தமிழகச் சட்டமன்றத் தேர்தலில் சென்னை பெரம்பூர் மற்றும் திருச்சி கிழக்கு ஆகிய இரண்டு தொகுதிகளில் போட்டியிடுவதாக அறிவித்துள்ள தமிழக வெற்றிக் கழகத் தலைவர் விஜய் அவர்கள், இன்று (திங்கள்கிழமை) சென்னையில் தனது அதிரடித் தேர்தல் பிரசாரத்தைத் தொடங்குகிறார். இதற்காகத் தேர்தல் ஆணையத்திடம் முறையான அனுமதி பெறப்பட்டு, விரிவான பாதுகாப்பு ஏற்பாடுகள் செய்யப்பட்டுள்ளன.

இன்று மதியம் 2 மணி முதல் இரவு 7 மணி வரை சென்னையின் மூன்று முக்கியத் தொகுதிகளில் விஜய் அவர்கள் வாக்குச் சேகரிக்க உள்ளார்.

இன்றைய (மார்ச் 30) பிரசாரப் பயணத் திட்டம்:
கழகத் தலைவர் விஜய் அவர்களின் இன்றைய பிரசார நேரங்கள் இதோ:

இதையும் படிங்க: பாஜக-வை எதிர்க்காதவர் எப்படி மக்களைக் காப்பார்? விஜய்யை விளாசிய அருட்தந்தை சார்லஸ் குமார்!

மதியம் 2:00 - 4:00 மணி: தான் போட்டியிடும் பெரம்பூர் சட்டமன்றத் தொகுதியில் தேர்தல் பிரசாரம் மற்றும் வாக்குச் சேகரிப்பு.

மாலை 5:00 - 6:00 மணி: முதலமைச்சர் மு.க. ஸ்டாலின் அவர்களின் தொகுதியான கொளத்தூர் சட்டமன்றத் தொகுதியில் பிரசாரம்.

மாலை 6:00 - 7:00 மணி: வில்லிவாக்கம் சட்டமன்றத் தொகுதியில் பொதுமக்களைச் சந்தித்து உரையாற்றுகிறார்.

சென்னையின் மற்ற தொகுதிகளிலும் பிரசாரம் மேற்கொள்வதற்கான அனுமதி பெறும் பணிகள் தற்போது போர்க்கால அடிப்படையில் நடைபெற்று வருகின்றன. கூட்ட நெரிசலைத் தவிர்க்கவும், அசம்பாவிதங்கள் ஏதுமின்றி பிரசாரத்தை நடத்தவும் தவெக பொதுச் செயலாளர் என். ஆனந்த் அவர்கள் பின்வரும் வேண்டுகோள்களை விடுத்துள்ளார்:

கர்ப்பிணிப் பெண்கள், சிறுவர் - சிறுமியர், பள்ளி மாணவர்கள், மூத்த குடிமக்கள், மாற்றுத்திறனாளிகள் மற்றும் உடல்நலம் குன்றியவர்கள் நேரில் வருவதைத் தவிர்த்து, சமூக வலைத்தளம் மற்றும் தொலைக்காட்சி நேரலைகளில் பிரசாரத்தைக் காணுமாறு கேட்டுக்கொள்ளப்படுகிறார்கள்.

தலைவரின் பிரசார வாகனத்தை இருசக்கர வாகனங்கள் உள்ளிட்ட எவ்வித வாகனங்களும் பின்தொடர்வதைக் கண்டிப்பாகத் தவிர்க்க வேண்டும். அனுமதிக்கப்பட்ட கழக நிர்வாகிகள் மட்டுமே பிரசார நிகழ்வுகளில் பங்கேற்று முழு ஒத்துழைப்பு வழங்க வேண்டும். பிரசாரத்தில் கலந்து கொள்பவர்களுக்குத் தேவையான குடிநீர் மற்றும் மருத்துவ வசதிகள் கழகம் சார்பில் தாராளமாக ஏற்பாடு செய்யப்பட்டுள்ளன.

திமுக-வின் 524 வாக்குறுதிகள் கொண்ட 'சூப்பர் ஸ்டார்' தேர்தல் அறிக்கை வெளியான மறுநாளே விஜய் தனது பிரசாரத்தைத் தொடங்குவது, தமிழகத் தேர்தல் களம் உச்சகட்டப் பரபரப்பை எட்டியுள்ளதைக் காட்டுகிறது.

இதையும் படிங்க: ஒருவழியாக கிடைத்த அனுமதி! மார்ச் 30-ல் பெரம்பூரில் விஜய் பிரசாரம்!