மணி நேர ராஜதந்திர இறுதி எச்சரிக்கை, வாஷிங்டன் மற்றும் தெஹ்ரான் இடையே பெரும் பதற்றத்தை ஏற்படுத்தியுள்ளது.

இதையும் படிங்க: கச்சா எண்ணெய் விலை அதலபாதாளத்திற்கு சரியும்!! போர் விரைவில் முடிவுக்கு வரும்!! ட்ரம்ப் சூசகம்!

ஈரான் தரப்பில் இருந்து கடுமையான எதிர்வினை வந்துள்ளது. ஹார்முஸ் நீர்வழியில் தனது சட்டப்பூர்வ உரிமைகளை வலுவாகப் பாதுகாக்கும் என்று ஈரானிய நாடாளுமன்றத்தின் தேசிய பாதுகாப்பு மற்றும் வெளியுறவுக் கொள்கைக் குழு தலைவர் இப்ராஹிம் அஜிஸி வலியுறுத்தினார். பிராந்தியத்தில் செல்வாக்கு செலுத்த முயற்சிக்கும் நாடுகளுக்கு எச்சரிக்கை விடுத்த அவர், தங்கள் நலன்களைப் பாதுகாப்பதில் எந்த மென்மையும் காட்ட மாட்டோம் என்றும் தெரிவித்தார்.

உலக அரங்கில் இந்தப் பதற்றம் தொடரும் நிலையில், கச்சா எண்ணெய் விலை ஏற்ற இறக்கம் ஏற்படும் என எதிர்பார்க்கப்படுகிறது. டிரம்ப் நிர்வாகம் அணு ஆயுதப் பரவலைத் தடுக்கும் உறுதியுடன் இருப்பதாகக் கூறினாலும், வளைகுடா நாடுகளின் அழுத்தத்தால் தாக்குதலை தற்காலிகமாக ஒத்திவைத்துள்ளது.

இந்த சூழலில் சர்வதேச சமூகம் அமைதிப் பேச்சுகளுக்கு வாய்ப்பு கிடைக்குமா என ஆவலுடன் காத்திருக்கிறது. ஈரான் ஒரு ஒப்பந்தத்துக்கு வருகிறதா அல்லது பதற்றம் அதிகரிக்கிறதா என்பது அடுத்த சில நாட்களில் தெரியவரும். உலகப் பொருளாதாரம், குறிப்பாக எண்ணெய் சந்தை மீது இந்த நிலவரம் பெரும் தாக்கத்தை ஏற்படுத்தும் என பொருளாதார வல்லுநர்கள் எச்சரித்துள்ளனர்.

தமிழகம் உள்ளிட்ட இந்தியாவுக்கு எண்ணெய் இறக்குமதி முக்கியமானதால், இந்த விவகாரத்தை உன்னிப்பாகக் கவனித்து வருகிறது அரசு. 

இதையும் படிங்க: இது புயலுக்கு முன் இருக்கும் அமைதி!! ஈரான் மீது புதிய தாக்குதல் நடத்த திட்டம்! ட்ரம்ப் சூசகம்!