சென்னை: துணை முதல்வர் உதயநிதி ஸ்டாலினின் சொத்து விவரங்களில் முரண்பாடுகள் இருப்பதாகக் கூறி, வருமான வரித் துறை மற்றும் பெரு நிறுவன விவகாரங்கள் துறை அமைச்சகம் விசாரணை நடத்த உத்தரவிடக் கோரி சென்னை உயர் நீதிமன்றத்தில் வழக்கு தொடரப்பட்டுள்ளது.
சேப்பாக்கம்-திருவல்லிக்கேணி தொகுதி வாக்காளர் ஆர்.குமாரவேல் என்பவர் தாக்கல் செய்துள்ள மனுவில், உதயநிதி ஸ்டாலின் 2021 சட்டமன்றத் தேர்தலின்போது தாக்கல் செய்த வேட்பு மனுவில் குறிப்பிட்ட சொத்து விவரங்களுக்கும், தற்போது தாக்கல் செய்துள்ள வேட்பு மனுவுக்கும் இடையே பெரிய அளவில் வேறுபாடுகள் இருப்பதாகக் கூறியுள்ளார்.
2021-ல் ‘ரெட் ஜெயன்ட் மூவிஸ்’ நிறுவனத்தில் 7.36 கோடி ரூபாய் முதலீடு செய்ததாக உதயநிதி குறிப்பிட்டிருந்த நிலையில், நடப்பு தேர்தல் வேட்பு மனுவில் இந்த முதலீடு குறித்து எந்தத் தகவலும் தெரிவிக்கவில்லை. அதே நிறுவனத்தில் அவரது மனைவி 2.63 கோடி ரூபாய் முதலீடு செய்துள்ளதாக மட்டும் கூறப்பட்டுள்ளது. இந்த பரிவர்த்தனை குறித்து முறையான விளக்கம் எதுவும் இல்லை.
இதையும் படிங்க: மாம்பழம் சின்னம் வழக்கு!! ராமதாஸுக்கு தொடர் சறுக்கல்!! மனுவை தள்ளுபடி செய்தது சென்னை ஐகோர்ட்!
மேலும், 2021-ல் ‘ஸ்னோ ஹவுசிங்’ நிறுவனத்துக்கு 11.06 கோடி ரூபாய் கடன் கொடுத்ததாகக் குறிப்பிட்டிருந்த உதயநிதி, தற்போது 10 கோடி ரூபாய் மட்டுமே என்று தெரிவித்துள்ளார். மீதமுள்ள 1.06 கோடி ரூபாய் திருப்பிப் பெறப்பட்டதா என்பது குறித்து எந்த விளக்கமும் இல்லை.
வருமான விவரத்திலும் பெரிய மாற்றம் உள்ளது. 2020-க்கு முன்பு 2.02 கோடி ரூபாய் வருமானம் என்று கூறியவர், தற்போது 10.98 கோடி ரூபாய் வருமானம் உள்ளதாகத் தெரிவித்துள்ளார். இந்த வருமான உயர்வு மற்றும் சொத்து மாற்றங்கள் குறித்து உரிய ஆவணங்கள் அல்லது விளக்கங்கள் எதுவும் வேட்பு மனுவில் இல்லை என்று மனுதாரர் சுட்டிக்காட்டியுள்ளார்.
சொத்து விவரங்களில் தவறான அல்லது முழுமையற்ற தகவல்களை வழங்குவது மக்கள் பிரதிநிதித்துவ சட்டத்துக்கு எதிரானது என்று கூறிய மனுதாரர், இந்த முரண்பாடுகள் குறித்து வருமான வரித் துறையும், பெரு நிறுவன விவகாரங்கள் துறை அமைச்சகமும் விசாரணை நடத்த உத்தரவிட வேண்டும் என்று கோரியுள்ளார்.
இந்த மனு, தலைமை நீதிபதி எஸ்.ஏ. தர்மாதிகாரி மற்றும் நீதிபதி ஜி. அருள்முருகன் அடங்கிய அமர்வு முன்பு நாளை (ஏப்ரல் 16, 2026) விசாரணைக்கு வர உள்ளது. இந்த வழக்கு தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ளது.
இதையும் படிங்க: மாம்பழ சின்னம் வழக்கு! சென்னை ஐகோர்ட் மறுப்பு!! பாமக நிறுவனர் ராமதாஸுக்கு சறுக்கல்!!